Josué 9 - Bible in Tzeltal de Oxchuc y Tenejapa

Trato soc gabaonetic

¹ Te ajwaliletic yu'un te hititaetic, amorreoetic, cananeoetic, ferezeoetic, heveoetic soc te jebuseoetique, la yaiyic stojol te bila c'oem ta pasele. (Tey nainemic ta stojol smalib c'aal yu'un te muc'ja' Jordán: ta bay witstiquil, ta bay alan q'uinal bael yu'une, soc ta spamlej bael ta ti'ti' muc'ul Mar Mediterráneo, ja' to ta sq'uinal Líbano.)

² Spisilic la xchap sc'opic, jich la stsob sbaic ta yac'beyel guerra te Josué soc te israeletique.

³ Ja'uc me to, te heveoetic te nainemic ta Gabaón, la yaiyic stojol te bi la spasbey Josué te cha'pam lum, ja' te Jericó soc te Hai.

⁴ La snopic te ya xba slo'layic ta c'op, jich bajt'ic. Te sburroique la yac'beyic bael scuch c'a' coxtaletic, soc c'a' nujc'uletic; ja' te yawil ya'lel ts'usube, lomeniquix soc pac'antaybiliquix.

⁵ Soc la slapic bael pocol c'u'iletic soc c'a' xanabiletic te pac'antaybiliquixe. Ja' la yich'ic bael sbeibinic taquin pan te yaquix ta totobel.

⁶ C'alal c'otic ta Gilgal ta scampamento te israeletique, jich c'o yalbeyic te Josué soc te israeletique: —Talotic ta c'ubul q'uinal. Te jo'otic ya jc'antic ta atojolic te yacuc jchap jc'optic —xiic c'oel.

⁷ Te israeletic la sjac'beyic sc'op te heveoetique: —Teme repente nopol nax ayex, ¿bit'il ya jchaptiquix jc'optic a? —xiic.

⁸ Ja'uc me to, la yalbeyic te Josué: —Te jo'otic ya cac' jbajtic ta abatinel awu'unic —xiic. La sjojc'obey: —¿Mach'aex a te ja'exe? ¿Banti talemex? —la yut.

⁹ La sjaq'uic: —C'ubul talemotic ta scaj te pujq'uem sc'oplal te Ajwalil te Dios awu'unique. Caiyojtic stojol spisil te bi la spas ta Egipto,

¹⁰ soc te bi la spasbey te cheb ajwaliletic yu'un te amorreoetic ta jejch' ja' Jordán, ja' te Sehón te ajwalil yu'un te lum Hesbón, soc te Og, te ajwalil yu'un Basán, te nain ta lum Astarot.

¹¹ Jich yu'un te mamaletic cu'untic soc spisil te jlumale, la yalbotic: “Chajbanaic bael awe'elic ta swenta abeibic, baanic ta banti ayique. Albeyaic te ya cac' jbajtic ta abatinel ta stojolic, soc te yacuc sc'anic te ya jchap jc'optic soque”, la yutotic tel.

¹² Te c'alal loc'otic tel ta jlebeltiquex, ja' in pan to q'uixin to a, ora yo'tic bacubenix soc yaquix ta totobel.

¹³ Ja' nix jich in nujc'ul to yach'ilic a te la cac'beytic tel sbaalin te ya'lel ts'usube, ora yo'tic lomeniquix. Jich nix te jc'u'-jpac'tic soc te jxanabtique, melel mero najt' te bay talotique —xiic.

¹⁴ Te israeletic la spasbeyic prueba swe'elic te gabaonetic; ja'uc me to, ma la sjojc'obeyic te Cajwaltique.

¹⁵ Jich yu'un te Josué la xchap sc'op soc te lamal nax yo'tan ya xc'ot soque, jich la yal ta jamal te ya yac' cuxinuque. Te yantic jwolwanej-israeletic jich nix la yalic ta jamal.

¹⁶ Ta yoxebal c'aal ta patil, te israeletic la yaiyic stojol te nopol nax ayic te gabaonetic, te ja' mero slac'oj sba soc te q'uinal te ba ayique.

¹⁷ Jich loc' sleic. Ta yoxebal c'aal c'otic ta bay te lumetic yu'unique, ja'ic te Gabaón, Cafira, Beerot soc Quiriat-jearim.

¹⁸ Ja'uc me to, te israeletic ma la smilic, melel te jwolwanej-israeletique yalojic ta jamal ta stojol Cajwaltic te Dios yu'un Israel te ma xyaq'uic ta lajele. Ja' swentail te jajch'ic ta c'op te israeletic ta stojol te jwolwanejetic yu'unique.

¹⁹ Te jwolwanejetic la yalbeyic: —Te jo'otique calojtic ta stojol Cajwaltic te Dios cu'untic te israelotic te ma ba ya jmiltique. Jich ma'yuc bi ya jpasbeytic, ni jtebuc.

²⁰ Ya me cac'tic cuxinuc, melel teme ya jintic te bit'il calojtique, ya me x'ilinix Dios ta jtojoltic —xiic.

²¹ La yalic mandal te jwolwanej-israeletic te ya yac' cuxinuque; ja'uc me to, ja' ya x'ochic ta scuchel si' soc ta sliquel ja' yu'un spisil te lume. Te jwolwanejetic jich ma la yac' ch'ayuc te bit'il yalojic ta jamale.

²² Te Josué la yic' tel te gabaonetic, la sjojc'obey: —¿Bi yu'un te la alo'layotic ta c'op, te la awalic te c'ubul talemex ta ac'opique, te bit'il nopol ayexe?

²³ Mero ma me lecuc ac'oplal ya xc'oex yu'un, abatex me ya xc'oex ta jc'axel. Ya me ach'uyic si' soc ya me aliquic ja' te ya xtuun ta sna te Dios cu'une —la yut.

²⁴ La sjac'beyic sc'op te Josué: —Jich la jpastic, melel bayal xiwotic yu'un teme ya xba amilotique. Yu'un caiyojtic stojol te Ajwalil, te Dios awu'unique, la yalbey Moisés, te yabate, te ya yac'beyex spamal te q'uinale soc ya yich' milel spisil te mach'atic nainemic tey ae.

²⁵ Ja'uc me to ayotic me ta ac'ab, pasbotic ta jtojoltic te bila lec ya awaiy ta awo'tanic, soc te bila toj ta pasel ya awaiyique —xiic.

²⁶ Te Josué ma la yac'bey permiso te israeletic te ya smilic te gabaonetique;

²⁷ ja'uc me to, la yac' ta scuchel si' soc ta sliquel ja' yu'un te lum soc te xchic'jibal smajt'an te Cajwaltic, chican ta bay ya stsabey yawil stuquele. Te gabaonetic jich nix yat'elinejic ta ora yo'tic to.