Josué 6 - Bible in Tzeltal de Oxchuc y Tenejapa

Chajbaj bit'il och ta c'abal Jericó

¹ Ma'yuc jtuluc mach'a ya xju' ya x'och bael, soc ma'yuc mach'a ya xju' ya xloc' tel ta Jericó, melel la smacbeyic te yochibal sts'ajc'ul te lum ta sjoyobale. Yu'un jich ya scoltay sbaic ta sc'ab ta sc'opic a te israeletique.

² Te Cajwaltic la yalbey te Josué: —Te jo'one cac'ojbatix ta ac'ab te Jericó, te muc' ajwalil yu'un soc te soldadoetic yu'une.

³ Jich yu'un ja'ex te soldado-israelex jun me buelta ya xbeenex ta sjoyintayel jujun c'aal te lume, waqueb me c'aal te jich ya apasique.

⁴ Juctul sacerdoteetic ya xneelajic ta beel yu'un te scajonil trato te q'uechbil baele, te juju-jtule ya me yich'ic xulubil tat chij. Ta sjuquebal c'aal juqueb me buelta ya sjoyintayic te lume, soc te sacerdoteetic ya me yoq'uesinic te xulubil yu'unique.

⁵ Te c'alal ya awaiybeyic stojol sc'op te xulubil yu'unic te ya xjalaj ta oq'uesinel yu'unique, tulan me ya x'awunex. Jich me ya xjin coel a te sts'ajc'ul te lum Jericó. Jich yu'un juju-jtul toj me ya x'animajex ochel ta yutil te lume —xi' te Diose.

⁶ Te Josué la yic' tel te sacerdoteetic, jich la yalbey: —Q'uechaic bael te scajonil trato yu'un te Cajwaltique. Te ja'ex te juctulexe, neelajanic bael yu'un te cajón soc xulubil tat chij —xi'.

⁷ Soc jich la yalbey te israeletique: —Baanic joyintayaic te lume. Te winiquetic te yich'oj yat'ejibic yu'un guerra, ac'a neelajuc bael yu'un a te cajón yu'un Cajwaltic —xi'.

⁸ Jich la spas spisilic te bit'il la yal mandal te Josué. Te juctul sacerdoteetic neelajic c'axel ta scajonil trato yu'un te Cajwaltique, yacalic ta yoq'uesinel ta sjuctululic te xulubil yu'unique. Tey ay bael ta spatic te scajonil trato yu'un te Cajwaltique.

⁹ Te winiquetic te yich'oj yat'ejibic yu'un guerra, neelajic c'axel ta stojol te sacerdoteetique. Ay xan beenic bael ta scanantayel ta spat te scajonil trato. Te sacerdoteetic tey yacalic ta yoq'uesinel xulubil yu'unic, mero ma scom sbaic ta yoq'uesinel.

¹⁰ Te Josué la yalbey mandal ta spisil te winiquetic, te ch'abaluc nax q'uinal te ya xbeenique, ja' to te c'alal ya yal mandal te ya x'awunic soc spisil te yipique.

Och ta c'abal Jericó

¹¹ Te Josué la yac' beenuc ta q'uechel scajonil trato yu'un Cajwaltic te ya sjoyintayic jun buelta te lume. Patil sujt'ic bael ta scampamentoic, tey c'ax ajc'ubal yu'unic a.

¹² Te Josué buen sab jajch' ta yan c'aal. Te sacerdoteetic la sq'uechic bael te cajón yu'un te Cajwaltique.

¹³ Te juctul sacerdoteetic neelajic bael, patil ay te cajón yu'un te Cajwaltique. Ma ba quejch'ajic ta beel soc ma ba quejch'ajic ta yoq'uesinel te xulubil yu'unique. Te winiquetic te yich'oj yat'ejibic yu'un guerra, neelaj bael stuquelic, te yantique beenic bael ta spat te cajone. Te xulubil yu'unique ma ba quejch'ajic ta yoq'uesinel.

