Números 23 - Bible in Tzeltal de Oxchuc y Tenejapa

¹ Jich yu'un te Balaam la yalbey: —Pasbon juqueb scajtijib ta chiq'uel majt'aniletic li'to, soc chajbanbon juqueb toroetic soc juqueb tat chijetic —xi' te Balaam.

² Te Balac jich la spas te bit'il albote. Ta xchebalic la smilic jcojt' toro soc jcojt' chij ta jujun scajtijib majt'anil.

³ Te Balaam la yalbey te Balac: —Jilan li' ta bay milbil majt'anil to, te bit'il ya to xboon ta sleel Cajwaltic teme ya xtal staone. Ora me ya calbat te bila ya yac'bon jna' —xi' te Balaam. Te Balaam bajt' ta bay t'axal wits.

Balaam la sc'anbey bendición Israel

⁴ Tey la sta a te Diose. Te Balaam la yalbey: —Jchajbanej juqueb scajtijib majt'anil, ta jujun ay cac'oj ta milel jcojt' toro soc jcojt' tat chij —xi'.

⁵ Jich yu'un te Cajwaltic la yac'bey ta ye te Balaam te bila ya yale, jich la yalbey: —Sujt'an bael ta bay Balac, jich ya awalbey te bit'il nix calojbate —utot.

⁶ Te Balaam sujt' bael. Teq'uel c'o sta te Balac tey ta bay milbil majt'anil, sjoinej spisil te jtsobwanejetic yu'un te moabetique.

⁷ Jich yu'un te Balaam la yal loq'uel sc'op j'alwanej: —C'alal to ta witstiquil ta sloq'uib c'aal, ta sq'uinal Aram, la yic'on tel Balac, te muc' ajwalil yu'un Moab. Jich la yalbon: “La' me, c'anbeya te ya x'ac'bot castigo Israel, c'anbeya bayal swocol te lum yu'un Jacob”, xi'.

⁸ Ja'uc me to, ¿bit'il c'an cal, te ya x'ac'bot castigo teme ma jichuc yo'tan te Diose? ¿Bit'il c'an ma lecuc co'tan yu'un teme ma jichuc yo'tan te Cajwaltique?

⁹ C'alal li'to ta toyol tontiquil, ya xju' cu'un yilel, ta witstiquil ya quil: Ja' me jchajp lum te parte yac'oj sbaique, te yan yilel yu'un a te jyanlumetique.

¹⁰ Bayalic jich bit'il ts'ubil lum; ¿Mach'a ya xju' yu'un sna'el te yajtalule? Te jo'one co'tanuc jichuc ya xlajon te bit'il in mach'atic tote toj yo'tanique, te jichuc ya xc'oon ta loq'uel uuc —xi' ta yalel te Balaame.

¹¹ Jich yu'un te Balac, tulan jajch' ta c'op ta stojol Balaam: —¿Bila yacat ta spasel? Jo'on la quic'at tel yu'un ya ac'anbey te ya x'ac'bot castigo te jcontrotaque. Yan te ja'ate ja' la atejc'an aba ta sc'anel bendición —utot yu'un.

¹² Te Balaam la sjac': —Melel la jchaptic te ja' nax me ya cal te bila ya yalbon loq'uel ta que te Cajwaltique —xi'.

¹³ Ja'uc me to, te Balac la yalbey xan: —La' joinawon xan tel ta jejch', ta bay c'alal ma xju' ya awil ta spisil te lum ta bay scampamentoic, ja' nax me ya awilbey xejt'uc. Tey to x'ac'anbon castigo ta stojolic a —xi' te Balac.

¹⁴ Te Balac la yic' moel te Balaam ta spamlejal yu'un Zofim, ta mero sba te wits Pisga. Tey la spasbey juqueb scajtijib ta chiq'uel majt'anil a, soc la smil juju-jcojt' toro soc juju-jcojt' tat chij.

¹⁵ Te Balaam la yalbey te Balac: —Jilan li' ta bay milbil majt'anil to, te jo'one ya xba jta jba soc te Diose —xi' te Balaam.

¹⁶ Te Cajwaltic loc' sta sba soc Balaam, la yac'bey ta ye te bila ya xc'o yale, soc jich la yalbey: —Sujt'an bael ta bay Balac. Jich nix me xawal loq'uel te bit'il calojbate —xi' te Cajwaltique.

¹⁷ Jich te Balaam sujt' bael, teq'uel c'o sta te Balac ta bay milbil majt'anil, sjoinej te jtsobwanejetic yu'un te moabetique. Te Balac la sjojc'obey: —¿Bi la yalbat te Awajwale? —xi'.

¹⁸ Jich yu'un te Balaam la yal loq'uel in sc'op j'alwanej to: —Balac, snich'an Zipor, aiybon awaiy ta lec te jc'ope.

¹⁹ Te Dios ma jichuc te bit'il mach'a ya xlaje: Ma spas lot, ma sujt'es sc'op. Teme ay bila ya yal, ya sc'otes ta pasel. Teme ay bila ya yal ta jamal te ya spase, ya sc'otes ta pasel te sc'ope.

²⁰ Jo'on quich'oj mandal ta sc'anel bendición; teme Dios ya yac' bendición, ma xju' ya jcontroin.

²¹ Ma'yuc mach'a yiloj te ya xlo'laywan soc te ya spas te bila amen te Israel te lum yu'un Jacob. Te Cajwaltic te Dios yu'unique sjoinejic, yacalic ta yalel te ja' muc' ajwalil yu'unique.

²² Ja' te Dios te loq'uesotic tel yu'un ta Egipto, jich c'oem yu'unic te bit'il yip xulub ja'mal toro.

²³ Tojol ya yich' boltesel sc'oplal ta controinel te Jacob; ma'yuc bila ya xju' yu'un ta stojol Israel te j'ac'-chameletique. Ta ora yo'tic ya sc'anix ya yich' albeyel te Israele: “¡Ma p'isbiluc jchajp señailetic spasoj Dios ta atojolic!” xi' me.

²⁴ Ja' in lum to ya xwilic jajch'el, jich ya xiwteswanic te bit'il león-choj; ma ba ya xcux yo'tanic ja' to teme ju' yu'un slajinel te bila stsacoje, ja' to teme ju' yu'un yuch'el xch'ich'el te bila lajem yu'une —xi' ta yalel te Balaam.

²⁵ Te Balac jich la yalbey te Balaam: —Te bit'il ma xju' awu'un sc'anel castigo te lume, ma x'ac'anbey bendición te jichuque —xi'.

²⁶ Ja' yu'un la sjac' te Balaam: —¿Yu'un bal ma la calbat awaiy te ja' nax ya xju' ya cal te bila mandal ya yalbon te Cajwale, te xoone? —xi'.

²⁷ Jich yu'un te Balac la yal: —La' me, ya quic'at bael ta yan jejch'. Ma niwan bila ya yalix a te Dios teme tey ya ac'anbey castigo —xi'.

²⁸ Te Balac la yic' bael te Balaam ta mero sba wits Peor, ja' te bay ya xchicnaj spisil te jochol taquin q'uinale.

²⁹ Te Balaam tey la yalbey a te Balac: —Pasbon juqueb scajtijib ta chiq'uel majt'aniletic, soc chajbanbon juju-jcojt' toro soc juju-jcojt' tat chij —xi' te Balaam.

³⁰ Te Balac la spas te bi la yal te Balaam, ta jujun scajtijib la smil jcojt' toro soc jcojt' tat chij.