Levítico 18 - Bible in Tzeltal de Oxchuc y Tenejapa

Te bitic ma lecuc ta pasel yu'un ants-winiquetic

¹ Te Cajwaltic la sc'opon te Moisés, jich la yalbey:

² —Jich xawalbey te israeletique: “Jo'on Ajwalilon te Dioson awu'unique.

³ “Ma me xat'unbeyic scostumbre te egipcioetic tey ta lumq'uinal ta banti nainexe. “Ma me xat'unbeyic scostumbre te cananeoetic, tey ta lumq'uinal te banti ya quiq'uex baele, soc ma me xat'unbeyic te mandaliletic yu'unique.

⁴ “C'otuc me ta pasel awu'unic te bitic chapal cu'un, soc te mandaliletic cu'une; jich me x'ainex te bit'il ya yalbeyex te mandaliletique. Jo'on Ajwalilon, Dioson awu'unic.

⁵ “T'unaic me ta pasel te bitic chapal cu'un, soc te mandaliletic cu'une. Te mach'a ya yac' c'otuc ta pasele, ya me xcuxin yu'un. Jo'on Ajwalilon.

⁶ “Ma me ayuc jtuluc winic te ya xnoptsaj ta stojol jtul ants te ya sta sba soc ta wayel te ma yanuc parte aye, te jun sts'umbal soque. Jo'on Ajwalilon.

⁷ “Ma me xyal awo'tan te ya xwayat soc te ame'e, melel ya xbolob sc'oplal atat yu'un, teme jich ya apasbeye, ma me lecuc, melel ame'.

⁸ “Ma me xwayat soc te yinam te atat, melel ya xbolob sc'oplal te atate.

⁹ “Ma me xwayat soc awix soc awijts'in-ach'ix, manchuc me awix awijts'in ta swenta te atate, o ta swenta te ame'e, manchuc me ay ta ana, manchuc ainem ta yan parte, pero ma me xju' jich ya apasbey.

¹⁰ “Ma me xwayat soc te yantsil-nich'an te aquerem-nich'ane, o ja' te yantsil-al te awantsil-nich'ane, melel ja'at ni me ya aboltes ac'oplal a, ja' yu'un ma me xapas.

¹¹ “Ma me xwayat soc te yantsil-al te yinam atate, melel ja' snich'an te atate, melel awijts'in-ach'ix me. Ja' yu'un ma xju' te jich ya apasbeye.

¹² “Ma me xwayat soc te xwix o yijts'in-ach'ix te atate, melel pajal xch'ich'el soc.

¹³ “Ma me xwayat soc te xwix o yijts'in te ame'e, melel pajal me xch'ich'el soc.

¹⁴ “Ma me xwayat soc te yinam atajun, ya me aboltesbey sc'oplal te atajune, melel ame'jun me te yinam atajune.

¹⁵ “Ma me xwayat soc te awalib, melel ja' yinam te anich'ane, ja' yu'un ma lecuc teme jich ya apase.

¹⁶ “Ma me xwayat soc te yinam abanquil o awijts'ine, melel ya me aboltesbey sc'oplal te abanquil, awijts'in teme jich ya apasbeye.

¹⁷ “Ma me xwayat soc jtul ants soc yantsil-al, ni ja'uc te yantsil-al te yale, ma me xapas jich; melel jun xch'ich'elic, ja' yu'un mero ma lecuc teme jich ya apasbeye.

¹⁸ “Ma me x'awic' awinamin te xwix o yijts'in te awiname, soc ma me xwayat soc teme cuxul to ta balumilal te awiname, swenta yu'un jich ma ba ya awac'bey scontroin sbaic a.

¹⁹ “Ma me xwayat soc ants teme ay xchamel ta swenta jujun u.

²⁰ “Ma me xwayat soc te yinam te apat-axujq'ue, ma me x'ata aba soc, jich ma ba boloben ac'oplal ya xc'oat soc.

²¹ “Ma me xawac'bey smajt'anin ta chiq'uel ni jtuluc anich'an te dios Moloc. Ma me xawac' bolobuc jc'oplal. Jo'on Ajwalilon.

²² “Ma me xwayat soc winic te jich c'oem awu'un te bit'il ya xwayat soc te antse, melel jc'axel ma lecuc ta pasel.

²³ “Ma me x'ata aba soc chambalam, melel boloben ac'oplal ya xc'oat yu'un teme jich ya apase. Ja' nix jich te antse, ma me xyac' sba ta cuchel yu'un chambalam, melel jc'axel ma lecuc ta pasel.

²⁴ “Ma me ayuc x'aboltes abaic ta swenta te bitic la calixe. Melel ja' boloben c'ot yu'un te yajwal lumetic ya jch'ojbeyex loq'uel ta atojolic,

²⁵ soc te slum-sq'uinalic boloben sc'oplal jil yu'unic. Pero jo'on la jpasbeyix ta wenta te smulique, jich te lumq'uinal yu'unic ja' nix la xch'oj loq'uel te yajwale.

²⁶ Yan te ja'ex israelex soc te jyanlumetic nainem ta awolilic, ac'a c'otuc ta pasel awu'unic te mandaliletic cu'un soc te bitic chapale, ma me xapasic te bitic mero ilaybil sbae.

²⁷ Melel spisil te bitic mero ilaybil sba, la spasic te mach'atic neel nainic ta lumq'uinal te c'alal ma to xc'oex a te ja'exe, ja' yu'un boloben sc'oplal jil yu'unic te q'uinale.

²⁸ ¡Ma me ja'uc ya xch'ojex loq'uel te lumq'uinal ta scaj te boloben sc'oplal ya xc'ot awu'unique, jich te bit'il la xch'oj loq'uel ta stuquel te mach'atic neel nainic tey a te c'alal ma to xc'oex a te ja'exe!

²⁹ Te mach'a ya spas junuc te bila mero ilaybil sbae, ya me yich' loq'uesel ta yolil te slumale.

³⁰ Ja' yu'un, pasaic me te bila mandalil caloje, ma me xapajbeyic stalelic te la spasic te bitic mero ilaybil sba la spasic te mach'atic nainic tey a, soc ma me xapasic te bila boloben ac'oplal ya xc'oex yu'une. Jo'on Ajwalilon te Dioson awu'unique.” Jich me ya xc'o awal ta stojolic —xi' te Cajwaltique.