Josué 11 - Bible in Tzeltal de Oxchuc y Tenejapa

Josué la stsal Jabín soc mach'atic xchapoj sbaic soc

¹ Spisil la yaiy stojol Jabín, ja' te muc' ajwalil yu'un Hazor. Jich la sticunbey c'op ta swenta xchapel sc'op soc te muc' ajwalil Jobab ta Madón, soc te muc' ajwaliletic yu'un te lum Simrón soc te lum Acsaf,

² soc spisil te muc' ajwaliletic yu'un spamal te q'uinal ta witstiquil ta swenta norte, te stenlej xatal q'uinal bael ta Jordán te ay ta sur yu'un te Mar Cineret, te spamlejal c'alal nopol bael Dor ta swenta smalib c'aal,

³ te cananeoetic ta stojol sloq'uib c'aal soc ta stojol smalib c'aal, te amorreoetic, te hititaetic, te ferezeoetic, te jebuseoetic ta witstiquil soc te heveoetic ta wits Hermón ta spamal bael q'uinal yu'un Mizpa.

⁴ Spisil te muc' ajwaliletic talic soc spisil te soldadoetic yu'unique, mero bayal caballoetic soc carretaetic yu'un guerra. Bayal ta jyalel te soldadoetic, mero ma xju'ix ta ajtayel, jich bit'il juju-jp'ij sit ji' ta sti'il te mare.

⁵ Spisilic jun nax la xchap sc'opic. La spas scampamentoic ta nopol ja'etic Merom, swenta yu'un ya yac'beyic guerra te israeletique.

⁶ Ja'uc me to, te Cajwaltic la yalbey te Josué: —Ma me x'axi'ic, melel te pajel ta jich ora to, spisilic me ya xju' awu'unic smilel. Tuch'beyaic ta bojel xchial yacanic te scaballoic, soc chic'beyaic te scarretaic yu'un guerra —xi' te Cajwaltique.

⁷ Jich yu'un te Josué soc spisil te swinictac yu'un guerra, ch'ayal yo'tanic a te la stenic bael ta nopol ja'etic Merom.

⁸ Te Cajwaltic la yac'bey yaiyic tsalaw te israeletique. La snutsic bael ta milel c'alal ta muc'ul lum Sidón soc Misrefot-maim, soc c'alal ta stojol sloq'uib c'aal ja' to ta spamlej ta Mizpa, ni jtuluc cuxul a jil.

⁹ Te Josué ts'acal la spas te bit'il nix yaloj mandal te Cajwaltique: la stuch'beyic xchial yacan scaballoic te scontroic, soc la xchic'beyic te scarretaic yu'un guerra.

¹⁰ Sujt'ic tel ta yu'uninel te lum Hazor, ja' te centro yu'unic te mach'a xchapoj sc'opique. La smilic te muc' ajwalil yu'un,

¹¹ soc spisil te mach'atic nainemic tey a. Spisil la slajinic jilel ta jc'axel, soc la xchiq'uic te lume.

¹² Ja' nix jich la spasbey spisil te lumetic te xchapoj sc'opic soque. La stsaquic soc la smilbeyic te muc' ajwaliletic yu'unique, jc'axel la sjinic jilel, jich bit'il la yal jilel mandal Moisés te yabat Cajwaltique.

¹³ Ja'uc me to, te israeletic ma la xchiq'uic ni jpamuc te lumetic te ayic ta ch'in tselel witsetic. Ja' nax la yich' chiq'uel yu'unic te Hazor.

¹⁴ La smilic ta puñal ta spisilic te mach'atic ayic ta lumetic, ma'yuc bay cuxul la yijq'uitayic jilel jtuluc. La yu'uninbeyic spisil te xchamsbalamic soc spisil te sbiluquique.

Josué ts'acal la xch'uun te mandaliletic yu'un Moisés

¹⁵ Te Cajwaltic la yalbey mandal te Moisés, te la yalbey jilel te Josué. Ts'acal la spasix spisil, ma'yuc c'ax jilel yu'un jp'aluc.

¹⁶ Te Josué ju' yu'un yich'el spamal te q'uinale: ja' te toyol witstiquil, spisil te Néguev, spisil te sq'uinal Gosén, te spamlejal soc stenlej xatal q'uinal yu'un Jordán, soc spisil te witstiquil soc spamlejal yu'un Israel.

¹⁷ C'alal ta wits Halac te jajch'em bael ta stojol Seir, soc ja' to ta Baal-gad ta bay spamlej yu'un Líbano ta yoc wits Hermón, te Josué la stsac soc la smil spisil te muc' ajwaliletic yu'un spamal te q'uinale.

¹⁸ Te Josué bayal nix c'aal la yac'bey guerra te muc' ajwaliletique.

¹⁹ Jpam nax lum la spas trato soc te israeletic, ja' te heveoetic ta lum Gabaón. Ta spisil te yantic ta puro guerra la yich'ic tsalel.

²⁰ Te Cajwaltic la yac'bey tulanajuc yo'tanic te scontroique, swenta yu'un ya me yac'bey guerra te israeletique. Jich la yich'ic lajinel ta jc'axel yu'un te israeletic, ma'yuc c'uxtayel, jich bit'il yaloj mandal Cajwaltic ta stojol Moisés.

²¹ Soc ju' yu'un Josué stsalel soc la sjin spisil te lumetic yu'un te sts'umbal Anac te ayic ta wits Hebrón, ta lum Debir, ta lum Anab soc spisil ta witstiquil yu'un Judá soc yu'un Israel.

²² Jich ma'yuc a jil ni jtuluc sts'umbal te muc'ul najt'il winic Anac ta spisil sq'uinal Israel. Ja' nax a jil sts'umbal stuquel te muc'ul najt'il winic Anac ta lum Gaza, ta lum Gat soc ta lum Asdod.

²³ Jich me la yich' spisil q'uinal te Josué, jich nix c'ot spisil te bit'il yalojbey Cajwaltic ta stojol Moisés. Ta patil la spucbey ta chajbalchajp sts'umbal israeletic, swenta yu'un ya me yu'uninic ta jc'axel. Ta patil lamaj c'op ta spamal q'uinal.