Levítico 2 - Bible in Tzeltal de Oxchuc y Tenejapa

Majt'anil harina

¹ “Teme ay mach'a ya yich'bon tel jmajt'anin harina jo'on te Ajwalilon, ya me sc'an te ja' ya yich' tel harina te mero lec, soc ya me yac'bey aceite soc pom ta sba.

² Ya me yich'beyic bael ta stojol snich'nab Aarón, ja' te sacerdoteetique. Ay me jtul te ya sjop ta sc'ab te harina capal soc aceite, soc nix spisil te pome. Ya me xchic' ta sba te scajtijib jmajt'an swenta chic'bil jmajt'an te buen bujts'an yic' ta jtojol jo'on te Ajwalilon, ta swenta sc'anel xc'uxtayel te mach'a la yaq'ue.

³ Te bay c'alal ya xjil xan te jmajt'ane, te ja' mero ch'ultesbil te c'axem jich a te bit'il yantic jmajt'an te ya yich' chiq'uel ta swenta quich'el ta muc' jo'on, ja' me yu'un stuquel te Aarón soc te patil alnich'anetic yu'une.

⁴ “Teme la awac'bon jmajt'anin harina te wobil ta horno, pimil waj me xawac'bon soc ja'uc me pasbil a te buen lequil harina wots'bil soc aceite, pero ma me ayuc slevadurail, o teme ja' te jayal waj ma ba yich'oj levadura te yich'oj tsijts'anel ta aceite.

⁵ “Teme harina te jmajt'an awu'un te pasbil ta samet, ja' me ya sc'an te ya yich' pasel ta lequil harina, soc te wots'bil soc aceite, pero ma me ayuc slevadurail.

⁶ Ya me axet' ta tsail nax, soc ya me atsijts'an ta aceite, melel ja' majt'anil harina.

⁷ “Teme harina te jmajt'an awu'un te pasbil ta sartén, ja' me ya sc'an te ya yich' pasel ta buen lequil harina soc aceite.

⁸ Te c'alal chapalix awu'un te jmajt'ane, ya me awich'bon tel ta ch'ul awilal. Tey me ya awac'bey ta sc'ab a te sacerdote cu'une. Ja' me ya yich' bael c'alal ta scajtijib jmajt'an.

⁹ Tey me ya yich' jtebuc a te jmajt'an te sacerdote, swenta yu'un ya xchic' ta scajtijib jmajt'an, ja' me jmajt'an te ya yich' chiq'uel swenta jna'jibal te bujts'an yic' ta jtojol jo'on te Ajwalilone.

¹⁰ Ta bay c'alal ya xjil te jmajt'an, te ja' mero ch'ultesbil a te bit'il yantic jmajt'an te ya yich' chiq'uel ta swenta quich'el ta muq'ue, ja' me yu'un stuquel te Aarón soc te patil alnich'anetic yu'une.

¹¹ “Ma me xawac'beyic slevadurail te majt'anil harina te ya awac'bonic jmajt'anin jo'on te Ajwalilon, melel ma xju' ya achic'bon jmajt'anin ni levadura, ni chab.

¹² Ya xju' ya awac'bonic jmajt'anin levadura soc chab swenta sba sit awawal-ats'unubic, pero ma me xachiq'uic ta scajtijib jmajt'an swenta bujts'an yic' ta jtojol jo'on te Ajwalilone.

¹³ “Ta spisil te jmajt'an harina awu'unique, ya me awac'bey yats'amul. Te harina ya awac'bon jmajt'anin, ma me ayuc bi ora te ya spas falta te ats'am swenta trato yu'un te Dios awu'une. Ta spisil te jmajt'an ya awaq'ue, ya me awac'bey yats'amul ta puersa.

¹⁴ “Teme ya awac'bon jmajt'anin jo'on te Ajwalilon te sbabial sit te atrigo o te acebada, ya me abacubtes ta c'ajc' te juju-jchex ta xyaxal to, soc ya me yich' chewel te juju-jp'ij sit te yach'il to, te sbabial set'bile.

¹⁵ Ya me awac'bey aceite soc pom ta sba, melel ja' majt'anil swenta sit awalts'unubil.

¹⁶ Jich te sacerdote ya me xchic' jtebuc te majt'anil chewbil, soc te aceite, soc ja' nix sjoinej te pome. Ja' me majt'anil swenta jna'jibal te ya yich' chiq'uel ta swenta quich'el ta muc' jo'on te Awajwalilone.