¹⁴ Ta xchebal c'aal ja' nix jich la sjoyintayic jun buelta te lume. Sujt'ic xan bael ta scampamentoic. Jich la spasulayic bael te waqueb c'aale.

¹⁵ Ta sjuquebal c'aal jajch'ic ta buen sab. La sjoyintayic te lume, jich te bit'il la spasiquix tel te waqueb c'aale; ja'uc me to, la sjoyintayiquix juqueb buelta te jun c'aale.

¹⁶ Te c'alal la yoq'uesinic xulubilic ta sjuquebal buelta te sacerdoteetic, te Josué la yalbey mandal te israeletique: —¡Awunanic! Te Cajwaltic yac'ojbotiquix ta jc'abtic te lume.

¹⁷ Ta spisil te bitic ay yu'un te lume, pajal me ya yich' lajinel ta jc'axel, melel jich yaloj mandal te Cajwaltique. Ja' nax me ya awac' cuxinuc stuquel te jmulawil ants Rahab soc spisil te mach'atic snac'oj sbaic ta snae, melel te antse la snac' te jtsajtaywanejetic la jticuntique.

¹⁸ Soc te ja'exe ma me ayuc bi ya atsaquic jtebuc te bitic ay yu'un te lume, melel te Cajwaltic ya yac' ta lajinel ta jc'axel. Teme ay mach'a ya stsaque, ya me xtal woclajel ta jtojoltic jpisiltic te israelotique, ya me yac'otic ta jinel.

¹⁹ Yan te oro soc plata soc spisil te bitic pasbil ta bronce soc ta hierro, ya me yich' aq'uel ta stojol Cajwaltic, ya me yich' q'uejel —xi' te Josué.

²⁰ Awunic te israeletic, oq'uesinot te xulubiletique. C'alal la yaiyic stojol sc'op te xulubiletic, jajch'ic ta buen tulan aw, jich jin coel te sts'ajc'ul te lume. Jich toj ochic bael ta sjinel te lume.

²¹ Jajch' smilic ta puñal te winiquetic, antsetic, muc'-biq'uitetic, soc te me'el-mamaletique. La smilic te wacaxetic, te chijetic soc te burroetique. Spisil la slajinic ta milel ta jc'axel.

²² Te Josué la yalbey te jtsajtaywanejetic yu'un te q'uinale: —Baanic ta sna te jmulawil antse, loq'uesaic tel ta sna soc spisil te mach'atic ay yu'une, jich me te bit'il la awalbeyic jilele —xi'.

²³ Jich ochic bael ta sna, la sloq'uesic tel te Rahab, soc sme'-stat, sbanquiltac, yijts'inab soc spisil te yermanotaque. Parte la yaq'uic ta nopol scampamentoic te israeletique.

²⁴ Te israeletic la xchiq'uic te lum soc spisil te bitic ay tey a. Ja' nax la sloq'uesic te plata, te oro soc te bitic pasbil ta bronce soc ta hierro. La yaq'uic ta sq'uejibal ta stojol te Cajwaltique.

²⁵ Ja'uc me to, te Josué la yac' cuxinuc te Rahab soc spisil te mach'atic ay yu'un, melel la snac' te jtsajtaywanejetic la sticun tel ta Jericó. Jich la sjoin sbaic soc spisil sts'umbal Rahab te israeletique.

²⁶ Te Josué ay bila jamal la yal: —Ch'aybil me ya xc'ot ta sit Cajwaltic te mach'a ya snop ta yo'tan te ya xcha'pas xan te lum Jericó. Ya me xlaj te sba snich'an te bi ora ya yac'bey yiptajibe, soc te bi ora ya snajc'anbey spuertail te sts'ajq'ue, ya me xlaj te ijts'inale —xi'.

²⁷ Te Cajwaltic la scoltay te Josué, jich pujc' bael sc'oplal ta spamal te q'uinale.