Números 8 - Bible in Tzeltal de Oxchuc y Tenejapa

Te bit'il ay ta tilesel c'ajq'uetic

¹ Te Cajwaltic la sc'opon Moisés, jich la yalbey:

² —Albeya te Aarón, te c'alal ya stiles te c'ajq'uetic, ac'a me yac' taluc xojobil ta yelaw te scajtijibe —xi' te Cajwaltique.

³ Te Aarón la xch'uun spasel te bila mandal albot Moisés yu'un te Cajwaltique. La stiles te c'ajq'uetic, la yac' taluc xojobil ta stojol te scajtijibe.

⁴ Te scajtijib c'ajq'uetic te pasbil ta oro, la yich' pasel ta martillo c'alal ta snactijib ja' to ta sba ta bay swolwolil xyaxal spat nichim yilele. Te Moisés la spas te scajtijib c'ajc', jich bit'il seña ac'bot yil yu'un te Cajwaltique.

La yich' ch'ultesel levitaetic

⁵ Te Cajwaltic la sc'opon Moisés, jich la yalbey:

⁶ —Parte xawac' te levitaetic ta yolilic te israeletic, soc lecubtesbeya sc'oplal.

⁷ Te bila ya sc'an pasel ta lecubtesel sc'oplal, jich ay: Te ja'at tsijts'anbeya te ja' swenta lecubtesel sc'oplale. Ta patil ac'a xjox sbaic ta navaja ta scojt'ol sbaq'uetalic, soc ac'a saq'uic te sc'u'-spaq'uique. Jich me lecuben sc'oplal ya xjilic.

⁸ Ac'a me stsaquic jcojt' toro soc jtebuc lequil harina wots'bil soc aceite ta swenta majt'anil harina, soc yan xan jcojt' toro ta swenta milbil majt'anil yu'un te mulile.

⁹ Te ja'at ya me awac' xnoptsaj te levitaetic ta Nailpac' te bay ya quich' c'oponele, soc spisilic me ya stsob sbaic tel te israeletique.

¹⁰ Ya me awac' te ya stejc'an sbaic ta jtojol te levitaetique. Te israeletic ac'a me scajanbey sc'abic ta sjolic.

¹¹ Te Aarón ya me yac' sc'ab ta jtojol ta yaq'uel te levitaetic ta swenta sjelol te israeletic, yu'un jich me ya yich' aq'uel jilel ta abatinel cu'un.

¹² Ta patil te levitaetic ya me yac' sc'abic ta sjol te toroetique. Te jcojt'e ya me yich' aq'uel ta milbil majt'anil yu'un smulic, te yane ya me yich' chiq'uel ta scojt'ol, swenta xch'ayel smulic te levitaetique.

¹³ Te ja'at ora me ya atejc'an te levitaetic ta stojol Aarón soc snich'nab, soc ya me awac'bon cu'unin ta jc'axel.

¹⁴ Jich me parte ya awaq'uix te levitaetic ta yolilic te yantic israeletic, swenta yu'un jich me cu'un ya xc'otic.

¹⁵ Ta patil ya xbajt'ic ta Nailpac' te bay ya quich' c'oponele, tey me ya yac' sbaic ta abatinel a. Jich me ya sc'an ya alecubtesbey sc'oplal te ya awac'bon ta jtojol jich bit'il majt'anil te muc' sc'oplale,

¹⁶ melel cu'unix stuquelic ta yolilic te israeletique. Te jo'on jich me c'oemix ta co'tan te ja' sjelol sba snich'anic spisil te israeletic,

¹⁷ melel ja' me cu'un spisil sba snich'anic te israeletique. Jich nix te sba yalatac te xchamsbalamique. C'alal la cac' lajuc te sba snich'anic egipcioetic, ja' la jtsa te sba snich'anic israeletique.

¹⁸ Ja'uc me to, ja' sjelol c'ot cu'un te levitaetique.

¹⁹ Jo'on la jtsa te levitaetic ta yolilic te yantic israeletic. La cac'bey ta stojol Aarón soc snich'nab, yu'un ya me swentainic abatinel ta Nailpac' te bay ya quich' c'oponele, ta swenta sjelol te israeletique. Jich me ya staic perdón te israeletic ta jtojol te Ajwalilone. Te israeletic jich ma puersauc ya xnoptsajic tel ta ch'ul awilal, soc jich ma'yuc bila amen ya xc'ot ta stojolic —xi' te Cajwaltique.

²⁰ Te Moisés, te Aarón soc spisil te lum Israel la xch'uunic spasel te bila mandal la yal Cajwaltic ta stojol Moisés ta swenta te levitaetique.

²¹ Te levitaetic la slecubtes sc'oplalic ta stojol Dios, soc la sac' sc'u'ic. Te Aarón la yac' ta stojol Cajwaltic jich bit'il majt'anil te muc' sc'oplale, la spas te bit'il ay ta mandalil yu'un ya slecubtes sc'oplal ta stojol Dios.

²² Ta patil, te levitaetic la xch'uunic spasel te bila c'ot ta swentaic ta Nailpac' te bay ya yich' c'oponel te Cajwaltique. Te Aarón soc snich'nab la swentainic yilel te levitaetique. Jich la spas soc levitaetic te bit'il mandal albot Moisés yu'un te Cajwaltique.

Te jich yipal ja'wil ya x'at'ejic te levitaetique

²³ Te Cajwaltic la sc'opon Moisés, jich la yalbey:

²⁴ —Te levitaetic ya me sjajch'ic ta abatinel ta Nailpac' ta jo'eb xcha'winic (25) ya'wilalic,

²⁵ soc ya me squejch'anic abatinel ta lajuneb yoxwinic (50) ya'wilalic.

²⁶ Ta patil chican teme ya to xju' scoltay te sjo'tac ta spasel yat'elic ta Nailpac' te bay ya quich' c'oponele, pero ma me spisiluquix ora te abatinele. Jich me ya sc'an ya achajban ta abatinel te levitaetique —xi' te Cajwaltique.