Josué 23 - Bible in Tzeltal de Oxchuc y Tenejapa

Josué la sc'opon te lume

¹ Bayal xan c'aal ta patil te ac'botix lamajuc q'uinal ta stojolic te israeletic yu'un te Cajwaltique, te Josué mamalix a.

² Te Josué la yic' tel spisil te israeletic soc te mamaletic yich'oj yat'elic yu'unic, te jwolwanejetic, te jchajbanwanejetic soc te mach'atic xan ay yat'elic, jich la yalbey: —Te jo'one mamalonix, bayalix te ca'wilale.

³ Te ja'ex la awilic spisil te bila la spas te Cajwaltic ta stojol spisil te lumetic te la stoy sbaique. Ja' me stuquel te la yac' guerra ta awentaic te Cajwaltique.

⁴ Jo'on la jpucbey ta swenta snumeroil ta na'el te sq'uinalic ta spisil ta jchajp sts'umbal te awermanotaque. Ma ja'uc nax la jpuc te q'uinal ta bay ich'bilixe, la me jpuc ta bay quechel ta ich'ele, ja' to me ta muc'ja' Jordán ta stojol sloq'uib c'aal, c'alal ta Mar Mediterráneo ta stojol smalib c'aal.

⁵ Te Cajwaltic ya me sloq'ues bael te mach'atic nainemic tey a, ja' me ya awich'ic jilel te ja'exe, jich bit'il yalojbey sc'oplal te Cajwaltic te Dios cu'untique.

⁶ “Pasaic me tulan ta xch'uunel spisil te bila ya yal te mandaliletic ta libro yu'un Moisés. C'otesaic ta pasel te bila ya yal te ts'ibubile.

⁷ Ma me xacap abaic soc te yantic te ayic ta awolilique. Ma me xaquejan abaic ta stojol te diosetic yu'unic, ni ma me xach'uunbeyic smandalic, ni ma me xloc' ta aweic yalel sbiilic te lotil diosetic. Ma me bi xachap ta stojolic.

⁸ Junuc me awo'tanic ta stojol Cajwaltic te Dios cu'untique, jich nix te bit'il yacalex tel ta spasel c'alal ora.

⁹ Te Cajwaltic la sloq'uesbeyex ta atojolic lumetic te muq'uic soc te tulanique, asta c'alal yo'tic ma'yuc mach'a ju'em yu'un scontroinbelex te ja'exe.

¹⁰ Melel tic' nax ta jtulex te ya xju' ya awac' x'anic jmil ta jtul, melel te Cajwaltic te Dios cu'untic ja' la yac' guerra ta xc'uxtaybelex, jich nix bit'il te yalojbey sc'oplale.

¹¹ Tsajtayaic me jiche, c'ux me x'awaiy ta awo'tanic te Cajwaltic te Dios cu'untique.

^12-13 Ya me jc'an te ya ana'ic in to: Teme ya awijq'uitay ta awo'tanic te Diose, soc teme ya acap abaic soc te ants-winiquetic te jilem ta awolilic, soc teme ay ya xnujbinex soque, te Cajwaltic te Dios cu'untic ma ba ya sloq'uesbeyex ta awolilic. Jich me ya xtuun ta atojolic te bit'il ya syaquex ta lazo soc te bit'il pejts', swenta yu'un tey ya x'ochex a te ja'exe. Jich me ya xc'ot te bit'il smajibal apatic, soc jich bit'il ch'ix ya x'och ta asitic, ja' to me ni jtuluc ya xjilex li'to ta q'uinal te mero lec, te la yac'beyex te Cajwaltic te Dios cu'untique.

¹⁴ “Te jo'one ya xlajonix. Ja'uc me to, ya jc'an cac'beyex jilel ana'ic ta spisil awo'tanic soc ta spisil ach'ulelic, te c'otix ta pasel spisil te bitic lec yaloj te Cajwaltique. Ma'yuc bay quechel jilel jp'aluc ta pasel te bila yaloje.

¹⁵ Ja'uc me to, jich bit'il c'otix ta pasel spisil te bila lec la yalbeyex te Cajwaltique, jich nix me ya xtal ta atojolic yu'un spisil ta jchajp woclajel, ja' to ma'yuc jtuluc ya xjilex ta bay te lequil q'uinal te la yac'beyex,

¹⁶ teme ma x'ac'otesic ta pasel te trato te la xchap ta atojolique. Teme ya xbaex ta xch'uunel yantic diosetic, soc teme ya xba aquejan abaic ta stojol, ya me x'ilin ta atojolic te Cajwaltique, jich me ora ya slajinex ta q'uinal ta bay mero lec te la yac'beyexe —xi' te Josué.