Jueces 9 - Bible in Tzeltal de Oxchuc y Tenejapa

Abimelec

¹ Te Abimelec, snich'an Jerobaal, bajt' ta Siquem ta aiyej soc yermanotac te sme'e, jich la yalbey:

² —Ta swenta bit'il quermano jbajtic te jo'otique, ya calbeyex wocol te yacuc awac'beyic snop te yajwal Siquem te ja'uc lec jtul nax winic ya xmandalaj ta stojolic, te manchuc ya xmandalaj spisil te lajuneb xchanwinic (70) snich'nab Jerobaal —xi' te Abimelec.

³ Melel te Abimelec ja' nix yermano sbaic soc, jich yu'un la yac' sbaic ta swenta. Ba yac'beyic snop te mach'atic ayic ta Siquem te ya st'unic te Abimeleque.

⁴ Te yajwal Siquem la yich'beyic bael lajuneb xchanwinic (70) ta jsejp plata te la sloq'uesic ta templo yu'un Baal-berit, la yac'beyic te Abimelec. Ja' yu'un ja' la stoj a te jmilawetic te ya xjoinotic bael yu'une. Te winiquetic bajt'ic soc

⁵ c'alal ta Ofra, ja' te bay nain te Jerobaal, ja' te anima state. Ta sba jun nax ton la smilic spisil te slajunebal xchanwinic (70) yermanotac Abimelec. Ja' nax stuquel ju' yu'un snac'bel sba te Jotam, jich la scoltay sba te xutil snich'an Jerobaal.

⁶ Ta patil spisil te yajwal Siquem soc Bet-milo la stsob sbaic ta sts'eel te jijte' soc te ton ch'ultesbil yu'unic te ayic ta Siquem, tey la yaq'uic ta muc' ajwalil te Abimelec.

⁷ C'alal la yaiy stojol Jotam, mo bael ta wits Gerizim, tulan awun tel, swenta yu'un ya me yaiy stojol spisilic a: —¡Yajwal Siquem, aiybonic awaiy ta lec te jc'ope! ¡Jich me ya yaiybeyex ac'opic te Diose!

⁸ Ay jun buelta jajch'ic ta snopel te te'etic, te ayuc muc' ajwalil yu'unic. Jich yu'un la yalbeyic te olivo, te ja'uc ya x'och ta ajwalil yu'unique.

⁹ Ja'uc me to, te olivo la yal te ma ba ya sc'an. Jich la yal: “Teme ya x'ochon ta muc' ajwalil ya quijq'uitay yaq'uel caceiteil, ja' te ya x'ac'ot ta ich'el ta muc' yu'un a te winiquetic soc nix te Diose”, xi'.

¹⁰ “Jich yu'un te te'etic la yalbeyic te higuera, te ja'uc ya x'och ta muc' ajwalil yu'unique.

¹¹ Te higuera la yal te ma sc'an. Jich la yal: “Teme ya x'ochon ta ajwalil yu'un te te'etic, neel me ya sc'an ya quijq'uitay yaq'uel te higoetic te buen bujts'anic ta tuuntesel soc te chi'ique”, xi'.

¹² “Te te'etic la yalbeyic te ts'usub, te ja'uc ya x'och ta muc' ajwalil yu'unique.

¹³ La yal te ts'usub te ma sc'an. Jich la yal: “Teme ya x'ochon ta ajwalil yu'un te te'etic, neel me ya quijq'uitay yaq'uel vino te bayal ya xbujts'naj yo'tan winiquetic yu'un soc nix te Diose”, xi'.

¹⁴ “Ta slajibal te te'etic la yalbeyic te ch'ix, te ja'uc ya x'och ta muc' ajwalil yu'unique.

¹⁵ Te ch'ix la yal: “Teme melel te jich ya sc'an awo'tanic te ya x'ochon ta muc' ajwalil awu'unique, apisilic me ya xtal awac' abaic ta caxinal. Yan teme ma jichuc awo'tanic te muc' ajwalilon awu'unique, ya me xloc' tel c'ajc' ta jtojol, ya me slajin te cedroetic te ay ta Líbano”, xi' te ch'ixe —xi' te Jotame.

¹⁶ La yal xan te Jotame: —Yo'tic ya jojc'obeyex: ¿Lec bal yacalex ta at'el ta melel? ¿Stojil bal ya awaiyic te ja' ya awaq'uic ta muc' ajwalil te Abimelec? ¿Lec bal awo'tanic ta stojol te Jerobaal soc te mach'atic ay yu'une? ¿Jich nix bal yutsil awo'tanic ta stojol te bit'il yutsil yo'tan ta atojolic?

¹⁷ Melel te jtate la yac' c'axuc swocol ta awentaic c'alal la yac'bey guerra ta scoltaybelex ta sc'ab te madianetique.

