Números 6 - Bible in Tzeltal de Oxchuc y Tenejapa

Mandaliletic ta swenta nazareoetic

¹ Te Cajwaltic la sc'opon Moisés, jich la yalbey:

² —Albeya te israeletique: “Teme ay jtul winic, o ants, te ya xchap sc'op te ya yac' sba ta abatinel cu'un te Ajwalilon, ja' te ya sc'an yac' sba ta nazareo,

³ ma me xju' ya yuch' vino, tulan uch'balil, vinagre te pasbil ta vino, ya'lel ts'usub, soc ma me xju' ya slo'bey sit ts'usub soc teme taquintesbile.

⁴ Te jich yipal c'aal te xchapoje, ma me xju' ya swe'elin te bitic swenta ts'usub, biluc me a.

⁵ Soc ma me sloq'ues stsotsil sjol, ya me yac' najt'ubuc ja' to me teme ts'acaj te jayeb c'aal te xchapoje, melel ch'ultesbil me spisil ora ta jtojol.

⁶ Te jayeb c'aal chapal yu'une, ma me xju' ya xnoptsaj ta stojol te mach'a lajeme,

⁷ manchuc me ay ya xc'ot ta pasel ta stojol stat, teme ja' te sme', sbanquil, xwix, teme yijts'in, swenta yu'un lec sc'oplal ya xjil, melel tulan me sc'oplal te ya scanantay sba ta abatinel cu'un jo'on te Ajwalilone.

⁸ Ta spisil ora te jayeb c'aal ya xjalaj te xchapoje, ch'ultesbil me cu'un.

⁹ “Teme ay mach'a ora nax ya xlaj ta sts'eel te nazareo, ma lecuc sc'oplal ya xc'ot te stsotsil sjol yac'oj ta jwenta. Jich yu'un ta sjuquebal c'aal ya me xjox loq'uel te stsotsil sjol, t'axal me ya xjil ta jc'axel, ja' me te bi c'aalil albil sc'oplal te ya yac' sba ta lecubtesel sc'oplale.

¹⁰ Ta swaxaquebal c'aal ya me yic' bael cha'cojt' stsumut, o teme cha'cojt' alal paloma, ta stojol sacerdote ta yochibal te Nailpac' te bay ya quich' c'oponele.

¹¹ Te sacerdote jcojt' me ya smilbey swenta jmajt'an yu'un te smule. Te yane ja' swenta majt'anil te scojt'ol ya yich' chiq'uele, soc ya me yich' pasel te bit'il nix ya sc'an ya yich' pasel te bit'il ay ta lecubtesel sc'oplal te la spic te mach'a lajeme. Ja' me jich c'aal a te ya xcha'yac' xan ta jwenta te stsotsil sjole.

¹² Jich me ya xcha'jajch' ta yach'il ta ajtayel te jayeb c'aal yaloj te ya yac' sba ta jwenta cu'une. Te jayebix tel c'aale, ma'yuquix ta ich'el ta wenta, melel te stsotsil sjol te yac'oj ta jwenta, ma me ba lec sc'oplal. Jich yu'un ya me yic' bael ta jtojol jo'on te Ajwalilon jcojt' tat chij te jun ya'wilal swenta milbil majt'anil yu'un te smule.

¹³ “Te bi c'aalil ya sts'acaj sc'aalelal te abatinele, te nazareo ya me sc'an xbajt' ta bay yochibal Nailpac' te bay ya quich' c'oponele.

¹⁴ Soc ya me yich' aq'uel ta jtojol, jo'on te Ajwalilon, jcojt' tat chij te jun ya'wilal te ma'yuc bila boloben ta sbaq'uetal ta swenta majt'anil te scojt'ol ya yich' chiq'uele; jcojt' me' chij te jun ya'wilal te ma'yuc bila boloben ta sbaq'uetal ta swenta milbil majt'anil yu'un te smule; soc jcojt' tat chij te ma'yuc bila boloben ta sbaq'uetal swenta milbil majt'anil ta swenta seña lamal-o'tanil.

¹⁵ Soc ya me yich' aq'uel jun ch'in moch wajetic te lec pasbil ta harina, te ma ba yich'oj levadura, te wots'bil soc aceite; soc te jayal waj te ma ba yich'oj levadura, te ja' nax tsijts'anbil ta aceite, ya me sjoin te majt'anil harina soc vino.

¹⁶ Te sacerdote ya me yac' ta jtojol te milbil majt'anil yu'un te mulil, soc te yane te scojt'ol ya yich' chiq'uele,

¹⁷ soc ya me yac' te chij te milbil majt'anil ta swenta seña lamal-o'tanil. Tey me ya sjoinic a te jun ch'in moch wajetic te ma ba yich'oj levadura, soc te majt'anil harina soc vino.

¹⁸ Te nazareo jc'axel me ya sloq'ues stsotsil sjol ta yochibal te Nailpac' te bay ya quich' c'oponel, t'axal me ya xjil. Ya me stsac te stsotsil sjol te la yac'bon ta jwenta, ya me yac' ochel ta c'ajc'. Pajal ac'a tiluc ta c'ajq'uel soc te milbil majt'anil ta swenta seña lamal-o'tanil.

¹⁹ Te sacerdote ya me stsacbey sbaquel snejq'uel te chij te tac'ajemix, jpejch' waj te ma ba yich'oj levadura te ay ta ch'in moch, soc te jayal waj te ma yich'ojuc levadura, spisil me ya yac'bey ta sc'ab te nazareo, te loq'uemix yu'un a te stsotsil sjole.

²⁰ Jich yu'un te sacerdote ya me spach ta sc'ab, soc ya me stoyilaybon ta jtojol. Te sbaq'uetal stan te chambalam te ya stoyilaybon ta jtojol uuc, soc te scub te ya yich' aq'uel ta swenta patan ta jtojole, ch'ultesbilic me soc q'uejbil ta swenta te sacerdote. Ta patil, te nazareo ya xju' ya yuch'ix te vinoe.

²¹ “Ja' mandalil ta swenta te mach'a ya xchap sc'op te ya yac' sba ta jwenta, jo'on te Ajwalilon, ja' te ya yac' sba ta nazareo, soc ja'ic te majt'aniletic cu'un te ya yaq'ue, soc ma'yuc ta ajtayel te bitic xan ya xju' ta aq'uel te majt'anile. Ya me xch'uun spasel te bila yaloj ta jamal, jich te bit'il ay sc'oplal.” Jich me ya awal ta stojolic —xi' te Cajwaltique.

Te sacerdoteetic ay ta swentaic sc'anel bendición

²² Te Cajwaltic la sc'opon Moisés, jich la yalbey:

²³ —Albeya te Aarón soc snich'nab: “Te c'alal ya ac'anbeyic bendición te israeletic, jich me ya awalic:

²⁴ ‘Te Cajwaltic ac'a yac'bat bendición, ac'a scanantayat;

²⁵ te Cajwaltic ac'a yilat soc yutsil xojobil, ac'a yac'bat awil yutsil yo'tan;

²⁶ te Cajwaltic ac'a yilat soc xc'uxul yo'tan, ac'a yac'bat lamal-o'tanil’, xaex me ta stojol te israeletique”, uta me.

²⁷ “Jich me ya awalbonic jbiil ta stojol israeletic, swenta yu'un jich me ya cac'bey bendición ta stojolic —xi' te Cajwaltique.