1 Kọrẹnt 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ephẹrẹ kugbẹ Aroẹmrẹ

¹ Jẹn ẹguọnọ dia obo ru wo nẹ, vwẹ oma kpotọ guọnọ okẹ rẹ erhi na, marho rere wọ sa mraro.

² Kidie ohwo rọ jẹ ephẹrẹ ọ dia ihwo rẹ akpọ ọ jẹ kẹ-ẹ ẹkẹvuọvo Ọghẹnẹ; kidie ohwo riẹn obo rọ ta-a, ẹkẹvuọvo yọ vwẹ Erhi ta ota rẹ igbunu.

³ Vwẹ ẹbẹre ọfa, ohwo rọ mraro na ta ota kẹ ihwo rere e vwo yono ayen ra vwọ ta udu phihọ ayen awo kugbe rere e vwo bru ayen uche.

⁴ Ohwo rọ jẹ ephẹrẹ yono omobọ rọye, ẹkẹvuọvo ohwo rọ mraro ruẹ ishọshi gan.

⁵ Asakiephana me guọnọre nẹ ovwan ejobi jẹ ephẹrẹ, ẹkẹvuọvo ọ rọ marho ovwan mraro. Ohwo rọ mraro rhonọ ohwo rọ jẹ ephẹrẹ, jokpa nẹ ohwo dia etanumeta kẹ, rere ishọshi vwọ gan.

⁶ Asakiephana, imoni, ọ da dianẹ mi bru ovwan rhe kẹ ephẹrẹ me jẹ, komavọ erere ru te ovwan jokpa nẹ a vwẹ emu evo phia kẹ ovwan eyẹ erianriẹn eyẹ aroẹmrẹ eyẹ uyono?

⁷ Ọ da dianẹ odo re ta ota-a, kerẹ urephe eyẹ isorogun, sa ta ota phia re de nyo-o, komavọ ohwo sa riẹn obo re hwori?

⁸ Ọ da dianẹ owanre de di se bọm bọm, kono re choma hẹrhẹ ofovwi?

⁹ Ọtiọye ọ epha kẹ oma rẹ ovwan; wọ da jẹ ephẹrẹ vwọ ta ota re je nyo, komavọ ohwo vwo se nyo obo ra tare? Kidie odju kọye wọ de ta ota phihọ.

¹⁰ Ọ muẹro nẹ ephẹrẹ sansan re hẹ akpọ na, yo vwo ọvuọvo ro jẹ otọ evwo-o;

¹¹ ẹkẹvuọvo me rha riẹn otọ rẹ ephẹrẹ na-a, mẹvwẹ kẹ ọrhorha kẹ ohwo rọ ta ota na ohwo rọ ta ọta na kẹ ọrhorha kẹ vwẹ.

¹² Ọtiọye ọ epha kẹ oma wẹn; rẹ urhuru rẹ ephiaphia rẹ Erhi na vwo si we na, gba pharhe re wo ru ishọshi na gan.

¹³ Fiki rẹ ọtiọye na, ohwo rọ jẹ ephẹrẹ vwọ ta ota gba nọ ekpẹn rẹ ogangan ra vwọ fan otọ rọye.

¹⁴ Kidie me da jẹ ephẹrẹ vwọ nẹ ẹrhovwo, erhi mẹ nẹ ẹrhovwo ẹkẹvuọvo yẹ obo udu mẹ ofefe.

¹⁵ Kidie mi ru vwọ? Me vwẹ erhi mẹ nẹ ẹrhovwo me je vwẹ udu mẹ nẹ ẹrhovwo rhe; me vwẹ erhi mẹ so une me je vwẹ udu mẹ so une rhe.

¹⁶ Ọ rha dia ọtiọye-e, ọ da dianẹ wọ vwẹ erhi nẹ ẹrhovwo, komavọ ogbori se vwo ku isẹ phihọ ẹkpẹvwẹ wẹn yọ riẹn obo ru wọ ta-a?

¹⁷ Kidie wọ sa kpẹvwẹ, ẹkẹvuọvo yo se ru ohwo ọfa ga-an.

¹⁸ Me kpẹvwẹ Ọghẹnẹ nẹ me jẹ ephẹrẹ nọ ovwan na ejobi;

¹⁹ ẹkẹvuọvo, o fori rere me ta ota iyori vwẹ udu mẹ vwẹ evun rẹ ishọshi, rere e vwo yono ihwo efa, nọ eta uriori ihwe vwẹ ephẹrẹ.

²⁰ Imoni, ovwan rhe se oma rẹ ovwan emọ vwẹ iroro rẹ ovwa-an; wa dia emọ vwẹ umwemwu, ẹkẹvuọvo vwẹ iroro wa dia omiragua.

