Levítico 5 - Bible in Tzeltal de Oxchuc y Tenejapa

Muliletic ay ta aq'uel milbil majt'anil yu'un

¹ “Teme ay mach'a ya yich' iq'uel yu'un ya yal ta jamal swenta testigo te ay bila la yile, o te ay bila la yaiye, pero teme ma sc'an ya yale, ja' me smul ya xc'ot te ma la yale.

² “Teme ay mach'a ya spic te bila ma lecuc sc'oplale, jich bit'il sbaq'uetal lajem chambalam te stalel ma lecuc xi' sc'oplale, manchuc teme ja'mal chambalam, manchuc teme ja' te alaq'uil chambalam ayic ta ana, o teme ja' te chambalametic staslajan ya xbeenic ta lum, jich ma lecuc sc'oplal ya xc'ot te mach'a la spique, manchuc me ma la sna' te la spique.

³ “Teme ay mach'a ya spic te bila ma lecuc sc'oplal te ay ta swenta ants-winiquetic, biluc a te ma lecuc sc'oplal ya xjil yu'une, pero teme ma ba ya sna' ta ora, teme patilix ya sna'e, ma lecuc sc'oplal ya xjil yu'un.

⁴ “Teme ay mach'a ora nax ay bila ya stojol lom ta alel te ay bila ya spase, teme leque, o teme ma lecuque (biluc a te ya yal ta ora nax, te ma neeluc ya snop ta leque) pero teme ma ba ya sna' ta ora, teme patilix ya sna'e, puersa me staoj smul ya xc'ot yu'un, chican biluc a te ya slom ta alele.

⁵ “Te mach'a ya sta smul ta swenta te muliletic in to, ya me sc'an te ya yal ta jamal te smul la stae,

⁶ soc ya me yac'bon ta jtojol jo'on te Ajwalilon jcojt' sme' chambalam, swenta milbil jmajt'an yu'un te mulil la stae; teme me' chij, o teme me' tentsune, pero ta swenta nax te milbil majt'anile, te sacerdote ya me stabey perdón yu'un smul te mach'a la sta smule.

⁷ “Teme ma xju' yu'un te ya sman jcojt' te chije, ya me xju' ya yic'bon tel ta jtojol jo'on te Ajwalilon cheb puliwoquetic o cheb alal stsumutetic yu'un te smul staoje; te jcojt'e swenta milbil jmajt'an yu'un te smule, te yane swenta chic'bil jmajt'an.

⁸ Ya me yic' bael ta stojol sacerdote, ja' me neel ya yac' te ya yich' aq'uel yu'un te smule, ya me sts'otbey snuc' pero ma me ba ya stuch'bey ta jc'axel te sjole.

⁹ Ora me ya stsijts'an jtebuc te xch'ich'el milbil majt'anil ta xujc' te scajtijib ta chiq'uel jmajt'ane. Te sobra ya xjil te ch'ich'e, ya me spits'bey ta yacan te scajtijib ta chiq'uel jmajt'ane, melel ja' te milbil majt'anil yu'un te mulile.

¹⁰ Te xchebale ya me yac' ta majt'anil te scojt'ol ya yich' chiq'uele, jich nix te bit'il chapale. Te sacerdote jich me ya stabey perdón yu'un te smule.

¹¹ “Teme mero ma xju' yu'un smanel te cheb puliwoquetic, o cheb alal stsumutetic, ya me xju' ya yich'bon tel ta swenta jmajt'an yu'un smul cheb kilo mero lequil harina. Ma me xju' ya yac'bey aceite, soc ma me xyac'bey pom ta sba, melel ja' te majt'anil yu'un te mulile.

¹² Ya me yich'bey bael ta stojol sacerdote, ja' stuquel ya me sjop jojpuc ta sc'ab te harina, ya me xchic' swenta sc'anel c'uxtayel ta stojol te mach'a la yaq'ue. Ja' me ya xchic' soc te majt'aniletic te ya yich' chiq'uel ta scajtijib jmajt'an swenta quich'el ta muc' jo'on te Ajwalilone. Ja' me te majt'anil yu'un te mulile.

¹³ Te sacerdote jich me ya stabey perdón ta stojol te mach'a staoj smule, chican te bila mulile, jich me pasbil perdón ya xc'ot a te smule. Te bay c'alal ya xjil te majt'anil harina, ja' me ya yich' te sacerdote, jich te bit'il spisil majt'anil harina.” Jich me ya awal ta stojolic —xi' te Cajwaltique.

Milbil majt'anil yu'un mulil

¹⁴ Te Cajwaltic la sc'opon te Moisés, jich la yalbey:

¹⁵ —Te mach'a ma spasemaluc yo'tan ya sle smul, teme la sta falta ta swenta bit'il la scom sba ta yaq'uel te bila ch'ultesbil cu'un jo'on te Ajwalilone, ya me xju' ya yic'bon tel jcojt' xchij te ma'yuc bila boloben ta sbaq'uetal, swenta milbil jmajt'an yu'un te falta staoje, ya me yic'bon tel ta jtojol jo'on te Ajwalilone. Te stojol te chije ya me yich' tojel ta plata, chican te bit'il ay te sp'isjibal yalal te yac ta tuunel ta ch'ul awilal ta swenta te majt'anile.

¹⁶ Ja' te mach'a la sta smul ta swenta te bit'il la scom sba ta yaq'uel te bila ch'ultesbil cu'une, ya me stoj, soc ya me yac' xan jun ta jo'jo'eb te stojole. Te jayeb ya xloq'ue, ya me yac'bey ta sc'ab te sacerdote. Te sacerdote ya me stabey perdón yu'un te falta staoj te mach'a ya yac' te chij ya yich' milel yu'un te smule, jich me pasbil perdón ya xjil yu'un a te falta staoje.

¹⁷ “Teme ay mach'a ya sta smul swenta bit'il la xc'axintaybon te mandaliletic cu'une, manchuc teme ma sna', pero ya me sta falta yu'un soc xcuchoj me smul ya xjil yu'un.

¹⁸ Ja' yu'un ya me stsac jcojt' xchij, ja' me te ma'yuc bila boloben ta sbaq'uetal. Te stojole ja'at ni me ya atsajtaybey. Ya me yich'bey bael ta stojol sacerdote swenta milbil majt'anil, swenta yu'un jich me ya sta a te perdón yu'un smul te mach'a la sta falta te ma sna' te la sta smule, jich me pasbil perdón ya xc'ot te smule.

¹⁹ Ja' te milbil majt'anil yu'un te mach'a ya sta smul te ya xju' ta jeltayel melel ja' in to staoj falta ta jtojol jo'on te Ajwalilone —xi'.