Josué 13 - Bible in Tzeltal de Oxchuc y Tenejapa

Q'uinal quechel jilel ta ich'el

¹ C'alal mamalix a te Josué, te Cajwaltic jich la yalbey: —Te ja'ate yacatix ta mamalubel, bayalix te awa'wilale. Pero ay to bayal q'uinal quechel jilel ta ich'el.

² Quechel jilel spisil in to: te sq'uinal filisteoetic soc te gesuretic,

³ c'alal ta ja' Sihor te ay ta stojol sloq'uib c'aal yu'un Egipto, c'alal sq'uinal Ecrón ta stojol norte; ta spisil ja' sq'uinal cananeo ta alele. Ay jo'tul ajwalil filisteoetic yu'un te lumetic Gaza, Asdod, Ascalón, Gat soc Ecrón. Quechel xan jilel sq'uinal te aveoetic

⁴ ta sur, soc spisil te sq'uinal cananeoetic c'alal ta lumetic yu'un sidonetic, c'alal ta lum Afec, ja' to c'alal ta sts'ajc' sq'uinal te amorreoetique.

⁵ Quechel xan te sq'uinal te gibletic, soc spisil te Líbano ta stojol sloq'uib c'aal, c'alal ta Baal-gad te ay ta yoc wits Hermón ja' to ta yochibal Hamat.

⁶ Ya jloq'ues bael ta sq'uinal te sidonetic, yu'un ya x'ochic te israeletique, soc ya jloq'ues spisil mach'atic nainemic ta witstiquil, c'alal ta Líbano, ja' to ta Misrefot-maim. Yan te ja'ate at'elina spuquel sq'uinal te alumal israeletic, jich me te bit'il calojbat mandale.

⁷ Pucbeya sq'uinalic te balunchajp sts'umbal alumal soc te olil xan sts'umbal Manasés —xi' te Cajwaltique.

Te q'uinaletic yu'un sts'umbal Manasés, Rubén soc Gad

⁸ Te sts'umbal te Rubén, Gad soc te olil sts'umbal Manasés ac'botix sq'uinalic stuquelic. Tey ac'botic yu'un Moisés ta jejch' ja' Jordán ta stojol sloq'uib c'aal.

⁹ Ja' la sq'uinalinic te q'uinal ta Aroer ta sti'il muc'ja' Arnón, soc te lum ay ta yolil te stenlej xatal q'uinal yu'une, soc spisil te spamlej ta sba wits bael yu'un te lum Medeba, c'alal ta lum Dibón.

¹⁰ Ja' spisil te lumetic yu'un te Sehón, te anima muc' ajwalil amorreo yu'un lum Hesbón, ja' to c'alal ta sts'ajc' sq'uinal te amonetique.

¹¹ C'ot ta swentaic Galaad, te sq'uinal gesuretic, te sq'uinal maacateoetic, soc spisil te wits Hermón, soc ta spisil te sq'uinal Basán c'alal ta lum Salca,

¹² ja' spisil te bay mandalaj Og, te anima muc' ajwalil yu'un Basán, te nain ta lum Astarot soc ta lum Edrei. Te Og ja' slajibal te refaitaetic, te tsalotic yu'un Moisés soc tenotic loq'uel ta slumalique.

¹³ Te mach'atic ayic ta Gesur soc Maaca ma la yich' loq'uesel stuquelic, sjoinej sbaic soc te israeletic asta c'alal ora yo'tic.

¹⁴ Te sts'umbal Leví ma ba ac'bot sq'uinalic yu'un Moisés, yu'un ja' sq'uinal ya xc'ot te majt'aniletic te ya yich' chic'beyel te Cajwaltic te Dios cu'untic te israelotique, jich nix te bit'il yaloj stuquele.

¹⁵ Te Moisés la spucbey sq'uinalic te sts'umbal Rubén, ja' chican te jayeb ta jchajp ayique.

