Josué 8 - Bible in Tzeltal de Oxchuc y Tenejapa

Och ta sc'abic Israeletic te lum Hai

¹ Te Cajwaltic la yalbey te Josué: —Ma me xiwat, ma me xpejc'aj awo'tan. Tsoba spisil te soldadoetic awu'une; moanic bael, ac'beyaic guerra te lum Hai. Jo'on ya cac'bat atsal te ajwalil yu'un lum Hai soc te yajwale. Jich me ya awich'beyic te slumal soc spisil te sq'uinale.

² Lajina jilel ta milel te lum Hai soc te ajwalil yu'une, jich bit'il la alajin jilel te Jericó soc te ajwalil yu'une. Ta ora yo'tic ya me xju' ya awu'uninbeyiquix te sbiluquic soc xchamsbalamic te mach'atic ya xlajique. Chajbana te soldadoetic awu'un, muquen ya xba snac' sbaic ta bay spat bael te lume. Jich ma sna'ic te bila muquen ya xtal ta stojolique —xi' te Cajwaltique.

³ Te Josué la xchajban spisil te swinictaque swenta yu'un ya me xbajt'ic ta stojol lum Hai. La stsa lajuneb xcha'winic ta jmil (30,000) soldadoetic. Ta ajc'ubal la sticun bael.

⁴ Jich mandal la yalbey bael: —Aiya awaiyic ta lec te bi ya calbeyexe. Baanic nac'a abaic ta spat te lume, chapaluquex me ta apisilic.

⁵ Te jayeb xan soldadoetic ya xjile, ya me xtalon soc ta stojol te lume. Te c'alal ya xloq'uic tel te yajwal lum Hai ta stsalbelotic, ya me x'anotic loq'uel ta stojolic yilel, jich te bit'il la spasbotic ta neelale.

⁶ Ya me snutsotic bael, jich me ya scuyic te ayotic ta anel ta yan bueltae.

⁷ Jich yu'un te ja'exe ya me xloq'uex tel ta bay anac'oj abaique. Ya me awu'uninic te lume, melel te Cajwaltic te Dios cu'untique ya yac'botic ta jc'abtic.

⁸ Te c'alal ayix ta ac'abic a, chic'aic me, jich bit'il yaloj mandal te Cajwaltic, melel ja' smandal stuquel —xi'.

⁹ Jich yu'un te Josué la yalbey mandal te ya xbajt'ique. Jich bajt'ic ta snac'bel sbaic ta bay olil ay yu'un te lum Betel te lum Hai, ja' ta swenta smalib c'aal yu'un Hai. Yan te Josué c'ax ajc'ubal yu'un ta campamento.

¹⁰ Ta yan c'aal jajch' ta buen sab te Josué, la stsob tel yil te soldadoetic yu'une. Neelaj c'axel ta ic'aw ta stojolic, sjoinej c'axel ta ic'aw te mamaletic yich'oj yat'elic yu'un Israel, ba situy sba soc lum Hai.

¹¹ Spisil te soldadoetic noptsajic bael ta yelaw te lume. Tey la spas scampamentoic a ta bay stojol norte yu'un te lume, la yac' sbaic ta jejch' stenlej xatal q'uinal yu'un te lum Hai.

¹² Te Josué la snac' jo'mil (5,000) soldadoetic ta bay olil yiloj sba soc lum Betel te lum Hai, ta bay smalib c'aal yu'un te lume.

¹³ Ja' yu'un te soldadoetic cha'chajp a loc' a. Te jchajbe ba snac' sbaic ta smalib c'aal yu'un te lume. Te yane ja' te la spasic scampamentoic ta stojol norte. Ta ajc'ubal neelaj bael te Josué soc soldadoetic yu'un c'alal ta yolil stenlej xatal q'uinal.

¹⁴ C'alal la yil te ajwalil yu'un Hai te scontroe, loq'uic tel ta animal soc spisil te swinictaque, swenta yu'un tal stsal sba soc te israeletic te banti ya xchicnaj spamlej yu'un Jordán. Mero ma la sna' teme ay yantic israeletic snac'oj sbaic ta bay spat te lume.

¹⁵ Te Josué soc te soldadoetic yu'une jich la scuy sbaic te jajch'ic loq'uel ta anele. Anic bael yilel yu'un swinictac te lum Hai, ta bay sbelal bael te jochol taquin q'uinale.

¹⁶ Spisil swinictac te lum Hai pasotic ta mandal te ya snutsic bael te Josué. Te bit'il jich la spasic, najt' jil yu'unic te lume.

¹⁷ Ma'yuc jtuluc winic jil ta lum Hai soc ta lum Betel, spisilic la snutsic bael te israeletique. Te bit'il ja' bajt' ta yo'tanic te nutsawe, jich ma'yuc jil scanantayel te lume.

