Josué 18 - Bible in Tzeltal de Oxchuc y Tenejapa

Sq'uinalic yantic sts'umbal Israel

¹ Te bit'il yich'ojiquix a te q'uinale, spisil te lum israel la stsob sbaic ta Silo ta xchajbanel yawil te Nailpac' te bay ya yich' c'oponel te Diose.

² Ja'uc me to, ay to jilemic te israeletic te ma ba yich'oj sq'uinalique. Ay jucchajp xan te ma to bay ac'bilic ta swentaique.

³ Jich yu'un te Josué la yalbey te israeletic: —¿Bi ya amaliyic xan? Ochan, u'uninaic te q'uinal te yac'ojbotiquix te Cajwaltic te Dios yu'un te antiguo jme'-jtatique.

⁴ Tsaaic oxtul winiquetic ta swenta juju-jchajp, swenta yu'un ya jticun bael ta yilel spisil te q'uinale. Ya me xtal yalbonic sc'oplal caiy, yu'un jich me ya jna'tic te bit'il ya jpuctique.

⁵ Te winiquetic ya me sp'isic jilel, jucsejp me ya sloq'uesic a. Ya me yijq'uitaybey jilel te sq'uinal Judá ta stojol sur, soc te sts'umbal José, ta stojol norte ya me xjil te sq'uinalique.

⁶ Te c'alal lajix ta p'isel a te jucsejpe, ya me yich'bonic tel te sc'oplale. Jich me ya jpasbey snumeroil ta na'el te bit'il ya yich' puquel ta stojol Cajwaltic te Dios cu'untique.

⁷ Yan te levitaetic ma me ayuc ya yich' sq'uinalic ni jtebuc stuquelic. Te bi ya yich'ique, ja' me te at'el ta sacerdoteil yu'un te Cajwaltique. Yan te sts'umbal Gad, te sts'umbal Rubén soc te olil sts'umbal Manasés, yich'ojix sq'uinal stuquelic ta jejch' ja' Jordán, ta stojol sloq'uib c'aal, te ac'botic jilel yu'un Moisés te yabat te Cajwaltique —xi' te Josué.

⁸ Te mach'atic ya xba yich'beyic tel sc'oplal te q'uinale, la xchajban sbaic. Te Josué la spas bael ta mandal, jich la yalbey: —Baan ilawilic spisil te q'uinale, soc p'isaic jilel. Sujt'anic tel te c'alal ya xlaj awo'tanique, swenta yu'un ya me jpasbey snumeroil ta na'el te ya jpuc ta Silo ta stojol te Cajwaltique —xi' te Josué.

⁹ Te winiquetic bajt'ic, beenic ta yilel spisil te q'uinale. La sp'isic jilel ta jucchajp te lumetic, soc la jts'ibuyic ta jun ta spisil. Patil sujt'ic tel ta bay yantic ta Silo ta stojol te Josué.

¹⁰ Jich yu'un te Josué la spucbey sq'uinalic te israeletic tey ta Silo, la spasbey snumeroil ta na'el ta stojol te Cajwaltique.

Sq'uinal sts'umbal Benjamín

¹¹ C'alal pasbilix snumeroil ta na'el a te jayeb ta jchajp sts'umbal Benjamín, la yich' sq'uinalic ta yolil sq'uinalic te sts'umbal Judá soc te sts'umbal José.

¹² Te smojonil te q'uinal jajch' tel ta stojol norte ta muc'ja' Jordán, toj bajt' ta stojol norte yu'un Jericó. Bajt' xan ta witstiquil ta stojol smalib c'aal, loc' ta jochol taquin q'uinal yu'un Bet-avén.

¹³ Bajt' xan c'alal ta Luz (Betel yan sbiil) ta jejch' bael ta stojol sur. Co bael c'alal Atarot-adar ta wits te ay ta stojol sur yu'un Bet-horón ta Alan.

¹⁴ La yac' buelta te smojonil ta stojol bael te Mar Mediterráneo, ta xch'ujt' wits ta sur te ay ta stojol Bet-horón, c'alal ta Quiriat-baal (Quiriat-jearim yan sbiil) te ay ta swenta te sts'umbal Judá. Ja' me te sti'il sq'uinal Benjamín ta stojol te smalib c'aale.

¹⁵ Te mojón ta stojol sur loc' bael ta jejch' sti'il lum Quiriat-jearim, ta stojol bael smalib c'aal, c'alal sloq'uibja' ta Neftoa.

¹⁶ Co bael c'alal ta slajibal wits te ay ta stojol stenlej xatal q'uinal Ben-hinom, te ay ta norte yu'un stenlej xatal q'uinal yu'un Refaim. Bajt', co bael ta stenlej xatal q'uinal Hinom, c'ax bael ta stojol sur yu'un wits te banti ay Jebús, bajt' xan c'alal ta sloq'uibja' yu'un En-rogel.

¹⁷ La yac' buelta ta stojol norte, loc' bael ta En-semes, bajt' xan c'alal Gelilot ta yelaw bael wits ta banti ay Adumín. Co bael c'alal ta Muc'ul Ton yu'un Bohán Ben-Rubén.

¹⁸ C'ax bael ta jejch' norte ta wits ta stojol bael te spamlej yu'un Jordán, jich co bael c'alal Jordán.

¹⁹ C'ax bael ta stojol norte yu'un Bet-hogla, swenta yu'un ya xc'ot ta comel ta Mar Muerto ta stojol norte te bay ya xc'ot ta loq'uel te muc'ja' Jordán. Ja' smojonil sq'uinal sts'umbal Benjamín ta sur.

²⁰ Te muc'ja' Jordán ja' smojonil c'ot ta stojol sloq'uib c'aal. Ja' sq'uinalic te la yich' puquel chajbalchajp te sts'umbal Benjamín.

²¹ Te lumetic te c'ot ta swentaic te jayeb ta jchajp sts'umbal Benjamín, ja'ic Jericó, Bet-hogla, Emec-casis,

²² Bet-arabá, Zemaraim, Betel,

²³ Avim, Pará, Ofra,

²⁴ Quefar-haamoni, Ofni soc Geba, ay lajchayeb ta jpam lum soc ch'in lumetic yu'unic.

²⁵ Soc xan te Gabaón, Ramá, Beerot,

²⁶ Mispa, Cafira, Mozah,

²⁷ Requem, Irpeel, Tarala,

²⁸ Zela, Elef, Jebús (ja' te Jerusalén), Gabaa soc Quiriat, ay chanlajuneb lumetic soc ch'in lumetic yu'unic. Ja' te sq'uinalic te c'ot ta swentaic te jayeb ta jchajp sts'umbal Benjamín.