Números 18 - Bible in Tzeltal de Oxchuc y Tenejapa

Sc'oplal yat'el sacerdoteetic soc levitaetic

¹ Te Cajwaltic la yalbey Aarón: —Te ja'at soc anich'nab, soc te yantic ta apisilic te sts'umbalex Leví, ja' me amulic ya xc'ot teme ay ma jichuc ya yich' pasel ta ch'ul awilal te at'ele. Yan te ja'at soc anich'nab ja' me ya xc'ot ta awentaic te mulil teme ay ma jichuc te c'alal yacalex ta spasel awat'elic ta sacerdoteil.

² Ja'uc me to, ya me awac'bey ta swentaic te yantic sts'umbal Leví, te ayat ta swenta, te ya scoltayat soc anich'nab ta spasel awat'el ta Nailpac' yu'un trato.

³ Ja' me ya yac' sbaic ta abatinel awu'un, soc ta Nailpac' Templo. Ja'uc me to, ma me xnoptsajic bael tey a ta bay te biluquetic yu'un te ch'ul awilal soc ta bay scajtijib ta chiq'uel te majt'anile. Teme ay ma la stsajtayic, ya me xlajic soc ya me xlajex te ja'exe.

⁴ Ya me sjoinex ta abatinel ta Nailpac' soc spisil te at'el ya yich' pasele. Pero ma me ayuc jtuluc te ma sts'umbaluc Leví te ya xnoptsaj bael ta atojolique.

⁵ Te ja'ex ay ta awentaic te abatinel yu'un te ch'ul awilal soc ta scajtijib ta chiq'uel majt'anil. Jich me ma ba xcha'ilinon xan ta stojol te israeletique.

⁶ Jo'on la jtsa te awermanotac levitaetic ta yolil israeletic swenta yu'un ya cac'beyex ta ac'abic, yu'un ya me yac' sbaic ta abatinel ta Nailpac' te bay ya quich' c'oponele.

⁷ Ja'at nax me atuquel soc anich'nab te ya xju' ya apasic te at'el ta sacerdoteil ta bay scajtijib majt'anil, soc biluc ya xjajch' ta pasel ta yutil te paq'ue. Te at'el ja'ex ay ta awentaic, melel jo'on cac'ojbeyex ta awentaic te at'el ta sacerdoteile. Teme ay mach'a ya x'at'ej ta sacerdoteil te ma'yuc ta swenta, ya me yich' castigo ta milel —xi' te Cajwaltique.

Te bit'il ya sta swe'el sacerdoteetic soc levitaetic

⁸ Te Cajwaltic, jich la yalbey Aarón: —Jo'on cac'ojbat ta awenta te majt'aniletic te ya yac'bonic te israeletique. Spisil te ch'ul majt'aniletic te ya yac'bonic, ja' ya cac'bat soc anich'nab, ja' me ya xc'ot ta awentaic. Ja' me mandalil cu'un sbajt'el q'uinal.

⁹ Te milbil majt'aniletic te ma ba ya yich' chiq'uel, tey me ya xloc' awu'un ta spisil te majt'anil harina, soc te milbil majt'aniletic yu'un mulil, soc te majt'aniletic yu'un faltaetic, te ya yac'bonic te israeletique. Spisil te ch'ul majt'aniletic, awu'un me soc te anich'nabe.

¹⁰ Spisil winiquetic awu'unic ya me swe'elinic te majt'aniletic, pero tey me ya xwe'ic ta awilal te ch'ultesbil, melel ch'ul majt'aniletic me stuquel.

¹¹ “Soc ya cac'bat ja'at soc te anich'nab queremetic ach'ixetic te nainemat soque, te majt'aniletic tsabil te ya yac'bonic ta jtojol te israeletique. Ja' me mandalil cu'un sbajt'el q'uinal. Mach'auc te ay awu'un te lec sc'oplale, ya me swe'elinic.

¹² Soc ya cac'bat te sbabial sit yawal-sts'unub israeletic te ya yich'bonic tel jujun ja'wil: ja' te lequil aceite, te lequil vino soc te lequil trigo.

¹³ Ja' te sbabial sit awalts'unubil ya xloc' ta tsobel te ya xtal yac'bonic, ja' me awu'un te ja'ate. Mach'auc ay awu'un te lec sc'oplale, ya me swe'elinic.

¹⁴ Spisil te bitic ya yac'bonic cu'unin te israeletic, ja' me awu'un te ja'ate.

¹⁵ “Spisil te sba yal israel-antsetic, soc te sba yal te xchamsbalamic ya yac'bonic, ja' me awu'un. Ja'uc me to, te sba yal israel-antsetic, soc te sba yal chambalametic te ma lecuc sc'oplal, ya me ac'anbey te ya yac'bon taq'uin ta swenta.