¹⁸ Jich yu'un te Cajwaltic la yalbey te Josué: —Ac'beya señail yil yantic te ya x'ochiquix ta yich'el te lum Hai. Jo'on me ya cac'bat ta ac'abic —xi' sc'oplal te Josué. Te Josué la yac'bey señail ta yalel mandal te ya x'ochiquix ta yich'el te lume.

¹⁹ Jich yu'un te mach'atic snac'oj sbaique, ora nax a loq'uic tel ta bay nac'alic, animajic ochel ta lum. La yu'uninic te lume, la yac'beyic sc'aal.

²⁰ Te winiquetic yu'un te lum Hai, te c'alal la sujt'es sba yilic, xtometix moel xch'ailel te lum c'alal ta toyol te la yilique. Ma'yuc bay ya xju' ya xloq'uic ta anel ni jtebuc, melel te israeletic te anic bael yilel ta sbelal jochol taquin q'uinal, sujt'ic tel, och yac'bey sbaic guerra soc.

²¹ Te Josué soc spisil te israeletic la yilic te la yu'uniniquix te lum te mach'atic la snac' sbaic ta spate, soc te la yac'beyiquix sc'aal. Jich sujt'ic tel, ja' tal yac'beyiquix guerra soc te yajwal lum Hai.

²² Te israeletic te la yu'uniniquix te lume, loq'uic tel, tal slapic ta olil te swinictac Hai. Jajch' yac'bey sbaic guerra soc, ja' to c'alal la smilic ta spisil.

²³ Ja' nax cuxul la yijq'uitayic te ajwalil yu'un lum Hai. La xchuquic, la yiq'uic bael ta stojol Josué.

²⁴ Te israeletic la smilic ta puñal spisil te yajwal lum Hai te nutsotic bael yu'unique. C'alal lajix yo'tanic a, ochic bael ta yutil lum. Jich la smilic te jayeb mach'a ayic to xan tey a.

²⁵ Jich c'aal a te lajic lajchaymil (12,000) ta jtul te ants-winiquetic ta lum Hai.

²⁶ Te Josué ma la yijq'uitay te lum ja' to chican laj ta jinel yu'unic ta spisil.

²⁷ Te israeletic jil ta swentaic te xchamsbalamic soc spisil te biluquetic te ay ta lume, jich bit'il yaloj Cajwaltic ta stojol Josué.

²⁸ Te Josué la xchic' te lum Hai, busulbus a jil, asta c'alal ora chican yo'tic.

²⁹ Te ajwalil yu'un lum Hai la yich' lujch'anel moel ta ni'te' yu'un te Josué ta sjunal c'aal, ja' to c'alal mal te c'aale. C'alal ch'ay bael c'aal, la yal mandal ta cojtesel. Tey la xch'ojbeyic jilel sbaq'uetal ta yochibal te lume, la sbusanbeyic ton ta sba. Chican yo'tic te ton busule.

Josué la yal ta wits Ebal bitic ts'ibubil ta sjunal mandaliletic

³⁰ Te Josué la sts'ajc'uy scajtijib ta chiq'uel smajt'an Cajwaltic te Dios yu'un Israel ta wits Ebal,

³¹ jich bit'il yaloj jilel mandal ta stojol israeletic te Moisés, te yabat Cajwaltic. Ja' te bit'il ts'ibubil ta libro yu'un Moisés: “Te scajtijib ta chiq'uel jmajt'ane ja' me te ma walubiluc tonetic”, te xie. Jich yu'un te israeletic la yac'beyic milbil smajt'an, la xchic'beyic ta sba scajtijib, soc la smilbeyic yantic majt'anil swenta seña lamal-o'tanil.

³² Te Josué la spasbey ta stojol israeletic te la sts'ibuy ta tonetic te mandaliletic, ja' te la yac' jilel Moisés.

³³ Ta spisil te lum, ja' te sts'umbal Israel soc te jyanlumetic te sjoinej sbaic soque, spisil te mamaletic yich'oj yat'elic yu'un Israel, soc te jchajbanwanejetique, talic ta spisilic ta sts'eel scajonil trato yu'un te Cajwaltique, soc ta stojol te sacerdote-levitaetic te sq'uechojic ta snejq'uelique. Olil te lume la stejc'an sbaic ta yelaw wits Gerizim, soc te olil xane la stejc'an sbaic ta yelaw wits Ebal, jich te bit'il yaloj mandal c'alal ta xjajch'ibal te Moisés te yabat te Cajwaltique.

³⁴ Ta patil te Josué la stejc'an sba ta yalel juju-jp'al te mandaliletic te ay ta libro, pajal la yal te bitic swenta bendición soc te bitic swenta castigo ya xc'otic ta loq'uel yu'une.

³⁵ Te Josué ma'yuc bay jil ta alel jp'aluc yu'un ta spisil te mandal yaloj Moisés ta stojol stsojbol te lum Israel, soc te antsetic, alaletic, soc te jyanlum winiquetic te jun ayic soque.