Levítico 4 - Bible in Tzeltal de Oxchuc y Tenejapa

Milbil smajt'an Dios yu'un mulil

¹ Te Cajwaltic la sc'opon te Moisés, jich la yalbey:

² —Albeya te israeletic: “Teme ay mach'a ya sta smul te ma spasemaluc yo'tan ya xc'axintay te mandaliletic cu'un jo'on te Ajwalilone, teme ay bila ya spas te ma jichuc pasel ya sc'ane, ja' me ya yich' pasel in to:

³ “Teme ja' te muc'ul sacerdote cu'un te ya sta smule, te jich ya yac'bey sta smul uuc a te yajwal lume, ya me sc'an te ya yac'bon jmajt'anin jo'on te Ajwalilon jcojt' toro te ma'yuc bila boloben ta sbaq'uetal, swenta milbil majt'anil yu'un te mulil c'oem ta pasele.

⁴ Te ya yic'bon tel ta jtojol, ya me xtal yac' ta stojol te yochibal Nailpac' te banti ya quich' c'oponele, tey me ya scajanbey sc'ab ta sjol a, ya me sbojbey snuc' ta jtojol.

⁵ Patil ja' nix me ya yich'bey bael jtebuc xch'ich'el te toro, ya me yich' bael ta yutil te Nailpac' te banti ya quich' c'oponele.

⁶ Tey me ya xc'o yajts'es ta ch'ich' a te yal sc'abe, ya me stsijts'an juqueb buelta ta jtojol jo'on te Ajwalilone, tey me ya stsijts'an bael ta stojol te pac' macal a te Mero Ch'ul Awilale.

⁷ Soc ya me xjaxbey jtebuc ch'ich' te xulubiletic yu'un te scajtijib ta chiq'uel pom, te ay ta jtojol ta Nailpac' te banti ya quich' c'oponele. Spisil te xch'ich'el ay to ya xjile, ya me smalbey ta yacan te scajtijib ta chiq'uel majt'anil, te ay ta stojol te yochibal Nailpac' te banti ya quich' c'oponele.

⁸ Te toro ya yich' milel ta swenta te mulil, ya me yich' loq'uesel spisil te xepuil macal a te sbiquile,

⁹ ta xchebal te riñonetic yu'un, te xepuil potsol a, te xepuil ay ta sba slomo, soc te xepuil ay ta sejc'ub, ja' te pajal ya yich' loq'uesel soc te riñonetique.

¹⁰ Jich ni me te bit'il ya yich' pasel te toro ya yich' aq'uel swenta lamal-o'tanile. Jich te sacerdote ya xchic' spisil ta sba scajtijib majt'anil.

¹¹ Pero te snujc'ulel te toro soc ta spisil te sbaq'uetal, te sjol, te yacan, te bitic ayic ta yutil xch'ujt' soc te stsa'e,

¹² ya me yich' tsobel ta spisil, ya me sloq'uesic bael ta spat te campamentoe. Ta jun awilal te lec sc'oplal te banti ya yich' ch'ayel te stanul c'ajq'ue, tey ta sba te stanul c'ajc' busule, ya me yac'beyic si'il soc ya stsumbeyic sc'aal.

¹³ “Teme ay bila amen te ma yolojuc la scomon pasic ta spisil te israeletic, teme ma'yuc jtuluc mach'a sna'oj te amen yat'elic ta swenta te bit'il xc'axintayejic te jmandal jo'on te Ajwalilone, te jich staoj smulic ta jtojole,

¹⁴ pero teme ya sna'ic ta patil te staoj smulic ta jtojole, ya me sc'an te ya yac'bon jmajt'anin jcojt' toro ta comon ta spisilic swenta milbil jmajt'an yu'un te smulique. Ya me yiq'uic bael te toro ta stojol te Nailpac' te banti ya quich' c'oponele.

¹⁵ Te mamaletic ich'bilic ta muc' yu'un te lume, ya me xc'o scajan sc'abic ta sjol te toro ta jtojol jo'on te Ajwalilone, soc tey me ora ya sbojbeyiquix snuc' a te toroe.

¹⁶ Te muc'ul sacerdote cu'un ya me yich'bey bael jtebuc te xch'ich'el toro ta Nailpac' te bay ya quich' c'oponele,

¹⁷ ya me yajts'es yal sc'ab ta ch'ich', ya me stsijts'an ch'ich' juqueb buelta ta jtojol, ja' ta stojol te pac' macal a te Mero Ch'ul Awilale.

¹⁸ Ya me xjax ta ch'ich' te xulubiletic yu'un te scajtijib ta chiq'uel pom te ay ta jtojol ta Nailpac' te banti ya quich' c'oponele. Ta spisil te ch'ich' ya xjile, ya me smalbey ta yacan te scajtijib majt'anil, te ay ta stojol yochibal te Nailpac' te banti ya quich' c'oponele.

