Sofonías 2 - Bible in Tzeltal de Oxchuc y Tenejapa

¹ Ja'ex ants-winiquetic te ma'yuc aq'uexlalic, tsoba abaic, jun xawac' abaic,

² te bit'il ma to ya awich'ic ch'ojel bael jichuc ac te jun nax c'aal ya xch'ay ta jc'axele; te bit'il ma to xjul ta atojolic te sc'aal yilimba te Cajwaltique; te bit'il ma to xc'ot ta atojolic te sc'aalelal yilimba te Cajwaltique.

³ Leaic Cajwaltic ta apisilic te ja'ex te peq'uelex ta balumilal, mach'aex ach'uunejbeyic te smandale. Toj xawac' abaic soc pejc'ana abaic, te ayuc bit'il ya ataic canantayel a te sc'aalelal yilimba te Cajwaltique.

Castigo ya yich'ic nacionetic

⁴ Te lum Gaza, jochol taquin q'uinal ya xjil; te Ascalón, jochol ya xjil. Ta c'aaleltic ya yich' ch'ojel loq'uel te mach'atic nainemic ta Asdod; te mach'atic ayic ta Ecrón ya me yich'ic bulel c'oem.

⁵ ¡Ya me awil awocolic ants-winiquetic te talemex ta Creta te nainemex ta sti'il mar! Dios ya yalbeyex ac'oplalic ta scontroinbelex: —Canaán, slumalat filisteoetic, ya me jlajinat soc ma'yuc mach'a ya quijq'uitaybat.

⁶ Te lumq'uinal ta sti'il mar ya me xc'atp'uj jilel ta aquiltic, tey me ya stsob sbaic a te jcanan-chijetique, soc corraletic ya xc'ot yu'un chijetic —xi' te Diose.

⁷ Te mach'atic cuxulic xan ta Judá, ya me x'och ta sc'abic te lumq'uinale, te c'alal ya xtal te Cajwaltic Dios te ya yac'bey coltayel soc te ya slecubtes te bit'il ayique. Tey me ya xbajt'ic soc a te xchijique, soc ta ajc'ubal ya me xcux yo'tanic ta bay nanatic yu'un Ascalón.

^8-9 Ja' tulan ya yalbey sc'oplal Cajwaltic te Spisil ya xju' yu'une, te Dios yu'un Israel: —Caiyojbey stojol yixta-c'opic te moabaetic, soc te sbol-c'opic te amonetique. Melel ja' la sbolc'optaybonic te ants-winiquetic cu'un, soc muc' la yac' sbaic ta bay sq'uinalic. Jich yu'un, ya cal ta jamal te bit'il cuxul Dioson jtuquel, te Moab jich me ya xc'ot te bit'il Sodoma, soc te mach'atic ayic ta Amón jich me ya xjilic te bit'il Gomorra. Ya me xc'atp'uj ta ch'ixtiquil te sq'uinalique, sloq'uib me ats'am ya xc'otic, sbajt'el q'uinal ma'yuc yutsil ya xjil ta jc'axel. Te mach'atic cuxulic xan ta bay lum cu'un ya me xba spojbeyic sbiluc, soc ya me yich'bey jilel te sq'uinalique —xi'.

¹⁰ Jich me ya x'ac'bot stojic te Moab soc Amón te bit'il la yixtac'optayic te lum yu'un Cajwaltic, te bit'il muc' la yac' sbaic ta stojol te lum yu'un Cajwaltic te Spisil ya xju' yu'une.

¹¹ Te Cajwaltic xiweltic nax me sba ta stojolic. Ya me sjin spisil te lotil diosetic ta lumq'uinale; soc ja' me ya yich' ch'uunel yu'un spisil ants-winiquetic ta bayuc, asta te mach'atic ayic ta q'uinal joytaybil ta mar.

¹² Ja' nix jichex mach'a ayex ta Etiopía, ya me x'ejch'enajex jilel yu'un spuñal te Cajwaltique.

¹³ Soc ya me stoy bael sc'ab ta scontroinel ta norte ta swenta slajinel te Asiria. Tan ya xjil te lum Nínive, ya xc'atp'uj ta jochol taquin q'uinal.

¹⁴ Te ste'el snaic ya me yich'ic bots'el loq'uel; tey me ya smejts'an sbaic a te chijetic soc spisil ja'mal chambalametic. Te pelicano soc erizo mutetic tey me ya xlujch'ajic ta wayel ta sba te oyetique; te jojetic tey me ya xc'opojic a ta bay ventanaeticsoc ta bay ti'nailetic.

¹⁵ Ja' te lum te nojel toybail ta yo'tan te la yich' sbaic ta muq'ue, te la yal te yajwal te ma'yuc mach'a ya xpajot yu'un ta spamal balumilal. Ta ora to tan a jilix, soc c'atp'ujix ta xch'en jti'awal chambalametic. Jayebuc mach'a ya xc'axic tey a ya xuxubajic yu'un, soc ya spasbeyic seña ta slabanel.