Números 2 - Bible in Tzeltal de Oxchuc y Tenejapa

Te bit'il la xchol sbaic ta spasel scampamentoic

¹ Te Cajwaltic la sc'opon Moisés soc Aarón, jich la yalbey:

² —Te israeletic ya me yac' snailpaq'uic ta c'ubul jtebuc ta sjoyobal te Nailpac' te bay ya quich' c'oponele. Tey me ya spas scampamentoic chajbalchajp ta bay teq'uel te sbanderaic soc señailic te mach'atic ay yu'unique.

³ “Ta stojol sloq'uib c'aal tey me ya xc'o spas scampamentoic te mach'atic ya xbeenic ta stojol te bandera yu'un Judá. Te soldadoetic yu'un sts'umbal Judá, ja' me jtsobwanej yu'unic te Naasón te snich'an Aminadab.

⁴ Ay chanlajuneb xchanwinic ta jmil soc lajunwinic xcha'bajc' (74,600) te winiquetic, jich te bit'il ay ta censo.

⁵ Tey me ya spas scampamentoic ta sts'eelic te soldadoetic yu'un te sts'umbal Isacar, te ja' jtsobwanej yu'unic te Natanael te snich'an Zuar.

⁶ Ay chanlajuneb yoxwinic ta jmil soc jbajc' (54,400) winiquetic, jich te bit'il ay ta censo.

⁷ Tey me ya spas scampamentoic ta sts'eelic te soldadoetic yu'un sts'umbal Zabulón, te ja' jtsobwanej yu'unic te Eliab te snich'an Helón.

⁸ Ay juclajuneb yoxwinic ta jmil soc jbajc' (57,400) te winiquetic, jich te bit'il ay ta censo.

⁹ Jich yu'un te campamento yu'un Judá ay me oxchajp soldadoetic yu'un. Te yajtalul ta spisil, ay waqueb slajunwinic ta jmil, soc jbajc' (186,400) winiquetic, te ya x'ic'awanic ta marcha ta stojol te israeletique.

¹⁰ “Ta stojol sur tey me ya xc'o spas scampamentoic te mach'atic ya xbeenic ta stojol te bandera yu'un Rubén. Te soldadoetic yu'un sts'umbal Rubén, ja' jtsobwanej yu'unic te Elisur te snich'an Sedeur.

¹¹ Ay waqueb yoxwinic ta jmil soc jo'winic xcha'bajc' (46,500) winiquetic, jich te bit'il ay ta censo.

¹² Tey me ya spas scampamentoic ta sts'eelic te soldadoetic yu'un te sts'umbal Simeón, te ja' jtsobwanej yu'unic te Selumiel te snich'an Zurisadai.

¹³ Ay balunlajuneb yoxwinic ta jmil soc jo'lajunwinic (59,300) winiquetic, jich te bit'il ay ta censo.

¹⁴ Tey me ya spas scampamentoic ta sts'eelic te soldadoetic yu'un sts'umbal Gad, te ja' jtsobwanej yu'unic te Eliasaf te snich'an Reuel.

¹⁵ Ay jo'eb yoxwinic ta jmil soc lajuneb yoxlajunwinic xcha'bajc' (45,650) winiquetic, jich bit'il ay ta censo.

¹⁶ Jich yu'un te campamento yu'un Rubén, ay oxchajp soldadoetic yu'un. Te yajtalul ta spisil, ay bulucheb swaxacwinic ta jmil, soc lajuneb yoxwinic xcha'bajc' (151,450) winiquetic te ja' xcha'chajbal ta beel.

¹⁷ “Te levitaetic ya me xbeenic ta yolilal te chanchajp israeletic, yich'ojic me ta beel te Nailpac' te bay ya quich' c'oponele. Ta xchanchajbalic te bit'il ay scampamentoic, jich nix me xmelmon ya xbeenic te bit'il chajbanbil scampamentoic juju-jchajp soc te sbanderaique.

¹⁸ “Ta stojol smalib c'aal tey me ya xc'o spas scampamentoic te mach'atic ya xbeenic ta stojol te bandera yu'un Efraín. Te soldadoetic yu'un sts'umbal Efraín, ja' jtsobwanej yu'unic te Elisama te snich'an Amiud.

¹⁹ Ay cha'winic ta jmil soc jo'winic xcha'bajc' (40,500) winiquetic, jich bit'il ay ta censo.

²⁰ Tey me ya spas scampamentoic ta sts'eelic te soldadoetic yu'un sts'umbal Manasés te ja' jtsobwanej yu'unic te Gamaliel te snich'an Pedasur.

²¹ Ay lajchayeb xcha'winic ta jmil soc lajunwinic (32,200) winiquetic, jich bit'il ay ta censo.

²² Soc tey me ya spas scampamentoic ta sts'eelic te soldadoetic yu'un sts'umbal Benjamín, te ja' jtsobwanej yu'unic te Abidán te snich'an Gedeoni.

²³ Ay jo'lajuneb xcha'winic ta jmil soc jbajc' (35,400) winiquetic, jich bit'il ay ta censo.

²⁴ Jich yu'un te campamento yu'un Efraín, ay oxchajp soldadoetic yu'un. Te yajtalul ta spisilic, waxaqueb swacwinic ta jmil soc jo'winic (108,100) winiquetic te ja' yoxchajbal ta beel.

²⁵ “Ta stojol norte tey me ya xc'o spas scampamentoic te mach'atic ya xbeenic ta stojol bandera yu'un Dan. Te soldadoetic yu'un sts'umbal Dan, ja' jtsobwanej yu'unic te Ahiezer te snich'an Amisadai.

²⁶ Ay cheb xchanwinic ta jmil soc jo'lajunwinic xcha'bajc' (62,700) winiquetic, jich bit'il ay ta censo.

²⁷ Tey me ya spas scampamentoic ta sts'eelic te soldadoetic yu'un sts'umbal Aser, te ja' jtsobwanej yu'unic te Pagiel te snich'an Ocrán.

²⁸ Ay jun yoxwinic ta jmil soc jo'winic xcha'bajc' (41,500) winiquetic, jich bit'il ay ta censo.

²⁹ Soc tey me ya spas scampamentoic ta sts'eelic te soldadoetic yu'un sts'umbal Neftalí, te ja' jtsobwanej yu'unic te Ahira te snich'an Enán.

³⁰ Ay oxlajuneb yoxwinic ta jmil soc jbajc' (53,400) winiquetic, jich bit'il ay ta censo.

³¹ Jich yu'un te campamento yu'un Dan, ay oxchajp soldadoetic yu'un. Te yajtalul ta spisil: juclajuneb swaxacwinic ta jmil, soc lajunwinic xcha'bajc' (157,600) winiquetic. Ja'ic te ya smaquic bael ta beel soc sbanderaic te israeletique —xi' te Cajwaltique.

³² Te yajtalul ta spisil ta jchajp snaic te israeletic, loc' ta spisil oxeb sbuluchwinic xcha'bajc' ta jmil soc lajuneb swaxacwinic xcha'bajc' (603,550) winiquetic.

³³ Ja'uc me to, jich yalojix mandal Cajwaltic ta stojol Moisés te ma ba ya yich' aq'uel ta censo te levitaetique.

³⁴ Te israeletic jich la spasic spisil te bit'il yaloj mandal Cajwaltic ta stojol Moisés: juju-jchajp la spas scampamentoic ta bay te sbanderaic, beenic soc te mach'atic pajal sbiilic ta juju-jchajbe.