1 Ivie 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Solomọn vẹ Ovie Hiram re Ọphọ

¹ Asakiephana Hiram ovie ri Taya de ji idibo rọye bru Solomọn, vwẹ ọke ro vwo nyo nẹ e vwiro mu ovie vwẹ ẹdia rẹ ọsẹ rọye; kidie Hiram guọnọ Devid vwẹ ọke ejobi.

² Solomọn da vuẹ uwevwi rhe Hiram,

³ Wọ riẹnre nẹ Devid ọsẹ mẹ sa bọn uwevwi kẹ odẹ rẹ Ọrovwohwo Ọghẹnẹ rọye-e fiki rẹ ofovwi rẹ ivwighrẹ rọye re gba riariẹ phihọ vwọ suọ, bẹsiẹ rẹ Ọrovwohwo vwọ vwẹ ivwighrẹ rọye hwa otọ kẹ chiyi.

⁴ Ẹkẹvuọvo asakiephana Ọrovwohwo Ọghẹnẹ mẹ kẹ vwẹ omaerovwo vwi kabọ kabọ; o vwo ukọn ọvuọvo-o eyẹ uyovwi emiovwo-o.

⁵ Ọtiọye na ke me jẹ iroro nẹ me bon uwevwi kẹ odẹ rẹ Ọrovwohwo Ọghẹnẹ mẹ, kirobo rẹ Ọrovwohwo ta kẹ Devid ọsẹ mẹ, ọmọ wẹn, ri mi che vwo tidia enu rẹ ekete wẹn vwẹ asan wo nuru, kọye cha bọn uwevwi kẹ odẹ mẹ.

⁶ Asakiephana gbe ji urhi rere e she igedu ri Lebanọn rhe vwe; idibo me ke cha vwọ ba idibo wẹn, ke me hwa osa kẹ idibo wẹn kirobo ru wo bruru; kidie wọ riẹnre nẹ ovwo ohwo ọvuọvo vwẹ ohri rẹ avwanre re riẹn obo re she igedu kerẹ ihwo ri Sidọn na-a.

⁷ Ọke ri Hiram vwo nyo ovuẹ ri Solomọn, oma da vwerhọ gangan, ọ da ta, Ebruba kẹ Ọrovwohwo nonẹ, ro vwẹ ọmọ Ọghwanghwanre kẹ Devid rọ re vwẹ enu rẹ ihwo ride nana.

⁸ Hiram de ji ohwo bru Solomọn, tanẹ, Mi nyo ovuẹ ru wọ vuẹ rhe vwe; me choma mi vwo ru obo ru wọ guọnọre vwẹ oma rẹ ota re igedu na kugbe owangha.

⁹ Idibo me ke cha ghwẹ ayen nẹ Lebanọn rhe rhi te abadi; ke si ayen rhi te asan re wọ guọnọre, kẹ etiyin a da bẹrẹ ayen, vwo rhe we; obo wo ru ku wọ ghwẹ ẹmuọre rhe ekru mẹ.

¹⁰ Ọtiọye Hiram da ghwẹ uche igedu kugbe owangha ri Solomọn guọnọre vwo rhe,

¹¹ Solomọn da rha ghwẹ ibo rẹ eka uriori uje rhe Hiram rọ dia emuọre kẹ ekru rọye, kugbe ewara rẹ evwri re cheri uriori uje. Kukpe kukpe kọye Solomọn vwọ vwẹ enana kẹ Hiram.

¹² Ọrovwohwo da vwẹ aghwanre kẹ Solomọn, kirobo ro ve kẹ; ufuoma da dia vwẹ uvwre ri Hiram vi Solomọn; ayen ivẹ na de vi oma rarọ.

¹³ Ovie Solomọn de bru oko vwọ gba ihwo rẹ Izrẹl vwo ru iruo; ihwo rọ gba vwo ru iruo na da dia uriori ọgban.

¹⁴ O de ji ayen kpo Lebanọn, uriori ihwe re sa ẹdẹ rẹ owian; ayen me dia Lebanọn emeranvwe ọvo ayen me rha dia uwevwi emeranvwe ivẹ; Adoniram kọye re gba ihwo na vwo ruẹ iruo.

¹⁵ Solomọn ji vwo ihwo uriori ujorha gbe ihwe re ghwa oghwa kugbe ihwo uriori ujọne ri she eragha nẹ igbenu rẹ orho na cha

¹⁶ je vwọ ba inotu ri Solomọn uriori erha re vwẹ ẹro te iruo na, re vwo mu vwẹ enu rẹ ihwo ri ruẹ iruo na,

¹⁷ Ọke rẹ ovie da ta, kẹ ayen she eragha ride, re ghare re a vwọ ma ichivwo rẹ uwevwi na.

¹⁸ Ọtiọye e bọn uwevwi ri Solomọn vẹ e bọn uwevwi ri Hiram kugbe ihwo ri Gebal de she eragha na ayen da rhuẹrẹ igedu kugbe eragha na rere a vwọ bọn uwevwi na.