1 Ivie 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Solomọn rọvwọ ọmọtẹ ri Fero

¹ Solomọn vẹ ovie rẹ Ijipt de bru ọgọ kugbe; ọda vwẹ ọmọtẹ ri Fero vwọ rọvwọ, ọ da reyọ vwọ rhe orere ri Devid, bẹsiẹ rọ vwọ tọn uwevwi rọye phihọ nu kugbe uwevwi rẹ Ọrovwohwo kugbe igbẹhẹ, riariẹ Jerusalẹm phihọ.

² Yẹ, ihwo na ji ze izobo vwẹ asan ro kpenu na, fikiridie ya je tọn uwevwi phihọ kẹ odẹ Ọrovwohwo na-a.

Solomọn nọ ekpẹn rẹ Aghwanre

³ Solomọn guọnọ Ọrovwohwo, ọ da yan nene iji ri Devid ọsẹ rọye; jẹ, o ji ze izobo, ọ je torhẹ insẹns vwẹ asan ri kpenu na.

⁴ Ovie na de kpo Gibeọn re ze izobo vwẹ etiyin, kidie ọyena asan rode ro kpenu. Solomọn ze izobo rẹ ẹtorhẹ uriori vwẹ enu rẹ agbada yena.

⁵ Vwi Gibeọn Ọrovwohwo da vwẹ oma phia kẹ Solomọn vwẹ evwerhẹ, vwẹ ason; Ọghẹnẹ da ta, Nọ obo re me vwọ kẹ wẹ.

⁶ Solomọn da ta, Wọ nabọ vwẹ ẹguọnọ ro jẹ rhẹriẹ kẹ odibo wẹn Devid ọsẹ mẹ, fikiridie ọ yan nene uwe vwẹ esegbuyota, ọvwata kugbe udu esiri ro vwo kpahe owẹ. wo de ji vwo ẹguọnọ ro jẹ rhẹriẹ rode na kẹ, wọ da vwẹ ọmọ kẹ rere o tidia vwẹ ekete rọye kirobo rọ epha nonẹ na.

⁷ Asakiephana, E Ọrovwohwo Ọghẹnẹ mẹ, wọ vwẹ odibo wẹ mu ovie vwẹ asan ri Devid ọsẹ mẹ nuru, yi dede na mẹvwẹ omotete; me riẹn obo ra rọ otafe eyẹ obo ra ro uwevwi-i.

⁸ Odibo wẹn ọ hẹ uherevie rẹ ihwo re wọ jẹreyọ, ihwo buebu, re je se kere kidie urogho.

⁹ Fiki ọtiọye na gba vwẹ erhi rẹ ẹruọ vwọ kẹ odibo wẹn ro vwo sun ihwo wẹn, rere mi se vwo vughe emu esiri vẹ emu umwemwu; kono se sun ihwo ibuebu wẹn nana?

¹⁰ O de je Ọrovwohwo ri Solomọn vwọ nọ ọnana.

¹¹ Ọghẹnẹ da ta kẹ, Fikiridie wọ nọ ọnana, wọ rha nọ kẹ oma wẹn otọnvwe vẹ efe eyẹ arhọ rẹ ivwighrẹ wẹ-ẹn, ẹkẹvuọvo ẹruọ wọ nọ kẹ oma re wo vwo vughe obo ri shephihọ,

¹² nighe, asakiephana ki mi ru kirobo rẹ ota wẹn epha. Nighe, Me kẹ wẹ aghwanre vẹ udu rẹ evughe, ọtiọye na a mrẹ ọkpọ wẹ rọ ka obaro kẹ wẹ-ẹ eyẹ ọkpọ wẹ rọ ka obuko kẹ wẹ-ẹ.

¹³ Me je kẹ wẹ obo ru wọ nọre-e, te efe te ọghọ, ọtiọye na a gbe mrẹ ovie re vwo dje we-e, vwẹ ẹdẹ rẹ akpọ wẹn ejobi.

¹⁴ Ọ da dianẹ wọ yan phihọ idjerhe mẹ, re wọ da yọnrọn iji mẹ kugbe irhi mẹ, kirobo rẹ ọsẹ wẹn Devid yanre, etiyin ke Me kẹ wẹ otọnvwe.

