Números 20 - Bible in Tzeltal de Oxchuc y Tenejapa

Loc' ja' ta muc'ul ton

¹ Ta sbabial u yu'un te ja'wile, te israeletic c'otic ta jochol taquin q'uinal Zin, jalajic ta lum Cades. Tey laj a te María, tey la smuquic a.

² Te israeletic ma la sta ja' yuch'ic. La stsob sbaic tel ta scontroinel Moisés soc Aarón,

³ jich la yalbeyic te Moisés: —Ja' lec te pajaluc lajucotic soc te yantic israeletic te la yac' lajuc te Cajwaltique.

⁴ ¿Bistuc la awiq'uic tel te lum yu'un Cajwaltic ta jochol taquin q'uinal? ¿Yu'un bal ya ac'an te ya xlajotic, soc te chambalametic cu'untique?

⁵ ¿Bi yu'un la aloq'uesotic tel ta Egipto te la awic'otic tel ta bay q'uinal te c'ax ma'yuc yutsile? Ma'yuc bi ya xju' ya jts'untic xujt'uc; ma'yuc higuera, ni ts'usubiletic, ni granado; soc ni ma'yuc ja' ya cuch'tic —xiic.

⁶ Te Moisés soc Aarón loq'uic bael ta stojol te israeletic, bajt'ic ta yochibal te Nailpac' te bay ya yich' c'oponel te Cajwaltique. La spajc'an sbaic, la stinan sbaic coel c'alal ta lum. Jich chicnaj te yutsil xojobil Cajwaltic,

⁷ jich la yalbey te Moisés:

⁸ —Tsaca te abastón, ja' me ya scoltayat ta stsobel tel israeletic te abanquil Aarón. Ta sit spisilic pasa ta mandal te muc'ul ton, ya me xt'om loq'uel tel ja' yuch'ic soc te xchamsbalamique —xi'.

⁹ Te Moisés la stsac te sbastón te ay ta stojol te Cajwaltic, jich te bit'il pasot ta mandal yu'une.

¹⁰ Jich te Moisés soc Aarón la stsobic tel te lum ta stojol te muc'ul tone. Te Moisés jich la yalbey: —¡Toybaetic, aiya awaiyic stojol! ¿Yu'un bal ya xju' cu'untic ya jloq'uestic ja' li' ta muc'ul ton te ya cac'beyex awuch'ique? —xi'.

¹¹ Yac ta yalel a te Moisés la stoy moel te sc'ab, la smaj cheb buelta te muc'ul tone, jich loc' tel bayal ja'. Ja' yu'un te lum soc te xchamsbalam jajch'ic ta yuch'el te ja'e.

¹² Ja'uc me to, te Cajwaltic la yalbey te Moisés soc Aarón: —Te bit'il ma la xch'uun awo'tan te ya jcoltayate, ni ma la awac'onic ta ich'el ta muc' ta stojol te israeletic, jich ma x'ochex bael soc ta bay q'uinal ya cac'bey te israeletique —xi'.

¹³ Ja' sloq'uibja' te Meriba sbiil ta bay la spasic partejel te israeletic ta stojol te Cajwaltique. Jich la yac' ta ilel te xch'ul yutsilal ta stojolique.

Edom ma la yac' c'axel Israel

¹⁴ C'alal ayic ta Cades, te Moisés la sticun bael cha'oxtul ta yich'el bael c'op ta stojol te muc' ajwalil yu'un Edom, jich la yal bael: —Te awermanotac-israeletic la yalic tel: “Te ja'at ya ana' ta lec te jwocoltic c'axemix tel cu'untique.

¹⁵ Te antiguo me'il-tatil cu'untic bajt'ic ta Egipto, tey nainic bayal ja'wil. Ja'uc me to, te egipcioetic la yuts'inotic soc jich nix la spasbeyic te antiguo me'il-tatiletic cu'untique.

¹⁶ Jich yu'un la jc'anbeytic coltayel te Cajwaltique. La yaiybotic stojol, jich la sticun tel jtul ch'ul abat yu'un te la sloq'uesotic tel ta Egipto. Ta ora to li' ayotiquix ta lum Cades ta bay sti'il te aq'uinale.

¹⁷ Ya jc'antic ta atojol te yacuc awac'otic c'axel ta aq'uinal. Ma ba ya xc'axotic ta bay aq'uinal te ay bila ts'unbile, soc ma xc'axotic bael ta ats'usubilic, soc ma xcuch'tic ya'lel te pozoetic awu'une. Tojotic nax ta muc'ul be, ma'yuc bay yan ya jt'untic, ja' to c'alal ya xloc'otic bael ta aq'uinale”, xi' ac'oplal cu'untic —xi' bael sc'op te Moisese.

¹⁸ Ja'uc me to, te muc' ajwalil yu'un Edom la sjac': —Ma xju' xc'axex ta jq'uinal. Teme jich ya apasique, ya me xtal jmacat ta be soc te soldadoetic cu'une —xi'.

¹⁹ Te israeletic la yalbeyic xan: —Ja' nax me ya jt'untic te muc'ul be. Teme ay ya cuch'beytic ya'lel te pozoetic awu'un soc te jchambalamtique, ya me jtojtic. Te bila ya jc'antique, ja' te yacuc c'axucotic bael ta aq'uinal —xiic.

²⁰ Te muc' ajwalil yu'un Edom la sjac'bey sc'opic: —Ma xju' ya xc'axex —xi'. Loc' tel ta smaquel ta be te israeletic soc te soldadoetic yu'un te bayal yipic te buen chapalic soc te yat'ejibique.

²¹ Tulan la yac' sbaic, ma ba la yaq'uic c'axel ta sq'uinalic. Jich yu'un te israeletic la sleic yan be.

Laj Aarón

²² Spisilic te lum Israel loc' bael ta Cades ta stojol bael te wits Hor.

²³ Tey ta sti'il sq'uinal Edom, te Cajwaltic la yalbey te Moisés soc Aarón:

²⁴ —Te Aarón ya me xlajix. Ma ba ya x'och bael ta bay q'uinal ya cac'bey te israeletic, melel te ja'ex ma la ach'uunbonic jmandal ta sloq'uibja' Meriba.

²⁵ Te ja'at Moisés, ic'a bael te Aarón soc te snich'an Eleazar ta sba te wits Hor.

²⁶ Tey ya aloq'uesbey sc'u' swenta sacerdoteil a te Aarón, ja' xawac'bey slap te Eleazar. Te Aarón tey me ya xlajix a —xi' te Cajwaltique.

²⁷ Te Moisés jich la spas te bit'il la yal mandal te Cajwaltique. Comon la yilic te israeletic te moic bael ta wits Hor.

²⁸ Te Moisés la sloq'uesbey sc'u'-spac' swenta sacerdoteil te Aarón, ja' la yac'bey slap te Eleazar. Tey laj a te Aarón ta mero sba te witse. Te Moisés soc te Eleazar coic tel ta wits.

²⁹ C'alal la sna'ic stojol israeletic te lajemix te Aarón, ay lajuneb xcha'winic (30) c'aal la yoq'uetayic.