Josué 3 - Bible in Tzeltal de Oxchuc y Tenejapa

Israeletic c'axic ta muc'ja' Jordán

¹ Ta yan c'aal ta buen sab te Josué soc spisil israeletic loq'uic bael ta Sitim, c'otic ta muc'ja' Jordán, tey c'o spas scampamentoic a.

² C'alal c'axix oxeb c'aal a, te jtsobwanejetic beenic c'axel ta yoclinel te scampamentoique.

³ Jich la yalbeyic mandal te israeletique: —Ya me awilic te c'alal ya xc'ax scajonil trato yu'un Cajwaltic te ya sq'uechic bael te sacerdote-levitaetique, jich me ya xjajch'ex ta beel, ts'aclinaic bael.

⁴ Jich me ya ana'ic te banti ya xbaexe, melel te ja'exe ma'yuc banti awilojic jtuluc te be. Ja'uc me to, ma me xalaq'uic te scajonil trato, najt' me xawac' abaic, ayuc me jmil (1,000) metro ma x'ataic —la yutic.

⁵ Te Josué la yalbey: —Ch'ultesa me abaic ta stojol Dios, melel te pajele ya me awilic te Cajwaltic te tulan ya spas chajp at'elil soc yu'el —xi'.

⁶ Jich la yalbey te sacerdoteetic: —Q'uechaic bael te scajonil trato, c'axanic bael ta ja' ta stojol te lume —xi'. Te sacerdoteetic la sq'uechic jajch'el te scajonil trato, c'axic bael ta stojol te lume.

⁷ Te Cajwaltic la yalbey te Josué: —Yo'tic ya me cac' te ya xmuc'ub ac'oplal ta sitic te israeletique. Tey me ya yilic a te joinejat, jich bit'il la join te Moisese.

⁸ Ja'at me ya awalbey mandal te sacerdoteetic te ya sq'uechic bael te scajonil trato. Te c'alal ya xc'otic ta sti'il te muc'ja' Jordán, albeya ac'a stejc'an sbaic ta yolil te ja'e —xi'.

⁹ Jich yu'un te Josué la yalbey te israeletic: —La', aiya awaiyic stojol te bi ya yalbotic te Cajwaltic te Dios cu'untique.

¹⁰ Ja' laj me seña te ay ta coliltic te cuxul Diose. Ja' te bit'il c'alal ya xc'axotic baele, ya laj me xjajch' sticunbotic loq'uel te cananeoetic, hititaetic, heveoetic, ferezeoetic, gergeseoetic, amorreoetic soc te jebuseoetique.

¹¹ Ya calbeyex awaiyic, te scajonil trato yu'un te Cajwaltic, te Yajwal spamal te balumilale, ya me xc'ax bael ta Jordán ta atojolic.

¹² Ja' yu'un ya me atsaic lajchaytul winiquetic yo'tic, juju-jtul me ya atsaic loq'uel ta slajchaychajbal te israeletique.

¹³ Te c'alal ya sq'uechic sacerdoteetic te scajonil trato yu'un te Cajwaltic, te ja' Yajwal yu'un spamal te balumilale, te c'alal nax ya yac' stan yacanic ta ja', ya me sq'uep sba te ja'e, cha'q'uejp me ya yac' sba. Te ja' ya x'oquin tel ta cajale, ya me scom sba ta oquinel, ya me stsob sba jilel tey a. Jich la yal te Diose —xi' te Josué.

^14-16 Jich yu'un loq'uic bael ta snailpaq'uic te israeletic, swenta yu'un ya xc'axic bael ta ja'. Ja' neelaj bael yu'unic te sacerdoteetic te sq'uechojic bael te scajonil trato. C'alal ochic bael ta ja' te sacerdoteetic soc te ajch'ix a te yacanic ta sti'il te ja'e, te ja' te ya x'oquin tel ta cajal, la scom sba ta oquinel, la stsob sba jilel. Mero najt' a jil ta bay te lum Adam, ja' te lum te slac'oj sba soc Saretán. (Te Jordán nojel nax a, malem loq'uel ta sti'il a ta yorail te c'ajoje.) Te yoc ya x'oquin bael c'alal ta Mar Muerto, laj c'axel ta oquinel, jich la yich' ch'uyel yoc te ja'e. Jich c'axic bael te israeletic ta stojol te lum Jericó.

¹⁷ Spisil te israeletic c'axic bael ta staquin lumil Jordán te bit'il tec'ajtic ta yolil a te sacerdoteetic te sq'uechojic te scajonil trato yu'un te Cajwaltique, taquin soc tulan te slumile.