Josué 21 - Bible in Tzeltal de Oxchuc y Tenejapa

Lumetic yu'un levitaetic

^1-2 Te jwolwanejetic yu'un chajbalchajp te levitaetic, bajt'ic ta Silo te ay ta sq'uinal Canaán, ta sc'oponel te sacerdote Eleazar, Josué soc te jtsobwanejetic ta chajbalchajp te israeletique. Jich c'o yalbeyic: —Te Moisés albot mandal yu'un Cajwaltic te ya awac'botic lumetic ta bay ya x'ainotic, soc aquiltic ta sjoyobal ta bay ya cac'tic xwe' te jchambalamtique —xiic.

³ Jich yu'un te israeletic la yac'beyic te lumetic yu'unic, soc aquiltic te bay ya yac' xwe'ic xchamsbalamic, jich te bit'il yaloj mandal te Cajwaltique.

⁴ Neel la yich' pasel snumeroil ta na'el ta swenta te juju-jchajp levitaetic te sts'umbalic Coat. Te coatetic sts'umbalic te sacerdote Aarón, oxlajuneb ta jpam lum c'ot ta swentaic, ja' te bay sq'uinalic te sts'umbal Judá, Simeón soc Benjamín.

⁵ Te yantic coatetic c'ot ta swentaic lajuneb ta jpam lum, ja'ic te bay sq'uinal sts'umbal Efraín, Dan soc te olil sts'umbal Manasés.

⁶ Ta patil la yich' te juju-jchajp levitaetic te sts'umbalic Gersón. La yich'ic ta swenta snumeroil ta na'el oxlajuneb ta jpam lum, ja'ic te ayic ta sq'uinal sts'umbal Isacar, Aser, Neftalí soc te olil sts'umbal Manasés te ayic ta Basán.

⁷ Te juju-jchajp te levitaetic te sts'umbalic Merari, c'ot ta swentaic lajchayeb ta jpam lum stuquelic, ja' te ay ta sq'uinal sts'umbal Rubén, Gad soc Zabulón.

⁸ Te israeletic la spucbeyic ta swenta snumeroil ta na'el te levitaetic, te jayeb lumetic soc aquiltic te bay ya yac' xwe' te xchamsbalamique, jich bit'il yaloj mandal Cajwaltic ta swenta Moisés.

⁹ Te lumetic ya xchicnaj sbiilic, ja' la yac'beyic ta sq'uinal sts'umbal Judá soc Simeón.

¹⁰ C'ot ta swentaic te levitaetic te yich'ojbeyic sbiil Coat, te sts'umbalic te Aarón, melel te sbabial snumeroil ta na'el c'ot ta swentaic.

¹¹ Ta witstiquil yu'un Judá, la yac'beyic te Quiriat-arba, ja' te lum Hebrón te muc' sc'oplal yu'un sts'umbal muc'ul najt'il winic Anac. La yac'beyic soc aquiltic yu'un te xchamsbalamique.

¹² Yan te q'uinal soc te ch'in lumetic yu'un Quiriat-arba, ja' la yac'beyic yich' Caleb te snich'an Jefone.

¹³ Ma ja'uc nax ac'botic te sts'umbal sacerdote Aarón te lum Hebrón, te anjibal lum yu'un te mach'atic ya yaiyic milaw, ja' la yac'beyic xan te lum Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta soc Bet-semes, ay baluneb ta jpam lum te ay aquiltic yu'unic ta bay ya xwe' te xchamsbalamique.

¹⁷ Ja' la yac'beyic ta sq'uinal sts'umbal Benjamín, te lum Gabaón, Geba,

¹⁸ Anatot soc Almón, ja' xchanpamal lum soc aquiltic yu'un te xchamsbalamique.

¹⁹ Jich yu'un te lumetic la yich'ic te sacerdoteetic sts'umbal Aarón, ay oxlajuneb ta spisil soc aquiltic yu'un te xchamsbalamique.

²⁰ Te jaychajp xan levitaetic te sts'umbalic Coat, la yich'ic puquel lumetic ta sq'uinal te sts'umbal Efraín.

²¹ Ta witstiquil yu'un Efraín, ja' la yac'beyic te Siquem, te ja' anjibal lum yu'un te mach'atic ay ya yaiyic milawe, soc la yac'beyic te lum Gezer,

²² Kibsaim soc Bet-horón, ja' xchanpamal lum soc aquiltic yu'un te xchamsbalamique.

