Proverbios 3 - Bible in Tzeltal de Oxchuc y Tenejapa

Bit'il ay ta tael p'ijil-o'tanil

¹ Jnich'an, ma me xch'ay ta awo'tan te p'ijubtesel cu'une; q'ueja me ta ajol, q'ueja me ta awo'tan te mandaliletic cu'une,

² jich me najt' aworail ya xcuxinat soc bin nax me awo'tan ya xc'axat ta q'uinal.

³ Ma me xawijq'uitay te c'uxul-o'tanil soc ma me xch'ay ta awo'tan te bila smelelile; chuca me ta anuc' jichuc ualil spisil ora, ts'ibuya me ta yolil awo'tan.

⁴ Jich me lec ac'oplal ya xc'oat yu'un, soc ya me yich'at ta wenta te Diose soc te ants-winiquetique.

⁵ Ja' me ac'a smuc'ulin awo'tan ta lec te Cajwaltique, ma me ja'uc x'awich' aba ta muc' te sp'ijil ajole.

⁶ Ta spisil te bitic ya apase, ja'uc me ay ta awo'tan te Cajwaltique, ja' me ya yic'at bael ta tojil be stuquel.

⁷ Ma me jc'axeluc lom p'ij ya acuy aba; ich'a me ta muc' te Cajwaltique, ma me xawac' aba a te bila amene.

⁸ Ja' mero lequil poxil c'oem awu'un, swenta yu'un ja' me ya yac'bey yich' yip te abaq'uetale.

⁹ Ich'a me ta muc' Cajwaltic soc te ac'ulejale, ich'a ta muc' soc te sba sit awawal-ats'unub te ya xloc' awu'une;

¹⁰ jich me mero nojel ya xjil a te stsobjibal soc te yawil te vino awu'une.

¹¹ Jnich'an, ma me xach'ay te tojtesel yu'un te Cajwaltique, soc ma me x'ilinat yu'un te ya stac'uyate;

¹² melel te Cajwaltic ya stojtes te mach'a c'ux ta yo'tane, jich bit'il te tatil ya stojtes te snich'an te buen lec yo'tan yu'une.

¹³ Bin nax me yutsil te ants-winic te ya sta sp'ijil yo'tane, soc te ya x'ac'bot sp'ijil sjole;

¹⁴ melel c'ax me jich ya xtuun a te bit'il plata, soc c'axem jich ya xtuun a te bit'il oro.

¹⁵ Te p'ijil-o'tanil c'axem jich yutsil a te bit'il yutsil te perlaetique; ni ja'uc pajal soc te bila mero c'ax t'ujbil te awo'tanuc ay awu'une.

¹⁶ Ta swa'el sc'ab ya yac' najt' jcuxlejaltic, soc ta xq'uexen sc'ab ya yac' jc'ulejaltic, soc ya yac' lecubuc jc'oplaltic.

¹⁷ Mero c'ax bujts'an ta t'unel te sbe; teme tey yacat ta beel a, ayat me ta swenta lamal-o'tanil.

¹⁸ Te p'ijil-o'tanil ja' cuxlejal ta stojol te mach'a ya yich'e; bin nax me yutsilic te mach'atic ya sna' sq'uejel ta yo'tanique.

¹⁹ Te Cajwaltic ta swenta sp'ijil yo'tan la yac'bey yiptajib te balumilale; soc ta swenta sp'ijil sjol la yac' chicnajuc te ch'ulchan.

²⁰ Ta swenta sp'ijil parte la yac' te mare, soc la yac' loc'uc tel ta tocaletic te ts'ujule.

²¹ Jnich'an, spisiluc me ora tsajtaybil ya xc'opojat, ma me xch'ay awu'un te nacal-o'tanile,

²² melel ja' me sloq'uibja' c'oem te ya yac'bat acuxlejal soc ja' me ach'alil jichuc ualil.

²³ Jich me jun awo'tan ya xju' ya xbeenat ta be, ma me ayuc bi ora ya ac'ojch'in awacan.

²⁴ Te bi ora ya acux awo'tane, ma ba ya xiwat; jun me awo'tan ya xwayat.

²⁵ Ma me xiwat yu'un te lajel te ora nax ya xtale, soc ni ja'uc te jinel ya xtal ta stojolic te mach'atic amen yo'tanique;

²⁶ melel ja' me ya yac'bat smuc'ul awo'tan te Cajwaltic, ma me xyac'at te ya x'ochat ta pejts'e.

²⁷ Teme ay mach'a ya yal: “Na'a yo'bolil jbajtic”, teme xi' ta atojole, na'beya me yo'bolil sba, melel ya me xju' awu'un spasel.

²⁸ “Pajel to ya jcoltayat”, ma me x'awut, melel ya xju' awu'un te ya apas yo'tic nixe.

²⁹ Ma me ayuc bitic amen xachap ta stojol te mach'a jun yo'tan ta atojole.

³⁰ Ma me ayuc mach'a xapas c'op soc te ma'yuc swentaile.

³¹ Ma me xbic'taj awo'tan yu'un spasel te bila ya spas te mach'a ma tojuc yo'tane, soc ma me xanopbey te yat'elique.

³² Melel ilaybilic yu'un Cajwaltic stuquelic te mach'atic amen yo'tanique; pero te mach'atic lec yo'tane, ya yac'bey smuc'ul yo'tan stuquelic.

³³ Amen sc'oplal yu'un Cajwaltic te sna te mach'a amen yo'tane, yan te sna te mach'a toj yo'tane, lec sc'oplal yu'un Cajwaltic stuquel.

³⁴ Ya me xlabanotic yu'un Cajwaltic te mach'atic jlabanwanejetique; pero bayal me yutsil yo'tan ta stojol stuquelic te mach'atic peq'uel ya yac' sbaique.

³⁵ Te mach'atic ay sp'ijilique, ja' me smajt'an ya xc'otic te lec-o'tanil ta stojolique; yan te mach'atic ma sna'ic q'uinale, ja' nix me ya x'ac'otic ta na'el yu'un te amen yat'elique.