¹⁶ Te sq'uinalic, ja' jil ta swentaic c'alal ta lum Aroer te ay ta sti'il ja' Arnón, soc te lum te ay ta yolil stenlej xatal q'uinal yu'une, soc spisil te spamlej ta sba wits yu'un Medeba,

¹⁷ ja' to ta lum Hesbón soc spisil te lumetic te ayic ta spamlej te sba wits: ja' te Dibón, Bamot-baal, Bet-baal-meón,

¹⁸ Jahaza, Cademot, Mefaat,

¹⁹ Quiriataim, Sibma, Zaret-sahar, te ay ta ch'in wits ta stenlej xatal q'uinal,

²⁰ Bet-peor, Bet-jesimot soc ta xch'ujt' wits Pisga,

²¹ ja' te lumetic ta spamlej ba wits soc spisil ta bay mandalaj Sehón te anima muc' ajwalil amorreo ta lum Hesbón. Te Moisés la stsal Sehón soc te ajwaliletic yu'un Madián te la yac' sbaic ta abatinel ta stojole: ja' te Evi, Requem, Zur, Hur soc Reba.

²² Te israeletic la smilic te Balaam, ja' te snich'an Beor te la sna' syoljoltayel te bi ya xc'ot ta pasele, soc ay bayal yantic la smilic.

²³ Jich c'ot ta puquel te sq'uinal sts'umbal Rubén ta swentaic te jayeb yajtalul te juju-chajbe. Tey jil ta swentaic spisilic a te lumetic soc te ch'in lumetic, ja' to c'ot ta muc'ja' Jordán.

²⁴ Ja' nix jich te sts'umbal Gad la yich'ic puquel sq'uinalic yu'un Moisés, ja' chican te jayeb ta jchajbe.

²⁵ Ja' jil ta swentaic te lum Jazer, spisil te lumetic te ayic ta Galaad, soc olil la yich'bey sq'uinal te amonetic ja' to c'alal ta yan Aroer te stojol yiloj sba soc Rabá,

²⁶ soc te q'uinal ay ta olilal yu'un Hesbón, Ramat-mizpa soc Betonim, soc te ay ta yolilal yu'un Mahanaim soc ta bay comen sq'uinal Debir.

²⁷ Ta stenlej xatal q'uinal ja' jil ta swentaic te lumetic Bet-aram, Bet-nimra, Sucot soc Zafón, te ja' xanix ta bay mandalaj Sehón te muc' ajwalil yu'un Hesbón. Ja' yu'un te sq'uinal Gad ay ta sti'il muc'ja' Jordán ta stojol sloq'uib c'aal asta c'alal sti'il yu'un Mar Cineret ta stojol sur.

²⁸ Ja' lumetic soc te ch'in lumetic ta bay jil sq'uinalinic te sts'umbal Gad, ja' chican te jayeb ta jchajbe.

²⁹ Ja' nix jich te olil sts'umbal Manasés ac'bot sq'uinalic yu'un Moisés, ja' chican te jayeb ta jchajbe.

³⁰ Ja' jil ta swentaic ta bay yich'oj ta neelal te Og, te muc' ajwalil yu'un Basán: ja' te smacoj tel spisil te Basán c'alal ta Mahanaim, soc te oxwinic (60) ta jpam lum te ay ta swenta Jair,

³¹ olil te Galaad soc te lumetic Astarot soc Edrei. Spisil ja' la yich'ic te olil sts'umbal Maquir te snich'an Manasés, chican te jayeb ta jchajbe.

³² Ja' te q'uinaletic in to te ac'botic yu'un Moisés. La yich'ic ta bay spamlej yu'un Moab ta stojol sloq'uib c'aal yu'un Jordán, te jejch' ja' ay soc Jericó.

³³ Yan te sts'umbal Leví, ma ba ac'bot sq'uinal stuquelic, yu'un jich la yich' alel ta stojolic: “Te Cajwaltic te Dios cu'untic te israelotic, ja' me aq'uinalic c'oem”, xi' sc'oplalic.