Josué 7 - Bible in Tzeltal de Oxchuc y Tenejapa

Smul Acán

¹ Ay jtul te ay ta swenta sts'umbal Judá, Acán sbiil. Ja' snich'an Carmi, smam Zabdi, soc ja' xcha'lamal smam te Zara. Ay biluc la stsac te albil sc'oplal te ya yich'ic jinel ta jc'axele. Ja'uc me to, spisil israeletic la smulinic ta stojol te Cajwaltique, melel Acán la stsac te biluquetic albil mandal yu'un te ya yich' jinel ta jc'axele. Ja' swentail te bayal ilin Cajwaltic ta stojolic.

Castigo yu'un mulil, ja' te la yich'ic tsalel yu'un lum Hai

² Te Josué ay la sticun bael winiquetic ta Jericó te bajt'ic ta Hai te ay ta stojol sloq'uib c'aal yu'un Betel, te nopol yiloj sba soc te Bet-avén. Yich'ojic mandal te ba stsajtayic te q'uinale. Jich a bajt'ic, ba stsajtayic tel.

³ Te c'alal sujt'ic tel, la yalbeyic te Josué: —Ma puersauc ya xbajt'ic spisil, ac'a bajt'uc cha'miluc, oxmiluc, tic' nax ya cu'unintic a te lume. Ma me x'aticun bael spisil, melel te yajwal Hai, ma'yuc tsobolic —xiic julel.

⁴ Ja' yu'un moic bael ja' niwan oxmil (3,000) winiquetic bajt'ic ta stsalel te Hai. Ja'uc me to te yajwal Hai, ja' la yaiyic tsalaw, soc la stenic bael te israeletique.

⁵ Ay la yich'ic milel waclajuneb xcha'winic (36) ta jtul. Te yantique la yich'ic nutsel bael c'alal ta yochibal te lume, ja' to c'alal ta bay sloq'uesjibal tonetic, ta bay coel tey la yich'ic milel a. Ja' swentail te pejc'aj yo'tanic te israeletique, ch'ay yip te yo'tanique.

⁶ Te Josué soc te mamaletic yich'oj yat'elic yu'un Israel, la xch'i' sc'u'ic yu'un, la yaq'uic tan ta sjolic swenta seña xc'uxul mel-o'tan, soc la stinan sba coel c'alal ta lum ta stojol te cajón yu'un te Cajwaltic, ja' to c'alal ch'ay bael te c'aale.

⁷ Jich la yal te Josué: —¿Cajwal, bistuc la ac'asesotic tel soc spisil te lum ta muc'ja' Jordán? ¿Yu'un bal li' ya awac'otiquix ta sc'ab a te amorreoetic te ya smilotic ta jyalele? ¡Teyuc laj jilucotic a ta bay jejch' ja' Jordane!

⁸ Cajwal, ¿bi ya caltic yo'tic? Melel te jlumal israeletic aniquix loq'uel tel ta stojol te jcontrotique.

⁹ Teme ya yaiy stojol te cananeoetic soc spisil te mach'atic nainemic ta spamal q'uinale, ya me xtal smilotic ta jc'axel, ni ma'yuc jna'jibaltic ya xjil. ¿Bi ya apas te bit'il muc' te abiile? —xi' te Josué.

¹⁰ Te Cajwaltic la sjac': —Jajch'an, ¿bi ya apas te pacalat ta lume?

¹¹ Te alumal israeletic staoj smulic. La xc'axintayic te trato la jchap soque, melel la stsaquic te biluquetic la calbey sc'oplal te ma stsaquique. Sna'ojic stojol te ma'yuc permiso ya stsaquic; ja'uc me to, la stsaquic ta puersa. Tey snac'ojic ta bay sbiluquic.

¹² Ja' swentail te ma xju' yu'unic stsalel te scontroic te alumale, ya me xloq'uic ta anel ta stojolic. Ta ora to ja' ya sc'an te ya yich' milel spisil te alumal Israel te jichuque. Teme ma ba ya ajinic ta ora te bi la calbey sc'oplal ta jinele, jich ma xtal joinex xan.

¹³ Jajch'an tsoba te lum Israel. Albeya ac'a xchajban sbaic te ya xtal stejc'an sbaic ta jtojol te pajele. Melel jo'on te Ajwalilon te Dioson awu'unic jich me ya calbey: “Ja'ex ta apisilic la atsaquic te bila sc'oplal ya yich' jinel ta jc'axele. Jich yu'un teme ma ba ya ajin, soc teme ma ba ya aloq'ues ta atojolic, ma xju' ya atsal te acontroique” ya me cut.

