Números 7 - Bible in Tzeltal de Oxchuc y Tenejapa

Majt'anil ta swenta xch'ultesel ch'ul awilal

¹ Te bi c'aalil ju' yu'un spasel te Nailpac' Templo te Moisés, la xjax ta aceite swenta xch'ultesel spisil a te sbiluquil te ch'ul awilal soc te sbiluquil te scajtijib ta chiq'uel majt'anile.

² Te jtsobwanejetic yu'un chajbalchajp te sts'umbal Israel, ja' te mach'atic la yaiyic coltaywanej ta spasel te censo, noptsajic ta stojol te ch'ul awilal.

³ Tal yac'beyic smajt'an te Cajwaltique: waqueb carreta swenta ijc'atsil soc lajchayeb toroetic, ja' jun carreta yu'unic te che'cheb jtsobwanejetic, ja' juju-jcojt' yu'unic stuquel te toroe. Ta spisil la yaq'uic ta stojol te ch'ul awilale.

⁴ Jich yu'un te Cajwaltic la yalbey Moisés:

⁵ —Tsacbeya te carretaetic soc te toroetique. Ac'beya te levitaetic, swenta yu'un ya xtuun yu'unic ta spasel yat'elic ta Nailpac' te bay ya quich' c'oponele, ja' chican te bit'il ay te yat'elic —xi' te Cajwaltique.

⁶ Te Moisés la stsac te carretaetic soc te toroetic, la spucbey te levitaetique.

⁷ Te mach'atic sts'umbal Gersón la yich' ac'beyel cheb carreta soc chaneb toro, yu'un jich yipal te ya xtuun yu'unic te ya x'at'ejique.

⁸ Te mach'atic sts'umbal Merari la yich' ac'beyel chaneb carreta soc waxaqueb toro, ja' jich yipal te ya xtuun yu'unic ta spasel yat'elic, te wentainbilic ta spasel yu'un Itamar te snich'an sacerdote Aarón.

⁹ Yan te mach'atic sts'umbal Coat ma la yich'ic carreta stuquelic, ni toro, melel te ch'ul biluquetic ya yich'ic baele, puersa ya scajanic bael ta snejq'uelic stuquelic.

¹⁰ Te c'alal la yich'ix jaxel ta aceite swenta xch'ultesel te scajtijib ta chiq'uel majt'anil, te jtsobwanejetic ta chajbalchajp sts'umbalic la yich'beyic tel smajt'an te Cajwaltic, tey la yaq'uic ta stojol scajtijib majt'anil.

¹¹ Jich yu'un te Cajwaltic la yalbey Moisés: —Jujun c'aal yan me jtsobwanej te ya yich'bonic tel jmajt'an te bit'il ya yich' ch'ultesel te scajtijib ta chiq'uel majt'anile —xi' te Cajwaltique.

¹² Ta sbabial c'aal la yich' tel majt'anil Naasón te snich'an Aminadab, jtsobwanej yu'un sts'umbal Judá.

¹³ Te majt'anile, ja' jun muc'ul plato pasbil ta plata, jmil soc lajuneb xcha'winic xcha'bajc' (1,430) gramo te yalale; soc jun muc'ul taza te pasbil ta plata te ay lajuneb sbalunlajunwinic xcha'bajc' (770) gramo (jich ay yalal te jun gramo te bit'il chapal ta ch'ul awilal). Pajal nojelic soc lequil harina te yich'oj wots'el soc aceite ta swenta smajt'an Dios;

¹⁴ soc xan jun muc'ul cuchara pasbil ta oro te lajuneb swacwinic (110) gramo te yalale, nojel ta pom;

¹⁵ jcojt' toro; jcojt' tat chij; jcojt' chij jun ya'wilal, te ya yich' aq'uel ta spisilic ta swenta majt'anil te scojt'ol ya yich' chiq'uele;

¹⁶ jcojt' tentsun swenta milbil majt'anil yu'un te mulile;

¹⁷ soc ta slajibal, ja' milbil majt'anil ta swenta seña lamal-o'tanil: cha'cojt' toroetic, jo'cojt' tat chijetic, jo'cojt' tat tentsunetic soc jo'cojt' chijetic te jun ya'wilalique. Ja' majt'anil te la yac' Naasón te snich'an Aminadab.

¹⁸ Ta xchebal c'aal la yich' tel majt'anil Natanael te snich'an Zuar, jtsobwanej yu'un sts'umbal Isacar.

^19-23 Jich nix yipal la yac' te bit'il Naasón.

²⁴ Ta yoxebal c'aal la yich' tel majt'anil Eliab te snich'an Helón, jtsobwanej yu'un sts'umbal Zabulón.

^25-29 Jich nix yipal la yac' te bit'il te yantique.