¹⁵ Solomọn de gbunie rhọvwọ, nighe, kẹ evwerhẹ, etiyin ọ da rhe Jerusalẹm, o de rhi mudia vwẹ obaro rẹ ekpeti rẹ ọphọ rẹ Ọrovwohwo na, o de ze izobo rẹ ẹtorhẹ kugbe izobo rẹ ufuoma o de chere emu kẹ idibo rọye ejobi.

Solomọn vwẹ Aghwanre brorhiẹ

¹⁶ Etiyin igberadja ivẹ de bru ovie rhe, ayen de rhi mudia phihọ obaro rọye.

¹⁷ Aye na ọvo da ta, E, ọrovwovwe, aye nana vẹ ovwẹ re gba dia uwevwi ọvo; mi de vwiẹ ọmọ re me vẹ ọye vwọ hẹ uwevwi na.

¹⁸ Vwẹ ẹdẹ rerha ri mi vwo vwiẹ nu, aye nana de ji vwiẹ rhe; avwanre ọvo kpoi; ohwo ọfa vẹ avwanre dia uwevwi na-a, avwanre ivẹ na ọvo kpoi re hẹ uwevwi na.

¹⁹ Ọmọ rẹ aye nana de ghwu vwẹ ason, fikiridie o shevwerhẹ nyẹ.

²⁰ Ọ de vrẹn vwẹ uherevie ason, o de mu ọmọ mẹ ro shevwerhẹ kẹrẹ ovwẹ mie vwe, yẹ ọmọtẹ wẹn vwerhẹ, o de muo shevwerhẹ udu rọye, o de mu ọmọ rọye ro ghweghwu na shevwerhẹ udu mẹ.

²¹ Ọke ri mi vwo vrẹn vwẹ irhiọke nẹ me vwe evie kẹ ọmọ mẹ, nighe, kẹ o ghweghwu; ẹkẹvuọvo me vwọ nabọ fuẹrẹ vwẹ irhiọke, nighe, ọ gbe dia ọmọ ri mi vwiẹri na-a.

²² Ẹkẹvuọvo aye rivẹ na da ta, Ẹjo, ọmọ ọkpokpọ na ọ mẹ, ọmọ oghweghwu na ọye ọwẹn. Ọ rẹsosuọ na da ta, Ẹjo, ọmọ oghweghwu na ọye owẹ ọmọ ọkpokpọ na ọye ọ mẹ. Enẹ kọye ayen gun kẹ ovie.

²³ Etiyin ovie na da ta, ọvo tanẹ, ọmọ mẹ na ọkpokpọ, Ọwẹn ri ghwuru; Ọrivẹ rha tanẹ, Ẹjọ, ẹkẹvuọvo ọmọ wẹn ri ghwuru, ọmọ mẹ ọye ọkpokpọ.

²⁴ Ovie da ta, Reyọ ọlọkọ rhe vwe. Ọtiọye na a da vwẹ ọlọkọ vwo rhe ovie na.

²⁵ Ovie da ta, ghare ọmọ ọkpokpọ na ibro ivẹ, wọ vwẹ uuro kẹ ọvo, wọ rha vwẹ ubro kẹ ọrivẹ.

²⁶ Etiyin aye rẹ ọmọ rọye hẹ ọkpokpọ na da ta kẹ ovie, fikiridie oma rẹ rinrio fiki rẹ ọmọ rọye na, E, ọrovwovwe vwẹ ọmọ ọkpokpọ na kẹ, wo je hwe kaka-a. Ẹkẹvuọvo ọrivẹ da ta, Mi vwo vwọ-ọ, o ji vwo vwọ-ọ; gharọ.

²⁷ Etiyin ovie da kpahe ọ da ta, Vwẹ ọmọ ọkpokpọ na kẹ aye rẹsosuọ na, wo hwe kaka-a; ọye oni rọye.

²⁸ Izrẹl ejobi de nyo orhiẹn rẹ ovie bruru na; udidi rẹ ovie de mu ayen, fikiridie ayen mrẹ vughe nẹ aghwanre rẹ Ọghẹnẹ rhere, rere o vwo bru orhiẹn rẹ ọsoso.