Jonás 4 - Bible in Tzeltal de Oxchuc y Tenejapa

Ilin Jonás

¹ Te Jonás ilin yu'un. Amen la yaiy te bila la spas te Diose, bayal bolob yo'tan yu'un.

² La sc'opon te Cajwaltic, jich la yal ta sc'oponel: —Cajwal, la nix jna' te c'alal ayon to ta jlumal a te bila ya xc'ot ta pasele. Ja' swentail te c'an anucon bael ta Tarsis. Melel jna'oj te ja'at Diosat te mero bayal yutsil awo'tan, te bayal ya ana' yo'bolil jbajtique, soc te ma orauc ya x'ilinate. Mero bayal te xc'uxul awo'tan. Manchuc me ya awal ya awac' castigo, pero patil ma ba ya awac' c'otuc ta pasel.

³ Ja' yu'un, Cajwal, wocoluc lajinbonix te jcuxlejale. Ja' mero lequix ya caiy te ya xlajone, ja' ma jc'anix te cuxulone —xi' ta stojol te Cajwaltique.

⁴ Pero jich albot yu'un: —¿Lec bal ya awaiy te bayal ya x'ilinate? —xi' sc'oplal.

⁵ Te Jonás loc' bael tey ta muc'ul lum, bajt' ta stojol smalib c'aal. Tey c'o spas xch'in yaxib wamal a. La snajc'an sba ta yaxinal ta smaliyel yil te bila ya xc'ot ta pasel ta stojol te muc'ul lume.

⁶ Pero te Cajwaltic Dios la yac' ch'iuc jtejc' ch'opac te' ta sts'eel Jonás, swenta yu'un ya me yac' yaxinal ta sjol, yu'un jich ma'yuc swocol a. Te Jonás bin nax yo'tan yu'un te ch'opac te'e.

⁷ Pero c'alal sacub q'uinal ta xchebal c'aal, te Dios la xchajban c'olom. Ba set'bey yisim te ch'opac te', jich taquej.

⁸ C'alal loc' tel c'aal, Dios la yac' taluc q'uixin ic' ta stojol sloq'uib c'aal. Soc te bit'il ja' mero tojlinbot ta xc'uxul c'aal te sjol Jonás, jajch' ta buen wocol yu'un. Ya sc'an ya xlajix ya yaiy. La yal te Jonase: —Ja' mero lequix ya caiy te yacuc xlajonixe, ja' ma jc'anix te ya xcuxinone —xi' te Jonase.

⁹ Pero albot yu'un te Diose: —¿Lec bal ya awaiy te bayal ya x'ilinat yu'un te taquej te jtejc' ch'opac te'? —xi' sc'oplal. La sjac' te Jonase: —Yu'unix lec ya caiy a. ¡Mero ya xlajonix yu'un slab co'tan ya caiy! —xi' xan.

¹⁰ Albot yu'un Cajwaltic: —Ma ja'ucat la ats'un te ch'opac te'e, soc ma ja'ucat la ach'ijtes. Ta jun nax ajc'ubal ch'i, ta yan ajc'ubal laj, pero bayal la ana'bey yo'bolil sba.

¹¹ ¿Ja'uc to balix a jiche te muc'ul lum Nínive te banti ay c'axem ta wacwinic ta jmil (120,000) alaletic te ma to sna'ic q'uinale, soc bayal chambalametic tey ae? ¿Ma bal yacuc jna'bey yo'bolil sbaic jiche? —xi' sc'oplal yu'un Dios te Jonase.