¹⁸ Yo'tic la atoyix abaic ta stojol te mach'atic ay yu'un te jtate, la amilic te lajuneb xchanwinic (70) snich'nab ta sba jun nax ton. Ma'yuc sc'oplal yaiyel ta awo'tanic, la awaq'uix ta muc' ajwalil te Abimelec, te squerem-al scriada Jerobaal. Jich la apasic, ja' nax yu'un te awermano abaique.

¹⁹ Ja'uc me to, ya calbeyex yo'tic: teme lec awo'tanic soc yutsil awo'tanic ta mero melel ta stojol Jerobaal soc te mach'atic ay yu'un, junuc me awo'tan abaic soc Abimelec.

²⁰ Yan teme ma jichuque, ac'a loc'uc tel c'ajc' c'oem ta stojol te Abimelec te ya smilex ta apisilic a te ayex ta Siquem soc ta Bet-milo; soc ac'a loc'uc tel c'ajc' c'oem ta Siquem soc ta Bet-milo te ya xlajinot yu'un a te Abimeleque —xi' te Jotam.

²¹ Te c'alal laj yo'tan ta yalel te Jotam, an bael, ba ainuc ta Beer, yu'un la xi' te sbanquil Abimelec.

²² Te Abimelec mandalaj ta stojol israeletic oxeb ja'wil.

²³ Ja'uc me to, Dios la sticunbey bol espíritu ta stojol, soc ta stojol yajwal Siquem, swenta yu'un jich ya xjajch' scontroin sbaic a.

²⁴ Ja' me stojol c'ot te xch'ich'el te la smil te lajuneb xchanwinic (70) ta jtul snich'nab Jerobaal; soc te mach'atic ay ta Siquem, ja' me stojol c'ot ta swentaic te bit'il la scoltay ta smilel te yermanotaque.

²⁵ Te yajwal Siquem ay bajt'ic ta witstiquil, la snac' sbaic, loc' spojbeyic sbiluc soc la smilic spisil te mach'atic c'axic ta bay nopol be. Te Abimelec albot yaiy stojol spisil.

²⁶ Ay jun c'aal te Gaal, snich'an Ebed, c'ot soc yermanotac ta Siquem, ju' yu'un smonbel yo'tanic te mach'atic ay ta lum Siquem.

²⁷ Te yajwal Siquem loq'uic bael ta ts'usubiletic ta stulel sit, la spasic ta vino, soc la spasic muc'ul q'uin. Yacalic ta we'el soc uch'ajel ta templo te bay te diosetic yu'unique, jajch' sbolc'optayic te Abimelec.

²⁸ Te Gaal la yal: —¿Mach'a ya scuy sba a te Abimelec? Ma me yanuc, melel ja' snich'an te Jerobaal, soc ja' sjoy ta at'el te Zebul. Te jo'otic ta Siquem ¿mach'aotic a te jich c'oemotic te bit'il mozo yu'une? Te jo'otic smozootic Hamor te la sjajch'es te lum Siquem, pero ma me ja'uc smozootic te Abimelec.

²⁹ ¡Ay! ¡Te jo'ucon jmandalteswanejon awu'unique, li' ta ajc' ma'yuquix te Abimelec cu'un te jichuque! —xi'. Soc la yal xan: —Ac'a stsob swinictac te Abimelec, ac'a taluc ta guerra —xi'.

³⁰ C'alal la yaiy stojol te Zebul, te ajwalil yu'un te lume, te bit'il jich yac ta yalel te Gaal, bayal jajch' sc'ajc'al yo'tan yu'un.

³¹ Jich la sticunbey c'op te Abimelec te ay ta lum Aruma, jich la yal bael: “Te Gaal, snich'an Ebed, talem soc yermanotac ta Siquem, yac ta sjachbel yo'tanic ta scontroinbelat.

³² Jich yu'un loc'an me tel ta ajc'ubal yo'tic soc te soldadoetic awu'une, nac'a aba ta aquiltic.

³³ Ta sab te c'alal yac ta loq'uel tel te c'aale, ac'beya guerra te lume. Te c'alal ya xloc' tel soc swinictac Gaal ta yac'belat guerra, pasbeya ta stojol te bila ya sc'an awo'tan soc te soldadoetic awu'une”, xi' bael sc'op.

³⁴ Ja' yu'un te Abimelec soc spisil te swinictac, loq'uic tel ta ajc'ubal ta snac'bel sbaic ta sjoyobal te lum Siquem, chanchajp la sloq'ues sbaic a.

³⁵ Jich yu'un te c'alal loc' tel ta spuertail sts'ajc'ul te lume te Gaal, te Abimelec soc te swinictac loq'uic tel tey a ta bay snac'oj sbaique.

³⁶ C'alal la yil te Gaal, la yalbey te Zebul: —¡Ilawil, yacalic coel tel ta wits tsobol soldadoetic! —xi'. La sjac' te Zebule: —Ma niwan. Ja' nax yaxinal te witstiquil te ya acuy ta winiquetic yilele —xi'.

