Josué 2 - Bible in Tzeltal de Oxchuc y Tenejapa

Josué la sticun ta tsajtayel lum Jericó

¹ Te Josué, c'alal ayic ta Sitim la sticun bael cheb jtsajtaywanejetic ta muquen, jich la yalbey: —Baan ilawilic te lum Jericó soc spisil te sq'uinale —xi'. Jich bajt'ic, c'otic ta sna jtul jmulawil ants ta Jericó, Rahab sbiil. Tey c'ax ajc'ubal yu'unic a.

² Ja'uc me to, ay mach'a ba yalbey yaiy te ajwalil yu'un te lume. Jich c'o yalbey: —Ay me israel-winiquetic julic in ajc'ubal to, talic me ta stsajtayel te q'uinale —xi'.

³ Jich yu'un te ajwalil la sticun bael mandal ta stojol te Rahab, jich la yalbey bael: —Loq'uesa tel te winiquetic te julem ta atojol te ayic ta anae, melel jtsajtaywanejetic me —xi'.

⁴ Ja'uc me to, nac'biliquix yu'un te Rahabe. Jich yu'un la yalbey te abatetic yu'un te ajwalile: —Melel te ay winiquetic te julic tel ta jtojole, pero ma la jna' stojol te bay talemique.

⁵ Yaquix ta ijc'ubel a te bajt'ique, ja' te nopol xmajq'uix sti'il sts'ajc'ul a te lume. Ja'uc me to, ma jna' te banti bajt'ique. Teme ya anutsic bael ta ora, ya me ataic —la yut.

⁶ Ta mero melel te antse la smojt'es ta sba te snae. Tey la snac' a ta bay tomajtic ta q'ui'el yu'un te linoe.

⁷ Te winiquetic yu'un te ajwalile ba sleic c'alal ta muc'ja' Jordán, c'otic c'alal ta bay tec'oja'etic. Te c'alal nax loc' te jnutswanejetique, la yich' maquel sti'il sts'ajc'ul te lume.

⁸ Te c'alal ma to xway a te jtsajtaywanejetique, te Rahab mo bael ta sc'oponel, jich c'o yalbey:

⁹ —Ya jna' te ja' ya yac'beyex in q'uinal to te Awajwal te Dios awu'unique, melel bayal yac'ojbotiquix xiwel. Spisil te yajwal lum lajemiquix ya yaiyic yu'un xiwel ta acajic te ja'exe.

¹⁰ Melel caiyojtic stojol te c'alal loq'uex tel ta Egipto, Dios la staquintesbeyex slumil te Mar Rojo te c'axex tel a. Ja' nix jich jna'ojtic stojol te jc'axel la amilic jilel te cheb ajwaliletic yu'un te amorreoetique, te Sehón soc te Og, ja' te ayic ta jejch' muc'ja' Jordán.

¹¹ Ja' bayal xiwotic yu'un te c'alal la caiytic stojole, melel ma'yuc mach'a ya xju' spajaltayex. Melel cajal nix stuquel a te Awajwal te Dios awu'unique, te ja' Dios yu'un ch'ulchan soc Dios tey ta balumilal.

¹² Jich yu'un ya me calbeyex wocol yo'tic te yacuc awalbon ta stojol te Awajwalic te ya quich' c'uxtayel awu'unic jich nix bit'il la awich'ic c'uxtayel cu'un te ja'exe, te yacuc ac'uxtayon soc spisil mach'a ay yu'un te jtate. Ya jc'an te yacuc awac'bon señail te jichuc ya xc'ot ta pasel awu'unique.

¹³ Ac'bon cuxinuc te jtate, te jme'e soc ta spisil te mach'atic ay yu'une. Coltayawotic, ma me xawac'otic ta lajel —la yut.

¹⁴ La sjaq'uic: —Lec ay, jo'otic ya cac' jbajtic ta lajel ta awentaic teme ma jichuc ya xc'ote, ja' nax teme ma'yuc mach'a ya awalbey yaiy te bila swentail te talemotique. Te c'alal ya yac'botic ta jc'abtic Cajwaltic te q'uinale, ya me jc'uxtaytiquex —xiic.

¹⁵ Jich yu'un te Rahab la scojt'eslay ta lazo ta ventana ta pat ts'ajc', yu'un ay ta sjoyob sts'ajc'ul lum te snae.

¹⁶ Jich la yalbey bael: —Baanic me, nac'a abaic ta witstiquil ta bay spat te lume, swenta yu'un ma me staex te mach'atic yacal slebelexe. Nac'a abaic oxebuc c'aal tey a, ja' to teme sujt'ic tel ta lume. Jich me jun awo'tanic ya xjajch'ex ta beel —xi'.

¹⁷ La sjaq'uic: —Te jo'otique ya me jc'otestic ta pasel ta atojol te bi la ac'anbotic ta stojol Dios.

¹⁸ Te c'alal ya x'ochotic tel ta lum, ya me ajojc'an in tsajal lazo to ta bay ventana te banti la acojtesotique. Tsoba ta yutil ana te atat, te ame' soc spisil mach'atic ay yu'un.

¹⁹ Teme ya xloc' jtuluc ta ana, jich nix me ya xc'ot lajel ta swenta, ma me jmulticuc ya xc'ot te jo'otique. Yan teme ay mach'a ya yochintay te anae, jo'otic me jmultic ya xc'ot stuquel.

²⁰ Yan teme ja'at ya awal te bila la jchaptique, ma me ayuc bi ya xc'ot ta jwentatic, manchuc me la ac'anbotic ta stojol Dios te ya jcoltayticate —xiic.

²¹ La sjac' te antse: —Mero jich co'tan te bit'il la awalique —xi'. C'alal laj yo'tan ta c'op, jich bajt'ic. Ta patil te antse la xchuc te tsajal lazo ta sventanail te snae.

²² Te cheb jtsajtaywanejetic bajt'ic ta witstiquil. La snac' sbaic oxeb c'aal tey a, ja' te c'alal yac ta leaw ta bayuc a te soldadoetique. Te bit'il ma la staique, jich a sujt'ic bael ta Jericó.

²³ Te jtsajtaywanejetic coic tel ta witstiquil, c'axic tel ta ja', c'otic ta stojol te Josué. C'o yalic spisil te bila c'ot ta pasel ta stojolique.

²⁴ Jich jul yalic: —Te Cajwaltique yac'ojbotiquix ta jc'abtic te q'uinale. Jo'otic ta jcajtic te lajem ya yaiyiquix yu'un xiwel te lume —xiic.