Números 5 - Bible in Tzeltal de Oxchuc y Tenejapa

Mandalil swenta sloq'uesel te mach'a ma lecuc sc'oplal

¹ Te Cajwaltic la sc'opon Moisés, jich la yalbey:

² —Albeya mandal te israeletic te ac'a sloq'uesic bael ta spat campamento spisilic te mach'atic ay c'a'el-chamel, soc spisilic te ay chamel ta mero sc'unil sbaq'uetal te ay spojowil ya xloq'ue, soc spisilic te ma lecuc sc'oplal yu'un te la spic animae.

³ Ac'a sloq'uesic bael ta campamento teme winiquetic o teme antsetic. Jich me lec sc'oplal ya xjil a te campamento ta bay nainemon ta yolilique —xi' te Cajwaltique.

⁴ Te israeletic la xch'uunbeyic smandal te Cajwaltic te la yac'bey Moisés, jich la sloq'uesic bael ta spat campamento te mach'atic jich ayique.

Mandalil yu'un te bitic ma lecuc ta pasel ta stojol yan

⁵ Te Cajwaltic la sc'opon Moisés, jich la yalbey:

⁶ —Albeya te israeletique: “Teme ay jtul winic o ants, te ma tojuc yo'tan ta stojol te Cajwaltic, te ya spas te bitic ma lecuc ta stojol te yane, ay me smul ya xc'ot.

⁷ Ya me sc'an ya yal ta jamal te bila la spasbey, soc ya me yac'bey sjelol soc xan jun ta yo'ebal te bit'il stojole.

⁸ Teme lajemix a te mach'a la yich' il-o'tantayel, soc teme ma'yuc mach'a mero jun nax sme'-stat soc te ya yich' te sjelole, ja' me ya xc'ot ta swenta te Cajwaltic te ya xtuun yu'un te sacerdote. Ja' ya sjoin sba soc te tat chij te ya yac' ta stojol Dios te sacerdote ta swenta stael perdón yu'un smul te mach'a la sta smule.

⁹ “Spisil majt'anil ya yac'beyic Cajwaltic te israeletic, ya me yich'beyic bael ta stojol sacerdote, ja' me yu'un ya xc'ot te sacerdote.

¹⁰ Spisil te bila ya yac'beyic yu'unin Cajwaltic, ac'a yich'ic bael ta stojol sacerdote. Ja' me yu'un ya xc'ot”, uta me —xi' te Cajwaltique.

Mandalil yu'un paichal soc yilimba winic ta scaj yinam

¹¹ Te Cajwaltic la sc'opon Moisés, jich la yalbey:

¹² —Albeya te israeletique: “Repente ay ya xc'ot ta pasel te ay ants te ma junuc yo'tan ta stojol smamlal, te ay spasoj mulil soc yan winic.

¹³ Ja'uc me to, te smamlal ma sna' stojol, melel muquen la spas te mulile, ma'yuc testigo yu'un te jich la spase, soc ma ba yac ta spasel a te taote.

¹⁴ Ja' swentail te ay ya xjajch' ta ilimba te winic ta scaj te yiname. Ja'uc me to, ay jich nax ya xjajch' ta ilimba te winique, manchuc me mero jun yo'tan te yinam te ma'yuc smule.

¹⁵ Jich ta xchebalic, te winic ya me yic' bael te yinam ta stojol sacerdote, soc ya me yich'ic bael majt'anil. Te majt'anil cheb kilo harina yu'un cebada, pero ma me smalbey aceite, soc ma me xyac'bey pom ta sba te harina, melel majt'anil ta scaj yilimba te winique, ja' majt'anil swenta te mulile.

¹⁶ “Te sacerdote ya me yac' noptsaj tel te ants, ya me stejc'an ta stojol te Cajwaltique.

¹⁷ Ya me slup jtebuc ch'ultesbil ja' ta taza te pasbil ta ajch'ale, ya me scap soc jtebuc sts'ubil slumil te ch'ul awilale.

¹⁸ Te sacerdote ya me yac' tejc'ajuc ta stojol Cajwaltic te antse, ya me stil coel te stsotsil sjol, soc ya me yac' te ya stsac ta sc'ab te majt'anil ta scaj te yilimba te smamlale. Te sacerdote ya me spach ta sc'ab te ch'aal ja' swenta castigo.

¹⁹ Ya me yac'bey yal ta jamal ta stojol Dios te antse, jich ya yalbey: ‘Teme ma'yuc apasoj mulil soc yan winic, teme ma'yuc bay ma junuc awo'tan ta stojol te amamlale, soc teme ma'yuc bay apasoj te bila ya xbolob ac'oplal a, jich me ma'yuc bila ya xju' spasbat ni jtebuc te ya awuch' te ch'aal ja' swenta castigo.

²⁰ Ja'uc me to, teme ma junuc awo'tan ta stojol te amamlale, teme apasoj mulil soc yan winic te ya sboltesbat ac'oplale,

²¹ jich yu'un te Cajwaltic ya yac'at ta seña ta stojol te lum te ya yac' sijt'uc te ach'ujt', soc ya xc'ax te awale.

²² Ja' me castigo te jich ya spasbat te ya awuch' te ja' swenta castigo’, xi' me. Te antse ac'a me sjac' te c'ope: ‘Jichuc ac'a c'otuc ta pasel’, xiuc me.

²³ “Jich yu'un te sacerdote ya me sts'ibuy te castigo te ya xc'ot ta stojol te antse, soc ya me spoc ta ch'aal ja' te bila la yich' ts'ibuyele.

²⁴ Ta patil ac'a yich' ac'beyel yuch' te antse, swenta yu'un ya me xjajch' ac'botuc ch'aubuc q'uinal yaiy yu'un.

²⁵ Te sacerdote ya me stsacbey te majt'anil yich'oj ta sc'ab te antse, ja' te majt'anil swenta ilimba, soc ya me stuch moel ta stojol te Cajwaltique. Ta ora me ya scajan ta scajtijib majt'anil.

²⁶ Soc ya me stsac jajch'el jojpuc te juch'bil cebada, ya me xchic' ta scajtijib swenta sna'jibal te mach'a ya sc'an ya yich' c'uxtayele. “Te sacerdote te c'alal lajix yo'tan yac'bel yuch' ch'aal ja' te antse,

²⁷ teme ma junuc yo'tan ta stojol smamlal, jich te ja' swenta castigo, ya me xjajch' ac'botuc ch'aubuc q'uinal yaiy yu'un, soc ya me sijt' yet'al xch'ujt' soc ma me lecuc ya x'ayin te yale. Te antse ja' me señail castigo ya x'ac'ot ta ilel yu'un te lume.

²⁸ Ja'uc me to, te ants te ma'yuc smule, ma'yuc bila ya xpasbot yu'un te ja', soc lec me ya x'ayin yalatac.

²⁹ “Ja' me mandalil yu'un te ay jich ya xc'ot ta pasel te ay ma junuc yo'tan ta stojol smamlal te antse, soc te jich ya xjajch' ta ilimba te winique.

³⁰ Yan teme ma'yuc swentail ya xjajch' ta ilimba ta stojol te yinam te winique, ya me xba stejc'an ta stojol Cajwaltic te yiname, soc te sacerdote ja' me ya spasbey ta stojol ants te bila ya yal te mandalile.

³¹ Te winic ma me ja'uc ay smul ya xc'ot; ja'uc me to, teme ja' ay smul te antse, ya me xc'ax swocol ta castigo.” Jich me ya awal ta stojolic —xi' te Cajwaltique.