¹⁴ Te pajel apisilic me ya atejc'an abaic ta jtojol ta chajbalchajp ats'umbalic. Te jchajp ya cac' ta ilele, ya me stejc'an sbaic ta jtojol te xchajbal te sts'umbale. Te jchajp xan te ya cac' ta ilele, ya me stejc'an sbaic ta jtojol ta chajbalchajp na. Te jchajp na ya cac' ta ilele, ya me xtal stejc'an sba ta jtojol te winic soc te snich'nabe.

¹⁵ Te mach'a yich'oj te bila sc'oplal ya yich' jinel ta jc'axele, ya me yich' chiq'uel ta sjunal sna soc spisil te sbiluque, ta scaj te la spas te bila ma lecuc ta yolil Israel. Ma la xch'uunic te bi la cal ta atojolique —xi' te Cajwaltique.

La yich' milel Acán

¹⁶ Te Josué buen sab jajch' ta yan c'aal. La yalbey mandal te lum te ya xtal stejc'an sbaic ta stojol Cajwaltic ta chajbalchajp sts'umbal. Te Cajwaltic la yac' ta ilel te sts'umbal Judá.

¹⁷ Jich te Josué la yalbey te sts'umbal Judá te ya stejc'an sbaic ta stojol Cajwaltic ta chajbalchajp. Ac'ot ta ilel te mach'atic sts'umbal Zara. Ta spisilic te mach'atic sts'umbal Zara, ac'ot ta ilel te mach'atic yal-snich'an jilel Zabdi.

¹⁸ C'alal tal juju-jtul te yal-snich'an jilele, ja' ac'ot ta ilel Acán snich'an Carmi, te ja' smam te Zabdi, soc ja' xcha'lamal smam te Zara, te ay ta swenta te sts'umbal Judá.

¹⁹ Jich yu'un te Josué la yalbey te Acán: —Jnich'an, ac'a ta ilel yutsilal te Cajwaltic te Dios cu'untic te israelotique, ac'a ta ich'el ta muc'. Albon caiy te bila apasoje, ma me x'amuc ta awo'tan —la yut.

²⁰ Te Acán la sjac': —Melel nix a, ya cal ta jamal te jtaoj jmul ta stojol te Cajwaltic te Dios cu'untic te israelotique. Ja' la jpas in to:

²¹ Ta yolil te biluquetic la jtatic ta Jericó, la quil t'ujbil c'u'il talem ta Babilonia, soc ay lajunwinic (200) ta sejp plata, soc ay jpejch' oro te c'axem ta olil kilo yalal. Ja' la jmulan ta lec te biluquetique, jich yu'un la quich' jilel. Tey mucajtic cu'un ta jnailpac', te taq'uine ay ta yet'al —xi'.

²² Te Josué la sticun bael cha'oxtul winiquetic ta snailpac' te Acán. Tey la stabeyic spisil a te bitic nac'bil yu'une, soc te plata ay ta yet'al.

²³ La stsaquic loq'uel, la yich'ic bael ta stojol Josué soc ta stojol te israeletic, soc te la yac'beyic ta stojol te Cajwaltique.

²⁴ Ta patil la yiq'uic bael te Acán ta stenlej xatal q'uinal yu'un Acor, soc te plata, c'u'il, te jpejch' oro, te snich'nab queremetic soc ach'ixetic, te wacaxetic soc te chijetic yu'une, te snailpac' soc spisil te bitic ay yu'une.

²⁵ Te Josué la yalbey: —¿Bi yu'un te la awich'botic tel woclajel ta jtojoltic? Ta ora yo'tic te Cajwaltic ja' me ya yac' c'otuc ta awenta te woclajel te la awich'botic tele —xi'. C'alal laj yo'tan ta yalel, spisil te israeletic la smilic ta ch'ojel ta ton te Acán soc te mach'atic ay yu'une. Ta patil la xchiq'uic,

²⁶ muc' la sbusanbeyic tonetic ta sba, te chican ta ora yo'tic. Ja' swentail Acor, xi' sbiil te stenlej xatal q'uinale. Jich a lamaj yilimba Cajwaltic ta stojol Israel.