²¹ E siro phihọ evun rẹ urhi na, Vwẹ oma rẹ ihwo re jẹ ephẹrẹ ọfa kugbe ẹbẹrunu rẹ erhorha me ta ota kẹ ihwo nana, dede na ayen cha kerhọn mẹ-ẹ, eriyin Ọrovwohwo tare.

²² Ọtiọye na, ephẹrẹ kẹ oka ọ dianẹ kẹ ihwo ri segbuyota-a ẹkẹvuọvo kẹ otu ri je segbuyota, aroẹmrẹ rha herọ ọ dianẹ kẹ otu ri je segbuyota-a ẹkẹvuọvo kẹ otu ri segbuyota.

²³ Ọtiọye na, ọ da dianẹ ishọshi na ejobi ghwẹ koko rẹ ayen ejobi da jẹ ephẹrẹ, rẹ ogbori eyẹ ohwo ro segbuyota-a da vwẹriẹ, ayen rha tanẹ ovwan mwa orhuẹ-ẹ?

²⁴ Ẹkẹvuọvo ayen ejobi da mraro, rẹ ohwo ro segbuyota-a eyẹ ogbori da vwẹriẹ, obo ro nyori ejobi ko muo ẹro, kọ sa vwẹ unu gbe ikun rẹ obo ro nyori ejobi,

²⁵ odjahọ rọ hẹ udu rọye ejobi ko rhie phihọ; ọtiọye na, o de she diguẹ, kọ ga Ọghẹnẹ ko ghwoghwo nẹ uyota Ọghẹnẹ ghine hẹ ohri rẹ ovwan.

E ru Emu Ejobi wan urhi

²⁶ Kidie vwo, imoni? Ọke we de rhi si koko, rẹ ohwo ọvuọvo da so une, ọvo de vwo obo ro yono, rẹ ọvo de vwo obo rọ vwọ phia, rẹ ọvo da jẹ ephẹrẹ, eyẹ ọvo fan otọ rọye. E jẹn e ru ayen rere emu ejobi vwọ gba.

²⁷ Ọ da dianẹ ohwo jẹ ephẹrẹ, e jẹn ọ dia ihwo ivẹ ọvo eyẹ o de bu gangan erha ọvo, dohwo dute rọye; e gbe jẹ ọvo dia etanumeta.

²⁸ Ẹkẹvuọvo o gbi vwo etanumeta-a, e gbe jẹn ohwo ọvuọvo rhurhu unu vwẹ evun rẹ ishọshi rọ ta ota kẹ oma rọye ọvo vẹ Ọghẹnẹ.

²⁹ Jẹn emraro ivẹ eyẹ erha ta ota, re jẹn ihwo efa vwanvwe obo ra tare.

³⁰ Ọ da dianẹ a vwẹ emu phia kẹ ohwo ọfa ro tidia kẹrẹ, jẹn ohwo rẹsosuọ rhurhu unu.

³¹ Kidie ovwan ohwo ọvuọvo sa mraro, ọtiọye na ovwan ejobi ki se yono rere a ta udu phihọ ayen ejobi awo;

³² erhi rẹ emraro na e vwẹ oma kpotọ kẹ emraro na.

³³ Kidie Ọghẹnẹ dia Ọghẹnẹ rẹ ozighi-i ẹkẹvuọvo ọ rẹ ufuoma. Kirobo rọ epha vwẹ ishọshi rẹ ihwo efuanfon na,

³⁴ eya na mi rhurhu unu vwẹ evun rẹ ishọshi. Kidie a rhọvwe kẹ ayen nẹ e ta ota-a, ẹkẹvuọvo e vwẹ oma kpotọ, kirobo rẹ urhi na tare.

³⁵ Ọ da dianẹ ayen guọnọ emu riẹn, e jẹn ayen nọ eshare rayen vwẹ obo uwevwi. Kidie omaẹvuọ kẹ aye rọ vwọ ta ota vwẹ evun rẹ ishọshi.

³⁶ Die! Oma rẹ ovwan ota rẹ Ọghẹnẹ na nurhe, gbinẹ ovwan ọvo ọ tu te obọ?

³⁷ Ọ da dianẹ ohwo ọvo rori nẹ ọye ọmraro, eyẹ o vwo erhi, ọ me reyọ nẹ obo ri mi sie rhe ovwan na ọye urhi rẹ Ọrovwohwo.

³⁸ Ọ da dianẹ ohwo rha mrẹ ọnana vughe-e, ye ji vughe ohwo yena-a.

³⁹ Ọtiọye na, imoni mẹ, nabọ guọnọ rere wọ mraro, ovwan je gha ephẹrẹ ẹjẹ-ẹ;

⁴⁰ ẹkẹvuọvo e ru emu na ejobi dẹndẹn utute.