Josué 20 - Bible in Tzeltal de Oxchuc y Tenejapa

Israeletic la stsaic lumetic yu'un anjibal

¹ Te Cajwaltic la sc'opon te Josué, jich la yalbey:

² —C'opona te alumal israeletic, albeya ac'a stsaic lumetic yu'un anjibal, jich bit'il la calbey mandal te Moisés.

³ Teme ay mach'a ma snopojuc ta yo'tan ya smil te yane, ya xju' xba snac' sba ta lumetic te tsabilic, swenta yu'un tey me ya scanantay sba a teme ya xtal ac'botuc spacol yu'un te xchapomal te mach'a laje.

⁴ Te mach'a ya xtal sc'an te ya snac' sba ta lum te tsabile, ya me xc'ot ta yochibal sts'ajc'ul, ya me xc'o yal ta jamal te bila spasoj ta stojol te mamaletic yich'oj yat'elic yu'un te lume. Jich me ya yaq'uic ochel, ya me x'ac'bot te banti ya xju' ya xnaine.

⁵ Teme tal ta leel yu'un te xchapomal te mach'a lajeme, te mamaletic yu'un te lum ma me xyaq'uic ta c'abal te mach'a snac'oj sba, melel ma snopojuc ta yo'tan te la yaiy milaw, ma'yuc bay yilintayej sba soc ta neelal.

⁶ Te mach'a snac'oj sba, ya me xjil ta lum ja' to me ta bi ora ya stejc'an sba ta stojol slumal te ya x'ich'bot sc'op yu'une, soc ja' to te c'alal ya xlaj te muc'ul sacerdote te ay ta at'ele. Ta patil ya xju' yu'un te ya sujt' bael, ya me xbajt' ta bay loc' tel ta anel, ja' te sna ta slumale —xi' te Cajwaltique.

⁷ Jich yu'un te israeletic la stsaic swenta anjibal te lum Cedes te ay ta sq'uinal Galilea, ta bay witstiquil yu'un Neftalí; soc la stsaic te lum Siquem, ta witstiquil yu'un Efraín; soc te lum Quiriat-arba, te Hebrón yan sbiil, te ay ta witstiquil yu'un Judá.

⁸ Ta jejch' Jordán, ta bay pamal sba witstiquil ta jochol taquin q'uinal ta stojol sloq'uib c'aal yu'un Jericó, la stsaic xan te lum Beser te ay ta swenta sts'umbal Rubén; soc la stsaic te lum Ramot te ay ta swenta sts'umbal Gad, te ay ta sq'uinal Galaad; soc la stsaic te lum Golán te ay ta sq'uinal Basán, te ay ta swenta sts'umbal Manasés.

⁹ Ja' anjibal lumetic te la stsaic ta swenta spisil israeletic soc jyanlum winiquetic te ainemic ta yolilique. Tey ya xju' ya snac' sba a, mach'auc teme ay la yaiy milaw te ma snopojuc ta yo'tan, swenta yu'un te xchapomal te mach'a laj ta milele, ma xju' ya xba yich'bey spacol ta milel teme ma neeluc ya yich' ta c'op te lume.