²³ Ta sq'uinal sts'umbal Dan, la yac'bey Elteque, Gibetón,

²⁴ Ajalón soc Gat-rimón, ja' xchanpamal lum soc aquiltic yu'un te xchamsbalamique.

²⁵ Ta sq'uinal te olil sts'umbal Manasés, la yac'beyic cha'pam lum: Taanac soc Gat-rimón, soc aquiltic yu'un te xchamsbalamique.

²⁶ Ja' yu'un, lajuneb ta jpam lum la yich'ic te jayeb xan ta jchajp sts'umbal Coat, soc aquiltic yu'un te xchamsbalamique.

²⁷ Te levitaetic sts'umbal Gersón, ja' ac'botic cha'pam lum ta sq'uinal te olil sts'umbal Manasés, soc nix aquiltic yu'un xchamsbalamic, ja' te lum Golán te ay ta sq'uinal Basán, yu'un ya xtuun ta anjibal lum, soc Beestera.

²⁸ Ta sq'uinal sts'umbal Isacar, ac'botic te lum Cisón, Daberat,

²⁹ Jarmut soc En-ganim, ja' xchanpamal lum soc aquiltic yu'un xchamsbalamic.

³⁰ Ta sq'uinal sts'umbal Aser, ac'botic te lum Misael, Abdón,

³¹ Helcat soc Rehob, ja' xchanpamal lum soc aquiltic yu'un xchamsbalamic.

³² Ta sq'uinal sts'umbal Neftalí, ac'botic oxpam lum soc aquiltic yu'un xchamsbalamic: ja' te Cedes, te ay ta sq'uinal Galilea te ya xtuun ta swenta anjibal lum, soc Hamot-dor soc Cartán.

³³ Ja' yu'un te lumetic la yich'ic te jayeb ta jchajp sts'umbal Gersón, ay oxlajuneb ta spisil, soc ay aquiltic yu'un xchamsbalamic.

³⁴ Te sts'umbal Leví te jilemic xane, ja' te sts'umbalic Merari, ac'botic ta yolilal sq'uinal sts'umbal Zabulón, ja' te lum Jocneam, Carta,

³⁵ Dimna soc Naalal, ja' xchanpamal lum soc aquiltic yu'un xchamsbalamic.

³⁶ Ta sq'uinal sts'umbal Rubén, ac'botic te lum Beser, Jahaza,

³⁷ Cademot soc Mefaat, ja' xchanpamal lum soc aquiltic yu'un xchamsbalamic.

³⁸ Ta sq'uinal sts'umbal Gad, ac'botic te lum Ramot te ay ta sq'uinal Galaad te ya xtuun ta anjibal lum, soc Mahanaim,

³⁹ Hesbón soc Jazer, ja' xchanpamal lum soc aquiltic yu'un xchamsbalamic.

⁴⁰ Ja' yu'un te lumetic la yich'ic te jayeb ta jchajp te levitaetic te sts'umbal Merari, ay lajchayeb ta spisil.

⁴¹ Te lumetic yu'un levitaetic ta yolil sq'uinalic te israeletic, ay waxaqueb yoxwinic (48) ta spisil, ay juju-jsejp aquiltic yu'un xchamsbalamic

⁴² ta sjoyobal te juju-jpam lume. Jich nix pajal c'ot spisil te lumetique.

Te Cajwaltic jun yo'tan stuquel

⁴³ Awaiy bit'il te Cajwaltic la yac'bey israeletic spisil te q'uinal te yaloj ta jamal ta stojol te antiguo sme'-static, jich ainic ta cuxinel tey a.

⁴⁴ Te Cajwaltic la sc'otes ta pasel te bila yaloj, soc la yac' lamajuc q'uinal ta sjoylejal. Te scontroique ma'yuc bay tsalotic yu'un, melel te Cajwaltic la yac'bey yaiyic tsalaw.

⁴⁵ Ma'yuc bay jil jp'aluc c'op te ma c'ot ta pasel yu'une. Buen t'ujbil spisil te bila yaloj Cajwaltic te la yac' c'otuc ta pasel ta stojol te israeletique.