³⁷ Te Gaal la xcha'yal xan: —Soc ta bujul, te Xmuxuc' Lumq'uinal sbiil te wits awu'unique, tey yac ta coel tel tsobol soldadoetic a. Soc ay yantic yacal ta talel ta be te ja' sbelal Jijte' yu'un Lotil J'alwanejetic —xi'.

³⁸ La sjac' te Zebule: —C'opojan xan yo'tic ta buen toybajel. Te ja'at te la awal: “Bistuc te muc' scuyoj sba te Abimelec te ya xbootic ta mozoil yu'un”, te xaate. Li' ay te soldadoetic te ma'yuc sc'oplal ta awo'tane. Baan me yo'tic, loc'an bael ta guerra soc —xi' xan te Zebul.

³⁹ Te Gaal loc' bael soc te winiquetic ta Siquem, ba yac'bey guerra te Abimelec.

⁴⁰ Te Abimelec la snuts bael, te Gaal an ta stojol. Ay bayal mach'a lajic tey a ja' to ta bay c'alal spuertail sts'ajc'ul te lume.

⁴¹ Te Abimelec jil ta lum Aruma. Te Zebul la sloq'ues ta Siquem te Gaal soc te yermanotaque.

⁴² Ta yan c'aal te yajwal Siquem loq'uic bael ta aquiltic. C'alal la yaiy stojol te Abimelec,

⁴³ oxchajp la yac' te swinictac, soc la yac' snac' sbaic ta aquiltic. Te bit'il yacal loq'uel tel ta lum te yajwal Siquem, te Abimelec soc te swinictac loq'uic tel ta bay snac'oj sbaic, talic ta slumtayel.

⁴⁴ Ba yac' sbaic ta ora ta spuertail sts'ajc'ul te lume, yan te cha'chajp swinictac la slumtay, soc la smilic te mach'atic yacalic ta beel ta aquiltique.

⁴⁵ Te Abimelec, sjunal c'aal la yac'bey sba guerra soc Siquem, ja' to c'alal la yu'unin te lume. La sjin te lum, soc spisil la smil te ants-winiquetique. Ta patil la yac'bey jilel ats'am te lume.

⁴⁶ C'alal la yaiy stojol te yajwal ta Migdal-siquem te bi la spas te Abimelec, ba snac' sbaic ta bay nac'jibal tulanil templo yu'un te loc'omba El-berit.

⁴⁷ La yaiy stojol te Abimelec te spisil la snac' sbaic tey a.

⁴⁸ Bajt' spisil soc swinictac ta wits Salmón. La sboj coel sc'ab te' ta echej, la yac' bael ta snejq'uel. Jich la yalbey ta spisil te swinictac te ora nax ac'a spasic jich te bit'il yac ta spasel ya yilique.

⁴⁹ Spisilic la sbojic te sc'ab ste'ique, soc jich la st'unic bael te Abimelec. Ta bay anjibal tulanil templo tey la sbusanic spisil a te c'ab te'etic yich'ojic tele. La stsumbeyic sc'aal, jich la smil spisil te yajwal Midgal-siquem, te ay niwan jmil (1,000) ta jtul winiquetic soc antsetic.

⁵⁰ Ta patil bajt' te Abimelec ta lum Tebes, la xchajban sba yu'un yac'beyel guerra, jich la stsal.

⁵¹ Ta bay yolil te lum ay jun toyol ts'ajc', tey la snac' sbaic spisil te yajwal lum, winiquetic soc antsetic. La smacbeyic ta lec te sti'il ts'ajq'ue, moic bael ta sba.

⁵² Te Abimelec c'ot c'alal ta spat te ts'ajc', la yac'bey guerra te yajwale. La yalix te ya stsumbeyix sc'aal a.

⁵³ Pero ay jtul ants la xch'ojbey coel tel cha', jul ta mero sjol, la slombey te sbaquel sjole.

⁵⁴ Te Abimelec la yic' tel ta ora te jcuch-at'ejibal yu'une, jich la yalbey: —Loq'uesa tel te apuñale, milawon a, yu'un ma jc'an teme ya yalic: “Jtul nax ants milot yu'un”, teme xiique —xi'. Jich yu'un te jcuch-at'ejibal yu'une la slow ta puñal, jich a laj.

⁵⁵ C'alal la yilic israeletic te lajemix te Abimelec, sujt'ic bael ta snaic.

⁵⁶ Jich ac'bot stoj yu'un Dios te bit'il la yuts'in te mach'atic ay yu'un te anima state, ja' te la smil te lajuneb xchanwinic (70) ta jtul te yermanotaque.

⁵⁷ Ja' nix jich Dios la yac'bey stoj te yajwal Siquem spisil te smilawique. Jich c'ot ta pasel ta stojolic te bit'il albot sc'oplalic ta jamal yu'un Jotam te snich'an Jerobaal.