1 Kọrẹnt 12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Okẹ rẹ Erhi Ọfuanfon na

¹ Asakiephana vwọ kpahe oke rẹ erhi na, imoni mẹ, me guọnọre nẹ ovwan dia ogbori vwọ-ọ.

² Ovwan riẹnre nẹ ọke rẹ ovwan vwọ hẹ egọdjọ jovwo, a riẹriẹ ovwan ra gọ ema ri diunu, kirobo rẹ ayen mu ovwan vwo ru.

³ Fiki rẹ ọtiọye na mi jẹ ovwan riẹn nẹ o vwo ohwo rọ vwẹ Ẹrhi rẹ Ọghẹnẹ ta ota rọ tanẹ, Jesu eghwobi-i! O vwo ohwo rọ je sa tanẹ, Jesu hẹ Ọrovwohwo jokpa nẹ Erhi Ọfuanfon ri suro.

⁴ Asakiephana okẹ sansan re herọ, ẹkẹvuọvo Erhi ọvuọvo na;

⁵ iruo sansan re herọ, ẹkẹvuọvo Ọrovwohwo ọvuọvo na;

⁶ idjerhe rẹ iruo sansan re herọ, ẹkẹvuọvo Ọghẹnẹ ọvuọvo na ri phiẹ oruru rọye phihọ ohwo ọvuọvo oma.

⁷ Ohwo ọvuọvo ọye a vwẹ Erhi na phia kẹ rere ọ vwọ dia erhuvwu kẹ ihwo ejobi.

⁸ A wan oma rẹ Erhi na vwẹ ota rẹ aghwanre kẹ ohwo ọvo, ọfa ota rẹ erianriẹn vwẹ oma rẹ Erhi ọvuọvo na,

⁹ ọfa esegbuyota vwẹ oma rẹ Erhi ọvuọvo na, ọfa okẹ rẹ esivwo vwẹ oma rẹ Erhi ọvuọvo na.

¹⁰ Ọfa iruo rẹ igbunu, ọfa aroẹmrẹ, ọfa ẹgba re vwo se vughe erhi, ọfa ephẹrẹ dohwo doka, ọfa ẹgba ra vwọ fan otọ rẹ ephẹrẹ.

¹¹ Erhi ọvuọvo na ri phiẹ oruru nana phihọ ohwo oma, kọye gharọ kẹ ohwo ọvuọvo kirobo rọ guọnọre.

Oma ọvo yẹ Ekuakua Buebu

¹² Kidie kirobo rẹ ugboma na hẹ ọvuọvo na ro de vwo ekuakua buebu na, yẹ ekuakua rẹ oma na ejobi na, dede nẹ ọ epha buebu na, yẹ ugboma ọvo, ọtiọye ọ je epha kẹ Kristi.

¹³ Kidie a vwẹ ame kẹ avwanre vwẹ oma rẹ Erhi ọvo phihọ ugboma ọvo na–ihwo ri Ju eyẹ ihwo ri Grik, ọviẹn eyẹ ọmuvwiẹ de ru ayen ejobi vwọ da vwẹ evun rẹ Erhi ọvuọvo na.

¹⁴ Kidie ugboma na dia ekuakua ọvuọvo ri rhere-e ẹkẹvuọvo ibuebu.

¹⁵ Ọ da dianẹ owọ tare nẹ, Fikiridie mẹ dia obọ-ọ na, me gbe dia ọ rẹ ugboma na-a, ọyena ko siro nẹ ugboma na.

¹⁶ Ọ da dianẹ erhọ tare nẹ, Fikiridie me gbe dia ẹroo na, me gbe dia ọ rẹ ugboma na-a, kẹ ọyena siro nẹ ugboma na?

¹⁷ Ọ da dianẹ ugboma na ejobi kẹ ẹro, kidie e rhe vwo nyo ẹme? Ọ da dianẹ ugboma na ejobi kẹ erhọn, kidie e rhe vwo nyo ọnrhe?

¹⁸ Ẹkẹvuọvo kirobo rọ epha na, Ọghẹnẹ rhuẹrẹ ekuakua na phihọ oma na, dohwo dọrọye, kirobo ro jere.

¹⁹ Ọ da dianẹ ayen ejobi na kẹ oghẹre rẹ ekuakua ọvuọvo, kẹ tivọ ugboma na rha epha?

²⁰ kirobo rọ epha, abọ buebu re herọ, dede na ugboma ọvuọvo.

²¹ Ẹro rha sa ta kẹ obọ nẹ, mi vwo obo me vwẹ owẹ ru-u.

²² Ofẹnẹ ọvo na, abọ rẹ ugboma na evo ra mrẹ nẹ ifiemu ọvuọvo-o a mrẹ aye-en e se ruẹ emuọvo-o,

²³ abọ ọvo rẹ oma na rẹ avwanre roro nẹ i fo ọghọ-ọ eyẹ e muẹ ọghọ rode kẹ, kugbe abọ ọvo rẹ oma na re nẹsua-a keye a vwẹ obọ tete

²⁴ yẹ ẹbẹre ra mrẹ na sa guọnọ ọtiọye na-a. Ẹkẹvuọvo Ọghẹnẹ ru ugboma na ọtiọye, ra vwẹ ọghọ rode vwọ kẹ abọ re nẹ fanrhiẹ,

²⁵ rere ozighi vwo jẹ ugboma na ẹdia, ẹkẹvuọvo rere ekuakua na sa vwẹ ẹro te ohwohwo abavo.

²⁶ Ọ da dianẹ ekuakua ọvo reoja, ayen ejobi ke reoja kugbe; e de mu ọghọ kẹ ekuakua ọvo, ayen ejobi kẹ ghọghọ kugbe.

²⁷ Asakiephana ovwan hẹ ugboma ri Kristi ohwo ọvuọvo hẹ ekuakua rọye.

²⁸ Ẹsosuọ Ọghẹnẹ da vwẹ iyinkọn mu vwẹ evun rẹ ishọshi rọye, ọrivẹ emraro, ọrerha iyono, o ki te iruiruo rẹ igbunu, o ki te isivwi ihwo, ichuko, isun isuesun ihwo re je ephẹrẹ sansan.

²⁹ Ayen ejobi dia iyinkọn re? Ayen ejobi dia emraro re? Ayen ejobi dia iyono re? Ayen ejobi ru iruo rẹ igbunu re?

³⁰ Ayen ejobi vwo okẹ rẹ esivwo re? Ayen ejobi jẹ ephẹrẹ re? Ayen ejobi fan otọ rẹ ephẹrẹ re?

³¹ Vwẹ oma kpotọ guọnọ okẹ ro me kpenu. Mi che dje idjerhe ro me yovwi kẹ wẹ.