Números 25 - Bible in Tzeltal de Oxchuc y Tenejapa

Israeletic jajch' xch'uunic Baal-peor

¹ C'alal la snajc'an sbaic israeletic ta Sitim, jajch' sboltes sbaic soc yantsilelic te moabetique,

² melel ic'otic bael ta swe'el te milbil majt'anil la yac'beyic te lotil diosetic yu'unique. Te israeletic jich ochic ta we'el, soc la squejan sbaic ta stojol te diosetic yu'un te moabetique.

³ Jich la yac' sbaic ta xch'uunel te Baal-peor. Jich yu'un te Cajwaltic til jajch'el sc'ajc'al yo'tan ta stojol te lum Israel,

⁴ jich la yalbey te Moisés: —Tsoba spisil te jtsobwanejetic yu'un te lume, milaic ta jtojol ta comonsitil. Jich me ya xlamaj te quilimba ta stojol Israel —xi'.

⁵ Te Moisés jich la yalbey te juecetic yu'un Israel: —Ta juju-jtul te ja'exe, ya me amilic te winiquetic te pajal ats'umbal soc ta juju-jchajp, te la yac' sbaic ta xch'uunel te Baal-peor —xi'.

⁶ Ja'uc me to, ay jtul israel-winic te la yic' bael ta sna jtul madián ants ta sit Moisés soc ta sit ta spisil te israeletic te stsoboj sbaic, te yacalic ta oq'uel ta yochibal te Nailpac' te bay ya yich' c'oponel te Cajwaltique.

⁷ C'alal la yil te Finees te snich'an Eleazar, te smam te sacerdote Aarón, loc' bael ta stojol te israeletic, la stsac te slanza.

⁸ Bajt' ta spat te jtul israel-winic c'alal ta yutil sna. Tey la slowbey c'axel ta lanza xch'ujt'ic te israel-winic soc te madián antse. Jich com te tulan chamel te yacal ta lajel yu'un a te israeletique,

⁹ pero ay lajiquix chaneb xcha'winic ta jmil (24,000) a.

¹⁰ Jich yu'un te Cajwaltic la sc'opon te Moisés, jich la yalbey:

¹¹ —Te Finees la spasix te ya xlamaj te quilimba ta stojol te israeletic, melel toyol yo'tan jich bit'il toyol co'tan jo'on te bit'il jtuquel ayon ta ch'uunele. Ja' me swentail te ma ba la cac' ilinuc co'tan bayal, te jichuque jc'axel la jlajinix.

¹² Jich yu'un, albeya te ya jpas trato soc swenta lamal q'uinal,

¹³ ja' me te ya cac'bey ta swenta soc sts'umbal te at'el ta sacerdoteil ta sbajt'el q'uinal. Melel bayal jc'oplal ta yo'tan, jich la stabey perdón te israeletic —xi' te Cajwaltique.

¹⁴ Te jtul israel-winic te c'asesbot lanza ta xch'ujt'ic soc te madián antse, Zimri sbiil. Ja' snich'an Salu, ja' jtsobwanej yu'un jchajp sts'umbal Simeón.

¹⁵ Te madián antse, Cozbi sbiil, ja' yantsil-nich'an Zur te ja' jtsobwanej yu'un te jchajp sts'umbal Madián.

¹⁶ Te Cajwaltic la sc'opon te Moisés, jich la yalbey:

¹⁷ —Ac'beyaic guerra spisil ora te madianetic, tsalaic ta jyalel.

¹⁸ Melel la slo'layex te la yac'beyex ach'uun te Baal-peor, soc te la yaq'uic tel te Cozbi te yantsil-nich'an te jtsobwanej yu'un te madianetic, te laj yu'un lowel ta lanza, ja' te bi c'aalil la cac' tel te tulan chamel yu'un te la xch'uunic te Baal-peor —xi'.