¹⁹ Soc te toro, ya me sloq'uesbey spisil te xepuil, ya me xchiq'uic ta scajtijib majt'anil,

²⁰ jich me ya yich' pasel te bit'il la yich' pasel te sbabial toro la yich' milel ta swenta te mulile. Jich me ya xtabotic yu'un te sacerdote te perdón yu'un te smulique, jich me pasbil perdón ya xc'ot a te smulique.

²¹ Ya me sloq'uesic bael ta spat campamento te toro, ya me xchiq'uic tey a, jich nix te bit'il la yich' pasel te sbabial toro, melel ja' te milbil majt'anil swenta smul spisilic te lume.

²² “Teme ja' ya sta smul jtul jwentainwanej, teme ay bila ya spas ta swenta xc'axintayel te jmandal jo'on te Ajwalilon te Dioson yu'une, manchuc me ma spasemaluc yo'tan ya spas, ay me smul ya xc'ot.

²³ Te bi ora ya sna' te staoj smule, ya me sc'an te ya yic' bael jcojt'uc tat tentsun te ma'yuc bila boloben ta sbaq'uetale, ya me yac'bon jmajt'anin.

²⁴ Ya me scajan sc'ab ta sjol te tat tentsun, ya me sbojbey snuc' ta jtojol ta yawil te banti ya yich' milel te chambalametic yu'un ya xba yich'ic chiq'uel, melel ja' milbil majt'anil ta swenta te mulile.

²⁵ Jich te sacerdote ya me stsac ta yal sc'ab jtebuc te xch'ich'el chambalam yich'oj milel ta swenta te mulile, ya me xjaxbey ta xulubiletic yu'un te scajtijib majt'anil, patil te ch'ich' ya xjile, ya me smalbey ta yacan te scajtijib ta chiq'uel majt'anile.

²⁶ Soc ya me xchic'bey spisil te xepuil ta sba te scajtijib jmajt'ane, jich nix te bit'il ya yich' pasel te xepuil te chambalam ya yich' milel swenta lamal-o'tanile. Te sacerdote jich me ya stabey a te perdón yu'un smul te jwentainwanej, jich me ya yich' pasel perdón te smule.

²⁷ “Teme ja' te mach'a ma'yuc yat'el te ya sta smul te ma spasemaluc yo'tane, ay me smul ya xc'ot ta swenta bit'il la xc'axintaybon te mandaliletic cu'une.

²⁸ Teme ya sna' ta patil te staoj smule, ya me sc'an te ya yic' bael jcojt'uc me' tentsun te ma'yuc bila boloben ta sbaq'uetal, ya me yac' swenta majt'anil yu'un te smul staoje.

²⁹ Ya me scajan sc'ab ta sjol te chambalam ya yac' yu'un te smule, ya me sbojbey snuc' ta yawil yu'un te scajtijib majt'anil te scojt'ol ya yich' chiq'uele.

³⁰ Jich te sacerdote ya me stsac jtebuc ta yal sc'ab te ch'ich'e, ya me xjaxbey ta xulubiletic yu'un te scajtijib majt'anile. Spisil te xch'ich'el ya xjile, ya me smalbey ta yacan te scajtijib ta chiq'uel te majt'anile.

³¹ Soc ya me sloq'uesbey te xepuile, jich nix te bit'il ya yich' pasel te chambalam ya yich' aq'uel swenta milbil majt'anil swenta lamal-o'tanile. Te xepuile ya me yich' chiq'uel ta scajtijib majt'anil, te bujts'an yic' ta jtojol te Ajwalilone. Te sacerdote jich me ya stabey perdón yu'un smul te mach'a staoj smule, soc jich me pasbil perdón ya xjil a te smule.

³² “Teme ja' yic'oj tel jcojt' chij jmajt'anin yu'un te smule, ya me sc'an ja' ya yic' tel te me' chij te ma'yuc bila boloben ta sbaq'uetal.

³³ Ya me scajanbey sc'ab ta sjol te chij, ya me sbojbey snuc' swenta bit'il ya yich' milel swenta majt'anil yu'un te mulile, tey me ta yawil ta banti ya yich' milel te chambalametic yu'un ya yich' chiq'uele.

³⁴ Jich te sacerdote ya me stsac jtebuc ta yal sc'ab te xch'ich'el te chambalam la yich' milel yu'un te mulile, ya me xjaxbey ta xulubiletic yu'un te scajtijib majt'anile. Ta spisil te ch'ich' ya xjile, ya me smalbey ta yacan te scajtijib ta chiq'uel majt'anile.

³⁵ Ya me sloq'uesbey spisil te xepuile, jich nix te bit'il ya yich' pasel te chij ya yich' aq'uel swenta milbil majt'anil swenta lamal-o'tanile. Ya me xchic'bey te xepuil ta scajtijib majt'aniletic, ja' me ya sjoin ta chiq'uel te majt'aniletic ya yich' chiq'uel ta swenta quich'el ta muc' jo'on te Ajwalilone. Te sacerdote jich ya stabey a te perdón yu'un smul te mach'a staoj smul, soc jich me pasbil perdón ya xc'ot a.