1 Kọrẹnt 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ovwan vwẹ ẹro kere uvwe, kirobo ri mi vwo kere Kristi.

Uyovwi Ẹpharọ rẹ Eya vwẹ Uwevwi rẹ Ẹga

² Mi jiri ovwan fikiridie ovwan karohọ ovwẹ vwi kemu kemu mrẹmrẹ ovwan ke rha yọnrọn uruemu ri mi dje kẹ ovwan.

³ Ẹkẹvuọvo mi jẹ ovwan riẹn nẹ Kristi hẹ uyovwi rẹ ọshare kọshare, uyovwi rẹ ayen ke rha vwẹ ọshare rọye, uyovwi ri Kristi ke rha vwẹ Ọghẹnẹ.

⁴ Ọshare kọshare rọ nẹ ẹrhovwo eyẹ ọ mraro ro de rhurhu uyovwi rọye yọ vwẹ ọghọ kẹ uyovwi rọye-e,

⁵ ẹkẹvuọvo aye kaye rọ nẹ ẹrhovwo eyẹ ọ mraro ro de rhie uyovwi rọye phihọ yọ vwẹ ọghọ kẹ uyovwi rọye-e ọnana vẹ uyovwi ra wanre abavo.

⁶ Kidie aye rha phare uyovwi rọye-e, e gbe jo bru ẹto rọye kufia, ẹkẹvuọvo ọ da dianẹ ọ vẹ omaẹvuọ kẹ aye rọ vwọ wanre ẹto eyẹ vwo bro, e gbe jọ pharọ.

⁷ Kidie o fori rere ọshare phare uyovwi rọye-e, rọ vwọ hẹ uhoho vẹ urinrin rẹ Ọghẹnẹ na; ẹkẹvuọvo aye hẹ urinrin rẹ ọshare.

⁸ (Kidie a ma oshare nẹ oma rẹ aye rhe-e, ẹkẹvuọvo aye a ma nẹ oma rẹ ọshare rhe.

⁹ Ọ dianẹ a je ma ọshare kẹ aye-e, ẹkẹvuọvo aye a ma kẹ ọshare).

¹⁰ Kọye sorọ rẹ aye vwọ phare nyovwi rọye, fiki rẹ emakashe na.

¹¹ (Dede na, vwẹ evun rẹ Ọrovwohwo aye ọvo sa dia kẹ omobọ rọye-e eyẹ ọshare ọvo je sa dia kẹ omobọ rọye-e;

¹² kidie obo ra ma aye nẹ oma rẹ ọshare rhe na, ọtiọye na aye kọye rhe vwiẹ ọshare. Yẹemu na ejobi obọ rẹ Ọghẹnẹ i nurhe).

¹³ Ovwan ọvo brorhiẹ na kẹ oma rẹ ovwan; o fori vwọ kẹ aye rọ vwọ nẹ ẹrhovwo kẹ Ọghẹnẹ vẹ uyovwi ro rhie phihọ?

¹⁴ Uruemu rẹ akpọ na rhe yono ovwan nẹ ẹto ogrogro fo ọshare-e,

¹⁵ ẹkẹvuọvo ẹto rẹ aye de gro kẹ ofovwe kẹ? Kidie a vwẹ ẹto ogrogro kẹ rere ọ vwọ sẹ.

¹⁶ Ọ da dianẹ ohwo guọnọ aphro, avwanre rhe vughe uruemu ọfa eyẹ ishọshi rẹ Ọghẹnẹ-ẹ.

Ekan vwẹ evun rẹ Emu rẹ Ọvwọnvwọn rẹ Ọrovwohwo na

¹⁷ Ẹkẹvuọvo vwẹ uyono ri mi che dje na mi jiri ovwa-an, fikiridie rẹ ovwan da rhe ghwẹ koko ọ gbe dia ọ rẹ erhuvwu-u ẹkẹvuọvo kẹ umiovwo.

