Jueces 3 - Bible in Tzeltal de Oxchuc y Tenejapa

Lumetic jilic ta Canaán

¹ Ay lumetic te jilic ta spamal q'uinal, te la sc'an yo'tan Cajwaltic te ya yac'bey ta swenta prueba ta stojol te israeletique. Ja'ic te yal-snich'nab israeletic te ma to ayinemic a te c'alal la yac'beyic guerra ta yich'el sq'uinal te cananeoetique.

² Te Cajwaltic la yijq'uitaybey swenta yu'un ya snopic guerra te mach'atic ma la yilic guerra ta neelale.

³ Jilic te jo'tul ajwalil filisteoetic, soc spisil te cananeoetic, sidonetic, soc heveoetic te ainemic ta witstiquil yu'un Líbano, c'alal ta wits Baal-hermón, ja' to c'alal ta bay ya xju' c'axel beel ta witstiquil ta lum Hamat.

⁴ Ja'ic te lumetic jilic swenta yu'un ya yac'bey prueba te Cajwaltic ta stojolic a te israeletic, yu'un la sc'an yil teme ya xch'uunic te mandaliletic te yac'ojbey te antiguo sme'-static ta swenta Moisés.

⁵ Jich te israeletic jajch' sjoin sbaic ta q'uinal soc te cananeoetic, hititaetic, amorreoetic, ferezeoetic, heveoetic soc te jebuseoetique.

⁶ Te snich'nab israeletic, queremetic ach'ixetic, la yic' sbaic soc te queremetic ach'ixetic yu'un te lumetic, soc la xch'uunic te loc'ombaetic yu'unique.

Otoniel la scoltay Israel ta sc'ab Cusan-risataim

⁷ Te yat'el israeletic amen ta sit Cajwaltic, ja' te bit'il la yijq'uitay ta yo'tanic, soc jajch'ic ta xch'uunel te lotil dios Baal soc te antsil-dios Asera.

⁸ Ja' ilin Cajwaltic ta stojolic yu'un. Jich la yac'bey ta sc'ab Cusan-risataim te muc' ajwalil ta Mesopotamia. Waxaqueb ja'wil ochic ta abatinel yu'un Cusan-risataim,

⁹ ja' to c'alal la yalbeyic wocol te Cajwaltique. Jich la sle stuquel te mach'a tal ta coltayel yu'une. Ja' la yac' ta jcoltaywanej te Otoniel snich'an Cenaz, te ja' yijts'in Caleb.

¹⁰ Te espíritu yu'un Cajwaltic jul ta wentainel yu'un te Otoniel, ja' juez c'ot yu'un te israeletique. Loc' bael ta guerra, te Cajwaltic la yac'bey yaiy tsalaw ta stojol Cusan-risataim.

¹¹ Ta patil ay cha'winic (40) ja'wil lamaj c'op ta bay te q'uinale. Ta patil laj te Otoniel.

Aod la scoltay Israel ta sc'ab Moab

¹² Te israeletic cha'jajch'ic ta spasel bi amen ta sit te Cajwaltique. Ja' yu'un te Cajwaltic la yac'bey yip Eglón te muc' ajwalil yu'un Moab, cajal yip yu'un a te Israel.

¹³ Te Eglón la xchap soc amonetic soc amalequetic, tal yac'beyic guerra te Israel. La yich'beyic te lum Palmaetic.

¹⁴ Waxaclajuneb ja'wil la yac' sbaic ta abatinel te israeletic yu'un Eglón,

¹⁵ ja' to c'alal la yalbeyic wocol te Cajwaltique. Jich la slebey mach'a ya xcoltayotic yu'un. Te jcoltaywanej ja' te jtul winic q'uexen sc'ab ya x'at'ej, Aod sbiil, snich'an Gera, te ay ta sts'umbal Benjamín. Ta yorail aq'uel patan te israeletic ja' la sticunic Aod ta stojol Eglón.

