Levítico 12 - Bible in Tzeltal de Oxchuc y Tenejapa

Bit'il ya yich' lecubtesel sc'oplal ants c'alal ya x'ayin yal

¹ Te Cajwaltic la sc'opon te Moisés, jich la yalbey:

² —Albeya te israeletique: “Te c'alal ya yic' yal te antse, teme ya yalatay jtul ch'in querem, juqueb me c'aal ma lecuc sc'oplal, jich te bit'il c'alal stalel ya yil te xchamele.

³ Te alal ya me yich' circuncisión te c'alal ya sta waxaqueb c'aal yayinele.

⁴ Pero te sme'e ya to slecubtes xan sba yu'un te ma lecuc sc'oplal yu'un te xch'ich'ele, ja' to me teme ts'acaj oxlajuneb xcha'winic (33) c'aale. Ma me xju' ya stsac biluquetic te ch'ultesbile, soc ma me xju' ya x'och ta Nailpac' Templo teme ma ba ts'acajem te jayeb c'aal te ya slecubtes sbae.

⁵ Pero teme ch'in ach'ix te yal ya x'ayine, cheb me semana ma lecuc sc'oplal yu'un, jich te bit'il ya spas te stalel ya yil xchamele. Soc ya me slecubtes xan sba yu'un te ma lecuc sc'oplal yu'un te xch'ich'ele, ja' to teme loc' waqueb xchanwinic (66) c'aale.

⁶ “Te c'alal ya sts'acaj te jayeb c'aal te ya slecubtes sbae, manchuc me ch'in querem o ch'in ach'ix te ya x'ayine, pero te me'ile ya me sc'an te ya yic' bael ta yochibal Nailpac' te banti ya quich' c'oponel, jcojt' chij te jun ya'wilale, swenta yu'un ya yich' chiq'uel ta scojt'ol swenta jmajt'an, soc jcojt' stsumut, o jcojt' puliwoc, swenta milbil majt'anil yu'un mulil. Ya me yac'bey te sacerdotee.

⁷ Te sacerdote ya me yac'bon ta jtojol jo'on te Ajwalilone, swenta yu'un ya yich' c'anbeyel perdón te ants, yu'un jich me ya xlecub sc'oplal a te bit'il quejch'ajix te xch'ich'ele.” Jich me ya xc'o awal ta stojolic —xi' te Cajwaltique. Ja' sc'oplal te bit'il ya x'ayinic te ch'in quereme soc te ch'in ach'ixe.

⁸ Teme ma xju' yu'un te me'il te ya yac' te chije, ya me xju' ya yic' tel cheb puliwoc o stsumut, jun yu'un majt'anil te scojt'ol ya yich' chiq'uel, yan yu'un milbil majt'anil yu'un mulil. Jich te sacerdote ya me sc'anbey te perdón, jich me ya xlecub sc'oplal jilel a te antse.