Oseas 3 - Bible in Tzeltal de Oxchuc y Tenejapa

Oseas soc jmulawil ants

¹ Te Cajwaltic la yalbon xan: —Baan, c'uxuc me ta awo'tan jtul ants te mulanbil yu'un yan winic, te mero mulawil ants stuquele. Jich me c'ux ta co'tan te israeletic jo'on te Yajwalone, manchuc me ya xbajt'ic ta stojol te lotil diosetic, soc te ya swe'beyic pejch'anbil taquin ts'usub te ya yac'beyic smajt'anine —xi'.

² Jich yu'un la jman jtul ants swenta yu'un ya cu'unin, la jtoj jo'lajuneb ta jsejp plata soc lajuneb sjuclajunwinic (330) litro cebada.

³ La calbey: —Bayal me c'aal ya cu'uninat. Ma xapas mulwej, ma xawac' aba ta sc'ab yan winic. Ja' nix jichon uuc, jun me co'tan ya cac' jba ta atojol —la cut.

⁴ Melel te israeletic mero bayal c'aal jich nax ayic: Ma'yuc muc' ajwalil, ni ch'in ajwaliletic yu'unic, ma'yuc milbil majt'anil, ni ma'yuc tejc'anbil toneticte ch'ultesbil yu'unique, ma'yuc sc'u' sacerdoteetic, ni yajcananic ta nanatic.

⁵ Ta patil te israeletic ya sujt'ic tel, ya xtal sleic te Cajwaltic, te Dios yu'unique, soc te muc' ajwalil yu'unic, ja' te David. Ta slajibal c'aal, ya me xnoptsajic tel ta stojol te Cajwaltique, ya me yich'ic ta muc', soc bin nax me yo'tanic yu'un te lequilal ya yac' stuquele.