³⁰ Ta xchanebal c'aal la yich' tel majt'anil Elisur te snich'an Sedeur, jtsobwanej yu'un sts'umbal Rubén.

^31-35 Jich nix yipal la yac' te bit'il te yantique.

³⁶ Ta yo'ebal c'aal la yich' tel majt'anil Selumiel te snich'an Zurisadai, jtsobwanej yu'un sts'umbal Simeón.

^37-41 Jich nix yipal la yac' te bit'il te yantique.

⁴² Ta swaquebal c'aal la yich' tel majt'anil Eliasaf te snich'an Reuel, jtsobwanej yu'un sts'umbal Gad.

^43-47 Jich nix yipal la yac' te bit'il te yantique.

⁴⁸ Ta sjuquebal c'aal la yich' tel majt'anil Elisama te snich'an Amiud, jtsobwanej yu'un sts'umbal Efraín.

^49-53 Jich nix yipal la yac' te bit'il te yantique.

⁵⁴ Ta swaxaquebal c'aal la yich' tel majt'anil Gamaliel te snich'an Pedasur, jtsobwanej yu'un sts'umbal Manasés.

^55-59 Jich nix yipal la yac' te bit'il te yantique.

⁶⁰ Ta sbalunebal c'aal la yich' tel majt'anil Abidán te snich'an Gedeoni, jtsobwanej yu'un sts'umbal Benjamín.

^61-65 Jich nix yipal la yac' te bit'il te yantique.

⁶⁶ Ta slajunebal c'aal la yich' tel majt'anil Ahiezer te snich'an Amisadai, jtsobwanej yu'un sts'umbal Dan.

^67-71 Jich nix yipal la yac' te bit'il te yantique.

⁷² Ta sbuluchebal c'aal la yich' tel majt'anil Pagiel te snich'an Ocrán, jtsobwanej yu'un sts'umbal Aser.

^73-77 Jich nix la yac' te bit'il te yantique.

⁷⁸ Ta slajchayebal c'aal la yac' majt'anil Ahira te snich'an Enán, jtsobwanej yu'un sts'umbal Neftalí.

^79-83 Jich nix la yac' te bit'il te yantique.

⁸⁴ Ja' jich la yich' aq'uel majt'anil te bi ora la yich' ch'ultesel te scajtijib ta chiq'uel majt'anile. Te chajbalchajp sts'umbal Israel la yaq'uic lajchayeb muc'ul platoetic pasbil ta plata, lajchayeb muc'ul tazaetic pasbil ta plata, soc lajchayeb muc'ul cucharaetic pasbil ta oro.

⁸⁵ Te jujun muc'ul plato te pasbil ta plata, jmil soc lajuneb xcha'winic xcha'bajc' (1,430) gramo te yalale. Te jujun muc'ul taza lajuneb sbalunlajunwinic xcha'bajc' (770) gramo te yalale. Ta spisil te plata te pasbil a te muc'ul platoetic soc te muc'ul tazaetic, waqueb xcha'winic ta jmil soc jbajc' (26,400) gramo, jich bit'il chapal sp'isol yalal ta ch'ul awilal.

⁸⁶ Soc ay lajchayeb muc'ul cucharaetic te pasbil ta oro, nojel ta pom, te lajuneb swacwinic (110) gramo jujun te yalale, jich bit'il chapal sp'isol yalal ta ch'ul awilal. Ta spisil te yalal oro ta muc'ul cucharaetic, jmil soc waclajunwinic (1,320) gramo.

⁸⁷ Te chambalametic te scojt'ol ya yich'ic chiq'uel, ta spisil ay lajchayeb ta jcojt' toroetic, lajchayeb tat chijetic, lajchayeb chijetic te jun ya'wilalic, soc la sjoin ta aq'uel harina. Soc ay lajchayeb tat tentsunetic ta swenta milbil majt'anil yu'un mulil.

⁸⁸ Te chambalametic ta swenta milbil majt'anil swenta seña lamal-o'tanil, ta spisil ay chaneb xcha'winic (24) ta jcojt' toroetic, oxwinic (60) tat chijetic, oxwinic (60) tat tentsunetic soc oxwinic (60) chijetic te jun ya'wilale. Ja' majt'aniletic la yich' aq'uel te bi ora la yich' ch'ultesel te scajtijib ta chiq'uel majt'anil yu'une. Ja' la yich' aq'uel te c'alal ju'ix ta jaxel ta aceite swenta ch'ultesel te scajtijib majt'anile.

⁸⁹ C'alal och bael Moisés ta Nailpac' te bay ya yich' c'oponel te Cajwaltic, te yu'un ya sc'opone, la yaiybey stojol te ya xloc' tel sc'op tey ta sba cajón yu'un trato, ta yolil sloc'omba te querubinetique.