Josué 16 - Bible in Tzeltal de Oxchuc y Tenejapa

Q'uinaletic yu'un Efraín soc Manasés, te sts'umbal José

¹ Te q'uinal ac'bot ta swenta sts'umbal José ta swenta snumeroil ta na'el, ta bay ya xc'ot ta swentae, jajch' bael ta sloq'uib c'aal ta sti'il muc'ja' Jordán, bajt' c'alal ta ja'etic yu'un Jericó. C'ax ta jochol taquin q'uinal, soc ta bay witstiquil bael ta Jericó c'alal ta Betel.

² Ta Betel, (Luz te yan sbiile), c'ax ta sq'uinal arquitaetic c'alal ta lum Atarot;

³ bajt' ta stojol smalib c'aal ta bay sq'uinal te jafletitaetic, c'alal ta mojón yu'un Bet-horón te ay ta Alan, c'alal ta Geser. Tey loc' bael c'alal ta ti'mar Mediterráneo.

⁴ Jich ayic te q'uinaletic la yich'ic te sts'umbalic Manasés soc Efraín, te ja'ic snich'nab José.

Sq'uinalic sts'umbal Efraín

⁵ Te sq'uinalic juju-jchajp te sts'umbal Efraín, jajch' bael smojonil ta stojol sloq'uib c'aal ta lum Atarot-adar, c'alal ta lum Bet-horón te ay ta Cajal,

⁶ bajt' c'alal ta Mar Mediterráneo. Ta stojol norte ja' slajibal bael te lum Micmetat, c'ax bael smojonil ta stojol sloq'uib c'aal c'alal ta lum Tanaat-silo, c'ax bael ta Janoa,

⁷ co bael ta lumetic Atarot soc Naarat, ja' to la sta Jericó soc c'ot ta loq'uel ta muc'ja' Jordán.

⁸ Ta Tapúa te mojón bajt' ta stojol smalib c'aal, c'alal ta beja' Caná soc ta Mar Mediterráneo. Ja' te q'uinal c'ot ta swenta sts'umbal Efraín te la yich' puquel ta swenta juju-jchajp.

⁹ Ay nix lumetic soc ch'in lumetic ta sq'uinal te sts'umbal Manasés te jil ta swenta te sts'umbal Efraín.

¹⁰ Te sts'umbal Efraín ma la stenic loq'uel ta lum Gezer te cananeoetic te tey ayic a. La yac' cuxinuc ta yolilic, ja' nax la sujic ta stojel spatanic. C'alal ora yo'tic, tey ayic a.