Números 27 - Bible in Tzeltal de Oxchuc y Tenejapa

Ay la yich' sq'uinal antsetic

¹ Ta sts'umbal Manasés ay jo'tul antsetic te jun nax sme'-statique, ja' te Maala, Noa, Hogla, Milca soc Tirsa. Ja' yantsil-nich'nab Zelofehad, ja'ic mero sts'umbalinej te Hefer, Galaad, Maquir, Manasés soc José.

² Ja'ic te jo'tul antsetic te yermana sbaic, bajt'ic ta bay yochibal Nailpac' te bay ya yich' c'oponel te Cajwaltique, ba sc'oponic Moisés, te sacerdote Eleazar, te jtsobwanejetic soc spisil te israeletique. Jich c'o yalbeyic:

³ —Te jtatic cu'untic laj ta jochol taquin q'uinal; ja'uc me to, ma'yuc ta swenta te jtsojp yu'un Coré te la stoy sbaic ta stojol te Cajwaltique. Laj ta scaj smul, ma'yuc queremetic jilel.

⁴ Pero ma niwan jichuc teme jc'axel ya xch'ay sbiil te jtatic te ja' nax ta scaj te ma'yuc jtuluc jilel squerem-nich'ane. Wocoluc, ac'botic jilel ta jwentatic q'uinal ta yolil yermanotac te jtatic cu'untique —xiic.

⁵ Te Moisés la yal ta stojol Cajwaltic te c'op yu'un te antsetique.

⁶ Te Cajwaltic la sjac':

⁷ —Te yantsil-nich'nab Zelofehad, melel nix yalic a. Lebeya sq'uinalic ta yolil te yermanotac te state, ac'a c'axuc ta swentaic te antsetic te sq'uinal te statique.

⁸ Soc albeya te israeletique: “Teme ay ya xlaj te ma'yuc querem jilel te snich'ane, jich yu'un te sq'uinale ac'a yu'unin jilel te yantsil-nich'ane.

⁹ Pero teme ma'yuc jtuluc yantsil-nich'ane, ja' me ya yu'uninbey jilel sq'uinal te sbanquil o yijts'in.

¹⁰ Teme ma'yuc te sbanquil o yijts'in, ja' me ya yu'unin jilel sq'uinal te yermanotac te state.

¹¹ Soc teme ma'yuc sbanquil o yijts'in te state, ja' me ya xjil ta swenta ta xchapomal te pajal sbiil soque”, uta me. Ja' me jmandal ta swenta israeletic jich te bit'il calojbat mandale —xi' te Cajwaltique.

La yich' tsael Josué ta sjelol Moisés

¹² Te Cajwaltic, jich la yalbey te Moisés: —Moan ta witstiquil Abarim, ila awil bael te q'uinal cac'ojbeyix te israeletique.

¹³ Ta patil te c'alal ya xlaj awo'tan ta yilel te q'uinale, ya me xlajat, ya me xba atsob aba soc te ame'-atat te lajemiquixe, jich bit'il te abanquil Aarón.

¹⁴ Melel ma la ach'uunbonic jmandal ja'ex te chebexe, ta bay jochol taquin q'uinal Zin te c'alal jajch'ic ta tulan c'op te lum ta jtojole. Ja'uc me to, ma la awac'onic ta ich'el ta muc' ta stojolic te c'alal la sc'an ja' yuch'ic —xi'. (Ja' ya yalbey sc'oplal te sloq'uibja' te Meriba sbiile, te ay ta Cades ta jochol taquin q'uinal Zin.)

¹⁵ Te Moisés, jich la yalbey te Cajwaltique:

^16-17 —Te Diosat te Ajwalilat cu'untique, te ya awac'bey xcuxlejal spisil te ants-winiquetic, ja'at me ya ale jtul winic te ya stejc'an sba ta stojol te lum awu'une. Ja' me ya yic' bael ta spisil ta bayuc, swenta yu'un ma jichuc nax ya xpujq'uic bael, jich bit'il chijetic te ma'yuc mach'a ya xcanantayotic yu'une —xi' te Moisese.

¹⁸ Te Cajwaltic la sjac'bey sc'op te Moisese: —Ja' te Josué te snich'an Nun te yich'oj te espíritue, ja' x'awic' ta atojol, cajanbeya ac'ab ta sjol.

¹⁹ Ya me atejc'anbey ta stojol te sacerdote Eleazar soc ta stojol te lum, ta comonsitil ac'beya swentain te lume.

²⁰ Ac'beya ta stojol oliluc te awat'ele, swenta yu'un spisil te lum Israel ya me xch'uunbeyic sc'op.

²¹ Te Josué ya me stejc'an sba ta stojol te sacerdote te Eleazar. Te Eleazar ya me yalbon spisil c'op, ya me cac'bey sujt'ib ta swenta Urim. Te Josué ja' me ya yalbey mandal ta stojol israeletic ta swenta spisil te bila ya spasique —xi'.

²² Te Moisés jich la spas te bit'il albot mandal yu'un te Cajwaltique, la yac' te ya stejc'an sba te Josué ta stojol te sacerdote Eleazar soc ta stojol spisil te lume.

²³ La scajanbey sc'ab ta sjol soc la yac'bey te yat'ele, jich bit'il pasot ta mandal te Moisés yu'un te Cajwaltique.