Números 13 - Bible in Tzeltal de Oxchuc y Tenejapa

Moisés la sticun jtsajtaywanejetic ta Canaán

¹ Te Cajwaltic la sc'opon Moisés, jich la yalbey:

² —Ticuna bael winiquetic ta stsajtayel te sq'uinal Canaán, te ya cac'bey te israeletique. Juju-jtul x'aticun bael ta juju-jchajp, ja'uc me te mach'a tulan yat'el ta juju-jchajp te sts'umbalique —xi' te Cajwaltique.

³ Jich nix bit'il la yal mandal te Cajwaltic, te Moisés la sticun jajch'el ta jochol taquin q'uinal Parán. Spisil te winiquetic te tulan yat'el yich'ojic ta yolilic te israeletique,

⁴ ja'ic te Samúa, snich'an Zacur, te sts'umbal Rubén;

⁵ Safat, snich'an Hori, te sts'umbal Simeón;

⁶ Caleb, snich'an Jefone, te sts'umbal Judá;

⁷ Igal, snich'an José, te sts'umbal Isacar;

⁸ Oseas, snich'an Nun, te sts'umbal Efraín;

⁹ Palti, snich'an Rafú, te sts'umbal Benjamín;

¹⁰ Gadiel, snich'an Sodi, te sts'umbal Zabulón;

¹¹ Gadi, te snich'an Susi, te sts'umbal José (ja' te sts'umbal Manasés);

¹² Amiel, snich'an Gemali, te sts'umbal Dan;

¹³ Setur, snich'an Micael, te sts'umbal Aser;

¹⁴ Nahbi, snich'an Vapsi, te sts'umbal Neftalí;

¹⁵ soc Geuel, snich'an Maqui, te sts'umbal Gad.

¹⁶ Ja' sbiilic te winiquetic te la sticun bael Moisés ta stsajtayel te q'uinale. Te Oseas, te snich'an Nun la sjelbey sbiil, Josué c'ot yu'un.

¹⁷ Moisés jich la sticun ta stsajtayel te lumq'uinal yu'un Canaán, jich la yalbey bael: —Baanic ta beel ta Néguev, soc moanic bael ta witstiquil.

¹⁸ P'ijanic me yu'un te bi yilel te q'uinal soc te yajwal te ayic tey a, teme tulanic o peq'uelic, soc teme jteb nax yajwal o bayalic.

¹⁹ Ya me awilic te lumetic, teme ja' nax spasoj scampamentoic o teme yich'ojic ts'ajc' ta sjoylejal, soc teme lequil lumq'uinal ta bay nainemic o teme ma lecuc,

²⁰ teme yaxal q'uinal o teme taquin q'uinal, soc teme ay ste'el o ma'yuc. Ma me xiwex; ich'aic tel jtebuc sit awalts'unubil yu'un te q'uinale —xi' te Moisés. Jich c'ot ta pasel te ja' yorail te yac ta tulel sbabial sit te ts'usube.

²¹ Bajt'ic te winiquetic, ba stsajtayic tel te q'uinal, c'alal ta jochol taquin q'uinal Zin ta stojol sur, ja' to ta lum Rehob ta stojol norte, te nopol yiloj sba soc yochibal bael Hamat.

²² Ochic bael ta Néguev, c'otic c'alal ta lum Hebrón. Tey nainemic a te Ahimán, Sesai soc Talmai, te sts'umbalic Anac. Te Hebrón sjuquebalix ja'wil spastajel a te la yich' pasel te Zoán ta Egipto.

²³ C'otic c'alal ta beja' Escol, la set'beyic tel sc'ab ts'usub te ay chexajtic sit, cheb yajwal ta q'uechel bael yu'unic, joc'ol bael ta te'. Soc la sc'oquic bael granadaetic soc higoetic.

²⁴ Te beja' la yac'beyic sbiil, Escol c'ot yu'unic, ta scaj te jchex ts'usub te tey la set'ic tel a te israeletique.

²⁵ Te c'alal laj yo'tanic ta yoclinel q'uinal ta cha'winic (40) c'aal, sujt'ic bael

²⁶ ta Cades ta jochol taquin q'uinal Parán. Tey ay a te Moisés, Aarón soc spisil te israeletique. La xcholbeyic sc'oplal te bitic la yilic, soc la yaq'uic ta ilel te sit awalts'unubil ta lumq'uinale.

²⁷ La yalbeyic te Moisés: —Xc'otucotic ta yilel te q'uinal te la aticunotic bael yu'une. Melel nix a, ja' te lumq'uinal ta bay ya x'oquin leche soc chab c'oem, soc ja' me sit awalts'unubil in to te ya yac' tey ae.

²⁸ Ja'uc me to, te mach'atic nainemic tey a, tulanic ta lec. Te lumetic mero muq'uic ta jyalel, soc ay ts'ajc' joytaybilic a chajbalchajp. Soc la quiltic te sts'umbal Anac te muc'ul najt'il winiquetique.

²⁹ Ta sq'uinal Néguev nainemic te amalequetic, soc ta witstiquil nainemic te hititaetic, te jebuseoetic soc te amorreoetique. Ta nopol mar soc ta ti'ti'muc'ja' Jordán, nainemic te cananeoetique —xiic.

³⁰ Jich yu'un te Caleb la scom ta c'op te lum te ayic ta stojol Moisés, jich la yal: —¡Ya me xba cu'unintic te q'uinale! ¡Ya xju' cu'untic yich'el! —xi'.

³¹ Ja'uc me to, te mach'atic xc'otuquic soc, la sjaq'uic: —Ma xju' cu'untic yac'beyel guerra te winiquetique. C'axem to xan tulan stuquelic a te bit'ilotique —xiic.

³² Jich la yalbeyic te israeletic te mero ma lecuc te q'uinal xc'otuc yilique, jich la yalbey yaiyic: —Te q'uinal xc'otuc quiltique, ya xlajinotic yu'un te mach'atic tey nainemic ae. Soc spisil te winiquetic te la quiltic, mero c'ax muq'uic ta jyalel.

³³ Soc la quiltic tey a te muc'ul najt'il winiquetic te mach'atic sts'umbal Anac. Jich quileltic ta stojolic la caiytic te bit'il c'ulubetic, soc jich wan la yilotic te jo'otique —xiic ta yalel.