Josué 17 - Bible in Tzeltal de Oxchuc y Tenejapa

Sq'uinal sts'umbal Manasés

¹ Te q'uinal ac'bot ta swenta sts'umbal Manasés, ja' te sba snich'an José, jich ay: te Maquir te tulan yu'un guerra, te sba snich'an Manasés soc stat te Galaad, ja' c'ot ta swenta te q'uinal te Galaad sbiil, soc te Basán, te ay ta stojol sloq'uib c'aal yu'un Jordán.

² Ja' nix jich la spasbeyic snumeroil ta na'el te mach'a ya xc'ot ta swentaic te jayeb xan sts'umbal Manasés, ja' chican te jayeb ta jchajp te sbiilique: ja' te Abiezer, Helec, Asriel, Siquem, Hefer soc Semida, ja'ic te snich'nab Manasés, te smamatac José.

³ Ja'uc me to, te Zelofehad te snich'an Hefer soc smam te Galaad snich'an Maquir soc smam te Manasés, ma'yuc jtuluc querem te snich'ane, ja' nax jo'tul ach'ixetic yu'un, ja'ic te Maala, Noa, Hogla, Milca soc Tirsa.

⁴ Ja' talic ta stojol te sacerdote Eleazar, Josué soc te jwolwanejetic yu'un te lume, jich la yalbeyic: —Te Cajwaltic la yalbey te Moisés te ya yac'botic jq'uinaltic jich bit'il te quermanotaque —xiic. Jich yu'un te Josué la yac'bey sq'uinalic jich bit'il yermanotac te state, melel jich yaloj mandal te Cajwaltique.

⁵ Ja' yu'un te sts'umbal Manasés la yich' lajunsejp q'uinal stuquel, soc xan te q'uinal ta Galaad soc Basán, te ayic ta stojol sloq'uib c'aal ta jejch' ja' Jordán,

⁶ melel te yantsil-nich'nab te Manasés la yich' sq'uinalic jich bit'il te winiquetique. Te q'uinal ta Galaad ja' yu'unic c'ot te yantic sts'umbal Manasés.

⁷ Te sq'uinal te sts'umbal Manasés jajch' bael ta sq'uinal sts'umbal Aser, c'ot ta lum Micmetat te ay ta stojol sloq'uib c'aal yu'un lum Siquem. Bajt' xan c'alal ta stojol sur c'alal ta sloq'uibja' yu'un Tapúa.

⁸ Te sq'uinal Tapúa ja' nix yu'un te sts'umbal Manasés. Ja'uc me to, te lum Tapúa nix sbiile te ay ta nopol sti'il sq'uinal Manasés, ay ta swenta te sts'umbal Efraín.

⁹ Te mojón yu'un sts'umbal Manasés co bael ta stojol sur c'alal ta beja' yu'un Caná. Ja' yu'un, ay lumetic yu'un Efraín ta yolil te lumetic yu'un Manasés, manchuc me ja' yu'un Manasés te sti'il ja' te ay ta stojol norte, te jun nax ya xloc' bael soc ta mar.

¹⁰ Te Efraín jil ta stojol sur yu'un te beja', yan te Manasés c'ot ta stojol norte, ja' sti'il sq'uinal jil te Mar Mediterráneo. Te sq'uinal sts'umbal Aser, jil ta norte. Yan te sq'uinal sts'umbal Isacar jil ta stojol sloq'uib c'aal.

¹¹ Soc c'ot ta swenta sts'umbal Manasés te lumetic soc te ch'in lumetic yu'unic, te ay ta sq'uinal sts'umbal Isacar soc ta sq'uinal sts'umbal Aser, ja'ic te Bet-seán, Ibleam, Dor, Endor, Taanac soc Meguido soc te oxtsel ch'in witsetique.

¹² Ja'uc me to, te sts'umbal Manasés ma ju' yu'unic yu'uninel te lumetic, melel te cananeoetic tulan la yac' sbaic, jich jilic tey a.

¹³ Ta patil, te c'alal la yich' yipic te israeletic, la sujic te cananeoetic ta stojel spatanic, pero ma la sloq'uesic bael.

Te sts'umbal José la yich' q'uinal te ay ste'el

¹⁴ Te sts'umbal José jich la yalbeyic te Josué: —¿Bi yu'un te jsejp nax jq'uinaltic la awac'botic ta swenta snumeroil ta na'el te c'ot ta jwentatique? Melel te jo'otique bayalotic ta jyalel, yac'ojbotic bendición te Cajwaltique —xiic.

¹⁵ Te Josué la sjac': —Te bit'il bayalex soc te ma tic'uquex a te witstiquil yu'un Efraín, baan ts'etaic te te'etic ta sq'uinal te ferezeoetic soc te refaitaetique —xi' te Josué.

¹⁶ Jich la yalic: —Melel nix a, ma tic'ucotic a te witstiquile. Ja'uc me to, te cananeoetic te ayic ta spamlej, ay scarretaic yu'un guerra te pasbil ta taq'uine. Ja' nix jich te mach'atic ayic ta Bet-seán soc te ch'in lumetic yu'un te nainemic ta spamlej yu'un Jezreel —xiic.

¹⁷ Jich yu'un te Josué la sujt'esbey sc'opic te sts'umbal José, ja' te sts'umbal Efraín soc Manasés, jich la yalbey: —Mero bayalex te ja'exe, soc bayal awipic, jich yu'un ma ba jsejp nax ya awich'ic te q'uinale.

¹⁸ Ja' me witstiquil to te potsol ta niwac te'etic, ja' me ya awu'uninic xan, ya me awaiybeyic lec yutsilal te te'etique. Te cananeoetic ya me atenic loq'uel, manchuc me tulanic, soc manchuc me ay taq'uin scarretaic —xi' te Josué ta stojolic.