¹⁶ Te Aod la spas bael spuñal, cha'jejch la yac'bey ye, ay oliluc metro te snajt'ile. La xchuc bael ta xch'ujt' ta yutil snajt'il c'u' ta swa'el.

¹⁷ La yich' bael te patan ta stojol Eglón, te jujp'en ta leque.

¹⁸ Ta patil te c'alal laj yo'tan ta yaq'uel patan ta stojol Eglón, te Aod loc' bael soc te sjo'tac te sjoineje.

¹⁹ Ja'uc me to, te c'alal c'ot ta bay loc'ombaetic te ayic ta nopol Gilgal, te Aod sujt' bael ta stojol Eglón. Jich la yalbey: —Ajwalil, ay jtebuc c'op cu'un ya calbat, pero muquen me ya sc'an ya calbat —xi' c'oel. Jich yu'un te ajwalil la yalbey mandal te mach'atic ayic ta abatinel yu'un te ma xc'opojic, jich loq'uic bael ta stojol.

²⁰ Te c'alal jilix stuquel soc Eglón a te Aod, nacal ta yutil na ta swenta yorail verano. Tal ta stojol, jich la yalbey: —Te c'op la quich'bat tel, ajwalil, ja' ta swenta te Diose —la yut. Te c'alal la yaiy stojol Eglón, jajch' tel ta smuc'ul nactijib.

²¹ Te Aod te jq'uexen-c'abe, la yac' bael sc'ab ta swa'el, la sloq'ues te spuñal, la sts'apbey ta xch'ujt' te Eglón.

²² Tulan nax la sts'apbey ochel, xch'ixil och bael te staq'uinal, soc yacan och bael ta jyalel. Jc'axel bic'ot bael te puñal yu'un xepuil te Eglón. Te Aod tey ts'apal la yijq'uitay te spuñale.

²³ La smac jilel soc smajq'uil taq'uinul sti' te nae, loc' bael ta ventana.

²⁴ C'alal baemix a, talic te mach'atic ayic ta abatinel yu'un te ajwalil, la yilic te macajtic te ti'naile. La scuyic te yu'un smacoj sba ta na, te yu'un yac ta tsa'anel.

²⁵ C'alal jalajemiquix ta smaliyel, jajch' ta woclajel yo'tanic yu'un te ma xloc' tel te ajwalile. Jich yu'un la stsaquic te llave, la sjamic te sti' na. Te c'alal a jam yu'unic, lajemix la staic te yajwalique.

²⁶ Te bit'il yacalic ta xch'ayel c'aal yu'un smaliyel, te Aod loq'uix ta anel. C'ax bael ta bay loc'ombaetic ta Gilgal, ba snac' sba ta Seirat.

²⁷ C'alal c'ot ta sq'uinal israeletic, la yoq'uesin xulubil ta bay witstiquil yu'un Efraín ta swenta yiq'uel tel te israeletique. Spisilic coic bael ta witstiquil, tsobilic bael yu'un Aod.

²⁸ Te Aod la yalbey te ya me sts'aclinic bael, melel te Cajwaltic ya yac'bey stsal te scontroique, ja' te moabetique. Jich la sjoinic bael. La yich'ic te tec'oja' yu'un Jordán, soc ma'yuc mach'a la yac' c'axel jtuluc.

²⁹ Ja' yorail a te la smilic lajunmil (10,000) ta jtul moabetic, spisil te soldadoetic tulanic soc te ma xiwique, ni jtuluc cuxul a jil.

³⁰ Awaiy bit'il la yich'ic stsalel te moabetic yu'un te israeletique. Ta patil chanwinic (80) ja'wil lamaj c'op ta bay te q'uinale.

Samgar la scoltay Israel ta sc'ab filisteoetic

³¹ Te yan jtsobwanej, ja' te Samgar te snich'an Anat. La smil lajunwinic xcha'bajc' (600) filisteoetic ta sni' staq'uinal stijibal joc'lum-wacaxetic, aguijada sbiil. Te Samgar jich la scoltay te Israele.