Números 34 - Bible in Tzeltal de Oxchuc y Tenejapa

Mojonetic yu'un lumq'uinal

¹ Te Cajwaltic la sc'opon te Moisés, jich la yalbey:

² —Pasa ta mandal te israeletique, jich me xawalbey: “Nopolix ya x'ochex bael ta slum-sq'uinal Canaán. Ja' te lumq'uinal te ya awu'uninic, jich ay te smojonile:

³ “Te smojonil ta stojol sur, ja' sti'il ya xc'ot te jochol taquin q'uinal Zin soc te sq'uinal Edom. Ya xjajch' tel ta stojol sloq'uib c'aal, te smojonil ya xjajch' bael ta sti'il Mar Muerto ta stojol sur,

⁴ ya xbajt' xan ta stojol sur c'alal ta moel Acrabim, ya xc'ax bael ta Zin, soc ja' to ya xc'ot ta loq'uel c'alal ta Cades-barnea. Ya xcha'bajt' xan ta Hasar-adar c'alal ta Asmón,

⁵ ya xjajch' bael ta Asmón c'alal ta yocja' ta sti'il sq'uinal Egipto, tey ya xjul ta loq'uel ta Mar Mediterráneo.

⁶ “Te smojonil ta smalib c'aal, ja' sti'il te Mar Mediterráneo.

⁷ “Te smojonil ta stojol norte, jch'ix nax ya xjajch' ta Mar Mediterráneo c'alal ta wits Hor,

⁸ soc ja' to tel ta wits Hor c'alal ta ochibal yu'un Hamat, soc c'alal ta Zedad,

⁹ ya xbajt' xan c'alal ta Zifrón, soc ya xjul ta comel ta Hazar-enán.

¹⁰ “Te smojonil ta swenta sloq'uib c'aal, toj nax ya xjajch' ta Hazar-enán c'alal ta Sefam,

¹¹ ya xjajch' bael ta Sefam c'alal ta Ribla, ta stojol sloq'uib c'aal yu'un Aín. Te smojonil ya xco bael ta stojol sloq'uib c'aal yu'un te Mar Cineret,

¹² ya xcha'bajt' xan ta ti'ti'muc'ja' Jordán, ya xc'ot ta comel c'alal ta Mar Muerto. “Te mojonetic ja' me sti'il tel te alumal te ja'exe”, uta me —xi' te Cajwaltique.

Spuquel q'uinal

¹³ Te Moisés la spas ta mandal te israeletique: —Ja' me te lumq'uinal ya apucbey abaic ta swenta snumeroil ta na'el. Ja' te lumq'uinal te yaloj mandal Cajwaltic te ya yich'ic ac'beyel te balunchajp soc olil te ma ba staoj sq'uinalique.

^14-15 Melel ay cha'chajp soc olil ja' te sts'umbal Rubén soc Gad soc te olil sts'umbal Manasés, te la yich'iquix sq'uinalic ta chajbalchajp te ayix ta swentaic ta stojol sloq'uib c'aal yu'un Jordán, ta jejch' ja' yu'un lum Jericó —xi' te Moisese.

¹⁶ Te Cajwaltic la sc'opon te Moisés, jich la yalbey:

¹⁷ —Te mach'atic ya spuquic te q'uinal ta awolilic ja' me te sacerdote Eleazar soc Josué, te snich'an Nun.

¹⁸ Ja'uc me to, ic'aic xan juju-jtul jtsobwanej ta juju-jchajp ta spuquel te q'uinale.

¹⁹ Te winiquetic ya awiq'uique, ja'ic me in to: “Ta swenta sts'umbal Judá: ja' te Caleb snich'an Jefone.

²⁰ “Ta swenta sts'umbal Simeón: Semuel snich'an Amiud.

²¹ “Ta swenta sts'umbal Benjamín: Elidad snich'an Quislón.

²² “Ta swenta sts'umbal Dan: ja' te jtul jtsobwanej te Buqui sbiil te snich'an Jogli.

²³ “Ta swenta chajbalchajp snich'nab José: ja' te jtsobwanej Haniel snich'an Efod ta swenta sts'umbal Manasés;

²⁴ soc ta swenta sts'umbal Efraín: ja' te jtsobwanej Kemuel te snich'an Siftán.

²⁵ “Ta swenta sts'umbal Zabulón: ja' te jtsobwanej Elizafán, snich'an Parnac.

²⁶ “Ta swenta sts'umbal Isacar: ja' te jtsobwanej Paltiel, snich'an Azán.

²⁷ “Ta swenta sts'umbal Aser: ja' te jtsobwanej Ahiud, snich'an Selomi.

²⁸ “Ta swenta sts'umbal Neftalí: ja' te jtsobwanej Pedael, snich'an Amiud —xi' te Cajwaltique.

²⁹ Ja'ic la yac'bey ta swentaic spuquel te sq'uinal Canaán ta stojol te israeletique.