Josué 4 - Bible in Tzeltal de Oxchuc y Tenejapa

Lajchayeb tonetic la sloq'uesic ta muc'ja' Jordán

¹ Te c'alal lajic ta c'axel ta spisilic ta muc'ja' Jordán, te Cajwaltic la yalbey te Josué:

² —Tsaa lajchaytul winiquetic yu'un te lume, juju-jtul ya xloc' te juju-jchajp sts'umbale.

³ Albeya ac'a sloq'uesic lajchayeb tonetic ta yolil ja', ja' me te bay teq'uelic te sacerdoteetique. Ac'a yich'ic bael, tey me ya xc'o yaq'uic ta banti ya xc'o spas scampamentoic in ajc'ubal to —xi' te Cajwaltique.

⁴ Jich yu'un te Josué la yic' tel te lajchaytul winiquetic stsaoje.

⁵ Jich la yalbey: —Ochanic bael ta yolil te taquin yoc Jordán, ta stojol te scajonil trato yu'un te Cajwaltic te Dios cu'untique. Ta juju-jtulex tsacaic juju-jp'ij ton, cajanaic tel ta anejq'uelic, juju-jp'ij me ta swenta juju-jchajp te jlumaltic Israel. Ts'acal me lajchayeb ya xc'ot ta spisil.

⁶ Ja' me ya xtuun cu'untic swenta prueba pajel cha'wej bael, melel teme ya sjojc'obeyex te awal-anich'anique: “¿Bi swentailuc te tonetic?” teme xiique,

⁷ jich me ya asujt'esbeyic te sc'opique: “Ja' te c'alal c'ax ta muc'ja' Jordán te scajonil trato yu'un Cajwaltic, la scom sba ta oquinel te ja'e, jich taquej bael te slumile. Ja' swentail te tonetic te ya xtuun cu'untic ta sna'el sbajt'el q'uinal te bila c'ot ta pasel li'to”, ya me awutic —xi'.

⁸ Jich te lajchaytul winiquetic la spasic te bit'il la yal mandal te Josué: la stsaquic tel lajchayeb tonetic ta Jordán, jujun la yich'beyic swenta juju-jchajp sts'umbal Israel, la yich'ic tel ta bay scampamentoique. Tey la yaq'uic a te tonetique, jich bit'il yalojbey Cajwaltic te Josué.

⁹ Te Josué la to sts'ajc'uy xan lajchayeb tonetic ta bay yolil te muc'ja' Jordán ta bay la stejc'an sbaic te sacerdoteetic ta sq'uechel scajonil te tratoe. Te tonetic li'to ayic yo'tic a.

¹⁰ Te sacerdoteetic te la sq'uechic bael te scajonil trato, tey teq'uelic a ta yolil Jordán te c'alal yacalic spasel spisil israeletic te bi albil mandal yu'un Cajwaltic te Josué. Spisil la yich' pasel jich nix bit'il yaloj mandal Moisés ta stojol te Josué. Te israeletic la yaq'uic puersa ta c'axel ta bay taquejeme.

¹¹ Te c'alal spisilic ayiquix ta jejch' ja', c'axic bael te sacerdoteetic soc te scajonil trato yu'un te Cajwaltique, ja'ic j'ic'wanejetic yu'un te lume.

¹² C'axic bael ta taquejem ja' uuc te mach'atic chapalic yu'un guerra te ayic ta swenta sts'umbal Rubén soc sts'umbal Gad soc te olil sts'umbal te Manasés. Neelajic bael yu'un te yantic israeletic, jich te bit'il albil jilel mandal yu'un Moisés.

¹³ Nopol cha'winic ta jmil (40,000) winiquetic te chapalic soc yat'ejibic te ya x'ochic ta guerrae c'axic bael ta stojol te Cajwaltic, bajt'ic ta stojol spamlejetic yu'un Jericó.

¹⁴ Ja' jich c'aal a te jajch' ta muc'ubel sc'oplal yu'un Cajwaltic te Josué, jich jajch' yich'ic ta muc' spisil te israeletic, jich bit'il la yich'ic ta muc' Moisés te jayeb c'aal cuxine.

¹⁵ Jich yu'un te Cajwaltic la yalbey te Josué:

¹⁶ —Pasa ta mandal te sacerdoteetic te sq'uechojic te scajonil trato, ac'a loc'uc bael spisilic ta yolil Jordán —xi' te Diose.

¹⁷ Jich la yal mandal te Josué te ya xloq'uic baele.

¹⁸ Te c'alal nax a loq'uic ta Jordán te sacerdoteetic soc te la steq'uic te taquin lumq'uinale, te ja'e oquin tel ta ora, la sta yawil soc mal loq'uel ta sti'il, jich te bit'il ta neelale.

¹⁹ Te israeletic loq'uic tel ta Jordán ta slajunebal c'aal xjajch'el a te sbabial u. Tey c'o spas scampamentoic ta Gilgal, ja' te bay stojol sloq'uib c'aal yu'un Jericó.

²⁰ Te Josué tey la stejc'an a te lajchayeb tonetic te la yich'ic loq'uel tel ta bay taquej te Jordán.

²¹ Jich la yalbey te israeletique: —Teme ay bi ora ya sjojc'obeyex te awal-anich'anique: “¿Bi swentailuc te tonetic?” teme xiique,

²² albeya me yaiyic: “Ja' swentail te taquinaj te muc'ja' Jordán, te c'axic tel tey a te lum Israele.

²³ Te Cajwaltic te Dios cu'untic la staquintesbotic ya'lel te Jordán te c'alal yacotiquix ta c'axel tel a, jich nix bit'il la staquintes te Mar Rojo te c'axotic tey a.

²⁴ Jich yu'un ya me sna'ic spisil lumetic ta balumilal te bayal yu'el te Cajwaltique, soc te ja'exe ya me awich'ic ta muc' te Cajwaltic te Dios cu'untic sbajt'el q'uinal”, utaic me —xi' te Josué.