Rut 4 - Bible in Tzeltal de Oxchuc y Tenejapa

Nujbin Booz soc Rut

¹ Te Booz ba snajc'an sba ta yochibal lum, yu'un tey ya stsob sbaic a te winiquetique. Jich yorail c'ax tel te sts'umbal te anima smamlal Noemí, te la yalbey sc'oplal Booz. Albot yu'un te Booz: —Aiya awaiy stojol, li' xtalat to, la', naclan —la yut. Jich tal snajc'an sba.

² Te Booz la yic' tel lajuntul mamaletic yu'un te lume. La yalbey te ya snajc'an sbaique. C'alal la snajc'an sba,

³ te Booz la yalbey te winique: —Te Noemí, te sujt'ix tel ta Moab, ya sc'an xchon te sq'uinal te la swentain soc te anima quermanotic Elimelec.

⁴ Ya jc'an cac'bat ana' stojol: teme ya ac'an amane, ya me apas ta stojol in testigoetic to soc te mamaletic yu'un te jlumaltique. Melel mero jun ame'-atat soc te anima Elimelec; jich yu'un, ja'at ay ta awenta smanel te sq'uinale. Yan teme ma xju' awu'une, albon ta jamal, yu'un jo'on me c'otix ta jwenta smanel abi —xi'. Te yermano la sjac': —Ya jmanbey —xi'.

⁵ Jich yu'un te Booz la yalbey xan ta lec te bit'il ay sc'oplale: —Teme ya amanbey sq'uinal Noemí, ya me awic' te Rut te me'ba ants talem ta Moab, swenta yu'un jich ma xch'ay sts'umbal te anima smamlale —xi'.

⁶ C'alal la yaiy stojol te yermanoe, la sjac': —Teme jich ya sc'an, ma xju' cu'un smanel jiche, teme ayuc bit'il ya yac'bon jwocol ta patil soc te jbiluque. Jich yu'un teme ya ac'an aman te ja'ate, pasa me, ya jc'asesbat ta awenta —xi'.

⁷ Ta namey jich ay te costumbre yu'un te israeletic: te bi ora ya yijq'uitay sderecho te mach'a sc'oplal ya yic' yinamin te me'ba ants yu'un te yermano, o te bi ora ya yich' chonel o manel q'uinale, te mach'a ya yijq'uitay sderecho ya sloq'ues xanab soc ya yac'bey ta sc'ab te yane.

⁸ Jich yu'un te winic la sloq'ues xanab soc la yac'bey ta sc'ab Booz, jich la yalbey: —Manbeya te ja'ate —xi'.

⁹ Te Booz la yalbey te mamaletic soc spisil te mach'atic tey ayic a: —Ta apisilic ja'ex me testigoex cu'un te ya jmanbey Noemí te sq'uinal jilel soc te Elimelec, Quelión soc Mahlón.

¹⁰ Soc ja'ex testigoex yu'un te ya quic' quinamin te Rut, te me'ba ants talem ta Moab. Jich ma xch'ay sbiil ta q'uinal te anima smamlal te Mahlón sbiile. Ma xch'ay sbiil ta stojol te slumale, soc ma'yuc bi ora ya xch'ay ta o'tanil yu'un. Ja'ex me testigoex cu'un —xi'.

¹¹ Te mamaletic soc spisil te mach'atic tey ayic a, la sjaq'uic: —Melel nix a, jo'otic testigootic awu'un. Te ants te ya x'och ta ana, jichuc me c'otuc yu'un Cajwaltic te bit'il Raquel soc Lea, te ja'ic jts'umbalinejtic jpisiltic jo'otic te israelotique. Ayuc me awip ta Efrata, muc'uc me ac'oplal ta Belén.

¹² Te Cajwaltic ac'a yac'bat bayal anich'nab soc te antse, tsoboluc me ya xc'oat soc te anich'nabe, jich bit'il c'ot te Fares te yal-snich'an te Judá soc Tamar —xiic.

¹³ Jich nujbin Booz soc Rut, la yic' bael ta sna. Te Cajwaltic la yac'bey bendición te ya x'ayin ch'in alal yu'unic.

¹⁴ Te antsetic la yalbeyic te Noemí: —Bin nax yutsil te Cajwaltic, te melel ac'botix yal te awalib, ja' me ya scanantayat. Ayuc bit'il muc' ya xc'ot ta Israel.

¹⁵ Ja' me ya smuc'tesbat awo'tan, soc ja' me ya smac'linat te c'alal me'elatixe. Melel ja' yal te awalib te bin nax yo'tan awu'une, te jich c'oem yutsilal ta atojol te bit'il ayuc bayal awalataque —xiic.

¹⁶ Te Noemí la yic' te ch'in alale, la spet soc la swentain ta xch'ijtesel.

¹⁷ C'alal la yil te spat-xujq'ue, jich la yalic: —¡Ayinix alal yu'un te Noemí! —xiic. La slebeyic sbiil, Obed c'ot yu'unic. Ta patil ja' stat te Isaí, soc ja' smam te David.

Sts'umbal tel David

¹⁸ Te sts'umbal coel tel Fares ja' te

¹⁹ Hezrón, Ram,

²⁰ Aminadab, Naasón,

²¹ Salmón, Booz, ja' te stat

²² Obed, te ja' stat Isaí, te ja' stat David.