¹⁸ Kidie, vwẹ ẹsosuọ ejobi, rẹ ovwan da ghwẹ koko vwẹ ishọshi, mi nyo nẹ ohẹriẹ hẹ ohri rẹ ovwan; mi sere gbuyota emerha,

¹⁹ kidie ohẹriẹ ghine sa dia ohri rẹ ovwan rere e vwo se vughe omamọ rẹ ihwo rẹ hẹ ohri rẹ ovwan.

²⁰ Ọke rẹ ovwan da ghwẹ koko, ọ ghwa dia emu rẹ ovwọnvwọn rẹ Ọrovwohwo ovwan ghwa ria-a.

²¹ Kidie rẹ ovwan da ria na, dohwo demu rọye re gba ria, yẹ owẹvwe hwe ọvo yẹ udi rhe muẹ ọfa.

²² Die! Ovwan vwo uwevwi ra da da ra da ria-a? Eyẹ kẹ ovwan jẹ ishọshi rẹ Ọghẹnẹ fia wa me rha phọphọ otu re mrẹ ria-a? Kidie me ta kẹ ovwan? Ki mi jiri ovwan vwẹ ọnana? Ejo vwo, mi se jiri ovwa-an.

Evwomuo rẹ Emu rẹ Ovwọnvwọn rẹ Ọrovwohwo na

²³ Kidie obo re me rẹyo miẹ Ọrovwohwo ọye me vwọ kẹ ovwan na, nẹ Ọrovwohwo Jesu vwẹ ason ra shẹrẹ na ọ da reyọ ikara,

²⁴ rẹ ọ vwọ kpẹvwẹ nu, o de bro, ọ da ta, Ọnana hẹ oma mẹ ra vwọ kẹ wẹ. Ru ọnana vwọ karohọ ovwẹ.

²⁵ Eriyin ọ je reyọ uko, ra vwọ re emu rẹ ovwọnvwọn na nu, ọ da ta, Ọnana ọbara mẹ rẹ ọphọ ọkpokpọ na. Ru ọnana, kọke kọke rẹ ovwan darọ, wa karohọ ovwẹ.

²⁶ Kidie kọke rẹ ovwan re ikara nana rẹ ovwan da uko na, ovwan ghwoghwo ughwu rẹ Ọrovwohwo bẹsiẹ rọ vwọ rhe.

Ẹriọ rẹ Emu rẹ Ovwọnvwọn rẹ Ọrovwohwo na vwẹ ijefọ

²⁷ Fiki rẹ ọtiọye na, kohwo kohwo, rọ re ikara na rọ da da vwẹ uko rẹ Ọrovwohwo na vwẹ idjerhe ro je fo kọ reabe ro vwo gbe ẹgua rẹ oma vẹ obara rẹ Ọrovwohwo na.

²⁸ Gbe jẹn ohwo davwe oma rọye ni tavwe, rọ ke re ikara na rọ ke da vwẹ uko na.

²⁹ Kidie ohwo rọ rere rọ dare yo vughe oma na-a yọ re yọ da ẹdjeguo kẹ oma rọye.

³⁰ Kọye sorọ rẹ ihwo buebu vwọ epha hwrọghọ hwrọghọ vẹ ọga, rẹ evo vwọ tobọ ghwu.

³¹ Ẹkẹvuọvo avwanre da vwẹ oma rẹ avwanre guẹdjọ, e gbi rhe bruhwe avwanre-e.

³² Ẹkẹvuọvo Ọrovwohwo da vwẹ avwanre guẹdjọ, ka fa avwanre rere e vwo jẹ avwanre ebruhwe kugbe akpọ na.

³³ Ọtiọye na, imoni mẹ, ọke rẹ ovwan de rhi koko rẹ ovwan da cha re emu, wa hẹrhẹ ohwohwo–

³⁴ ọ da dianẹ owẹvwe hwe ohwo, e jẹn ọ re emu vwẹ obo uwevwi tavwe –ọ rha dia ọtiọye-e ọ ghwe koko rẹ ovwan da rha dia ọ rẹ obruhwe. Vwọ kpahe obo ri chekọ me da rhe ki mi djẹ ayen kẹ ovwan.