Josué 14 - Bible in Tzeltal de Oxchuc y Tenejapa

Josué la spuc q'uinal ta Canaán

¹ Ja' te q'uinaletic yu'un Canaán te la yich' sq'uinalinic te israeletique, ja' te pucbotic yu'un te sacerdote Eleazar soc Josué soc te jwolwanejetic yu'un te juju-jchajp sts'umbal te israeletique.

² Te bit'il la spuquic te q'uinale, la spasbeyic snumeroil ta na'el te banti ya xc'ot ta swentaic te q'uinal ta sbalunchajbal sts'umbal soc te olile, jich bit'il yaloj mandal Cajwaltic ta stojol Moisés te jich ya spase.

³ Melel te Moisés ta neelal la yac'bey sq'uinalic ta jejch' ja' Jordán te sts'umbal Rubén, Gad soc te olil sts'umbal Manasés. Yan te sts'umbal levitaetic ma'yuc bay ac'bot sq'uinal stuquelic.

⁴ Melel te sts'umbal José cha'chajp loc' a, ja' te Manasés soc Efraín. Yan te sts'umbal levitaetic ma'yuc bay ac'bot sq'uinal stuquelic, ja' ac'bot lumetic ta bay ya xju' ya x'ainic, soc aquiltic ta sjoylejal juju-jpam lum, yu'un tey ya yac' a te swacaxic soc te xchijique.

⁵ Jich la yich' puquel sq'uinalic te israeletic, jich bit'il albot mandal yu'un te Cajwaltic te Moisese.

Sq'uinal Caleb

⁶ Bajt'ic ta Gilgal ta sc'oponel te Josué te sts'umbal Judá soc te Caleb te cenezeo-winic, te snich'an Jefone. Te Caleb la yalbey te Josué: —Na'a me te bi la yal Cajwaltic ta stojol Moisés, te ja' yabate, ta bay Cades-barnea, te bi la yalbotic jc'oplaltic ta jchebaltique.

⁷ Ayix cha'winic (40) ca'wilal c'alal la sticunon loq'uel tel Moisés ta Cades-barnea ta stsajtayel te q'uinale. Te c'alal sujt'on bael, jamal c'o cal soc spisil co'tan te bi yilele.

⁸ Yan te mach'atic joinej bael, ja' nax c'o xiwtesbey yo'tanic te jlumaltique. Yan te jo'one jun nax co'tan ta stojol te Cajwal te Dios cu'une.

⁹ Jich yu'un te Moisés jamal la yalbon ta stojol Dios: “Te q'uinal ta bay xc'otuc abeentay, ja' me ya awu'unin sbajt'el q'uinal soc te ats'umbale, melel jun nax awo'tan ta stojol Cajwal te Dios cu'une”, la yuton.

¹⁰ Ora yo'tic c'axemix jo'eb yoxwinic (45) ja'wil te bit'il jich la yal te Cajwaltic ta stojol Moisés, te c'alal yacotic to ta beel ta jochol taquin q'uinal soc a te jlumaltic israeletic. Te bit'il la yalbon te Cajwaltique, jich nix la scanantayon tel. Cuxulon yu'un ta ora to, ayix jo'eb yo'winic (85) ca'wilal yo'tic.

¹¹ Pero tulanon to ya caiy, mero jich nix quip ya caiy te bi c'aalil la sticunon bael ta yilel q'uinal te Moisés. Bayuc ya xju' ya xboon, soc ya xju' ya cac' guerra, jich nix bit'il ta neelal.

¹² Ja' swentail te ya jc'anbat yo'tic te q'uinal ta witstiquil te la yalbon stuquel te Cajwaltique. Ana'oj te sts'umbal muc'ul najt'il winic Anac tey ay yo'tic a. Ay muc'ul lumetic yu'unic te buen chapalic, te tey tulan yac'oj sbaic a. Ja'uc me to, ja' ay ta co'tan te Cajwaltic ya sjoinon soc ya scoltayon ta sloq'uesel bael, jich nix bit'il yaloj —xi' te Caleb.

¹³ Jich yu'un te Josué la yac'bey bendición te Caleb, soc la yac'bey sq'uinalin te Hebrón soc te sts'umbale.

¹⁴ Jich la yich' Caleb te Hebrón, ja' sq'uinal c'ot soc sts'umbal c'alal ora, melel te Caleb jun nax yo'tan ta stojol Cajwaltic te Dios yu'unic te israeletique.

¹⁵ Te namey q'uinal sbiil te Hebrón ja' Quiriat-arba. Te Arba ja' sts'umbal te muc'ul najt'il winic Anac te mero pujq'uem sc'oplale. Jich lamaj c'op ta bay te q'uinale.