¹⁶ Te taq'uin ja' me ya yich' tojel a te junix u yayinel, jo'sejp me plata jich bit'il p'isbil yalal juju-jsejp ta ch'ul awilal, te bulucheb gramo te yalale.

¹⁷ Ja'uc me to, ma me xawac' te jich ya yich' pasel te sbabial yalatac te wacaxetic, chijetic o tentsunetique. Ja'ic me ya yich' u'uninel cu'un. Ya me amilic; soc te xch'ich'el ya me amal ta scajtijib ta chiq'uel te jmajt'ane. Te xepuil ya me achic'bon swenta jmajt'an te buen bujts'an yic' ta jtojole.

¹⁸ Te ja'at ya me awich'bey jilel te sbaq'uetale, jich nix te bit'il la awich'bey stan te chambalam swenta seña lamal-o'tanil, soc te swa'el cub, ja' me te majt'anil te tsabile.

¹⁹ Spisil te spatanic te israeletic te ya sloq'uesbonic ta jwenta, ja' ya cac'bat te ja'at soc te anich'nab queremetic ach'ixetic te nainemat soque. Ja' me mandalil cu'un sbajt'el q'uinal. Ja' trato te ma xyanaj sc'oplal sbajt'el q'uinal, te ya cac' ta atojol ja'at soc te ats'umbale —xi' te Cajwaltique.

²⁰ Te Cajwaltic, jich la yalbey te Aarón: —Te ja'ate, ma me ayuc q'uinal ya awich', jich te bit'il yich'oj te yantic israeletique. Jo'on awu'unon, jo'on aq'uinalon ta Israel.

²¹ Te levitaetic ya cac'bey yu'uninic te jun ta slajunebal ya yaq'uic te israeletic ta spisil te bitic ya staic ta q'uinal, ja' stojolic te abatinel ta Nailpac' te bay ya quich' c'oponel.

²² Te yantic israeletic ma me xju' ya xnoptsajic ta Nailpac' te bay ya quich' c'oponele, swenta yu'un jich me ma sta smulic soc jich me ma xlajic.

²³ Te levitaetic ja'ic nax me stuquelic ya yat'elinic abatinel ta Nailpac' te bay ya quich' c'oponele, soc ja'ic nix ay ta swentaic te bitic mulil te ya staique. Ja' me mandalil cu'un sbajt'el q'uinal te ya xc'ax ta stojol me'il-tatiletic soc alnich'anetic. Te levitaetic ma me ayuc sq'uinalic ta Israel.

²⁴ Ja'ic me cac'ojbey yu'uninic te jun ta slajunebal ya yac'bonic te israeletic ta spisil te bitic ya staic ta q'uinale. Ja' swentail te calojbey te ma me ayuc q'uinal ya yu'uninic ta Israel —xi' te Cajwaltique.

²⁵ Te Cajwaltic la sc'opon te Moisés, jich la yalbey:

²⁶ —Albeya te levitaetic: “Jich la yal te Diose: ‘Te c'alal ya yac'beyex te israeletic te jun ta slajunebal te bitic ya cac'bey yu'uninic, ya me aloq'uesbonic jun ta slajunebal te ya awac'bonique.

²⁷ Ja' me apatanic, ja' nix pajal soc te spatanic ya yaq'uic te israeletic te c'alal ya yaq'uic te strigo soc te svino.

²⁸ Jich yu'un ta swenta te jun ta slajunebal te ya yaq'uic israeletic, ya me aloq'uesic te apatanic yu'un te Cajwaltic, ya me awac'beyic Aarón.

²⁹ Ta spisil te bila ya x'ac'botex, ya me aloq'uesic ta swenta apatanic ta jtojol. Ta bay ya awac'bonic cu'unine, ya me sc'an te mero leque.

³⁰ ‘Teme loq'uemix awu'unic a ta bay mero lec ta jwenta, te jich yipal ya xjil, jich me ya xc'ot ta awo'tanic te mero atrigo soc avino.

³¹ Ya me xju' ya awe'eliniquix soc te mach'atic ay awu'unic, ta bayuc ayuquex a, ja' me atojolic yu'un te abatinel ya apasic ta Nailpac' te bay ya quich' c'oponele.

³² Teme loq'uemix awu'unic a ta bay mero lec te cu'une, te jich yipal ya xjil, ja' me awe'eliquix abi, jich ma ba ya ata amulic a. Jich lec sc'oplal ya xc'ot te ch'ul majt'anil ya yaq'uic te israeletic, soc jich ma ba ya awil awocolic ta milel’, xi' te Diose”, uta me —xi' te Cajwaltique.