Oseas 4 - Bible in Tzeltal de Oxchuc y Tenejapa

C'op yu'un Cajwaltic ta stojol Israel

¹ Israeletic, aiya awaiyic te bila ya yal te Cajwaltique. Yalojix c'op ta stojol juez, melel ay c'op yu'un soc te mach'atic nainemic ta lumq'uinale. Yu'un te ants-winiquetic ma ba jun yo'tanic, ma ba c'ux ya yaiy sbaic, soc ma sna'beyic sba te Diose.

² Ja' nax esmajem ta alel sbiil Dios te tojol xanix, soc te lotil c'ope, milaw soc elec'. Ya yaiyic mulwej soc ya yuts'inic spat-xujc', jich ya xmilawanic ta jujun buelta.

³ Jich yu'un te lumq'uinal yaquix yoc'taybel sba c'oem; ma'yuquix yipic te mach'atic tey ayic ae, soc ma'yuquix yipic te ja'mal chambalametic soc te mutetique, ja' nix jich ya xlajic te chayetic ta mar.

Cajwaltic ya yalbey smul sacerdoteetic

⁴ Ya yal te Cajwaltique: —Ma me ayuc mach'a ya slebey smul yan, ni ma me ayuc mach'a ya yich' comel yu'un; melel te c'op cu'une, ja' nax ta atojol te sacerdoteate.

⁵ Ta c'aaleltic soc ta ajc'ubal ya xyalat; ya me xyalat soc te j'alwaneje, te ja'ate ya jinat.

⁶ Te lum cu'un ma'yuc bi sna'oj, ja' swentail te la yich'ix jinele. Sacerdote, ja'at la ach'oj bael te bila ay ta na'ele, jich yu'un te jo'on ya jch'ojat loq'uel ta sacerdoteil. Melel ya xch'ay ta awo'tan te p'ijubtesel yu'un te Dios awu'une; jich me ya xch'ay ta co'tan te ats'umbale.

⁷ “Te bit'il ja' muc' yat'elic te sacerdoteetique, c'ax to xan la sle smulic ta jtojol; jich yu'un te yich'elic ta muq'ue ya me jelbey ta q'uexlal.

⁸ Ya xcuxinic ta swenta smulic te lum cu'une; jich yu'un sc'anoj yo'tanic te yacuc sle smulic te ants-winiquetic cu'une.

⁹ Jich nix te lum te bit'il sacerdoteetic, ya cac'bey stoj ta castigo te yat'elique.

¹⁰ Melel la yijq'uitayic te abatinel cu'un te Ajwalilone. Jich yu'un ya xwe'ic, ja'uc me to, ma xnoj xch'ujt'ic yu'un; te ya spasic mulweje, ma ba ya xnich'najic yu'un.

Xch'uunel loc'ombaetic ta Israel

¹¹ “Te mulwej soc te yuch'el vino ya xch'ay yo'tanic yu'un.

¹² Te lum cu'un ay bila ya sjojc'obeyic te yajcananic te spasojic ta te'; ta swenta snabate'ic ya sta ta sc'opic te sujt'ibe. U'uninbilic yu'un mulwej te lum cu'une, jich yu'un st'unojic nix jowil beetic a. Te ya spasic mulweje, jich ya yijq'uitayonic te Dioson yu'unique.

¹³ Ta bay sba toyol witsetic soc ta ch'in witsetic ya xchiq'uic pom tey a soc ya yac'beyic milbil majt'anil. Soc ja' nix ya spasic ta bay buen axinal yu'un te c'antulanetic, álamoetic soc te jijte'etique. Jich yu'un la spasiquix mulwej te awantsil-nich'anique, soc nix te awalibique.

¹⁴ Ja'uc me to, ma ba ya cac'bey castigo te awantsil-nich'nabic te yac'oj sbaic ta jmulawil ants, ni ja'uc te awalibic te ya yaiyic mulweje. Melel te ja'exe ya xbaex soc te jmulawil antsetique; ya ajoin ta yaq'uel milbil majt'anil te jich ya ach'uunic awajcananique. Jich ya xch'ay bael te lum te ma'yuc bi ya sna'e.

¹⁵ “Teme ya apas mulwej ja'at, Israel; ja'uc me to, te manchuc ya sle smul stuquel te Judá. Ma me xbaex ta Gilgal te ja'exe, ni ma me xmoat bael ta Bet-avén, ni ma me x'ata ta alel te cuxul Diose.

¹⁶ Te Israel toyol yac'oj sbaic, jich te bit'il wacax te ma mansubenuque. ¿Ya bal scanantay ta bay t'ujbil aquiltic te Cajwaltique? ¿Pajal bal ya yil soc te bit'il ch'in chijetique?

^17-18 Te Efraín yac'oj sba ta xch'uunel te yajcanane. Spisilic jich yalic te bit'il tsobol jyacubeletique. Ta jujun buelta te ya spasic mulwej, ja' lec ya yaiyic te q'uexlale, ma ja'uc lec ya yaiyic te bila lec ta pasele.

¹⁹ Te iq'ue la yic' bael ta xic' c'oem, ya me xq'uexawic yu'un te yajcananique.