Jonás 3 - Bible in Tzeltal de Oxchuc y Tenejapa

La sujt'es yo'tan lum Nínive

¹ Te Cajwaltic la xcha'c'opon xan swenta xchebal buelta te Jonás, jich la yalbey:

² —Jajch'an ta beel, baan ta muc'ul lum Nínive. Albeya yaiy te bila ya calbate —xi'.

³ Te Jonás jajch' ta beel, bajt' ta Nínive, jich la spas te bit'il albot yu'un te Cajwaltique. Te Nínive mero muc'ul lum, oxeb c'aal ta beentayel te lume.

⁴ Te Jonás och bael ta yutil te muc'ul lume. Been bael te jun c'aal. Jich yac ta yalel ta aw: —¡Ta cha'winic c'aal ya me xlaj te lum Nínive! —xi' ta aw.

⁵ Ta spisil te yajwal te lume, muc'-biq'uitetic, la xch'uunic te Diose, soc la yalic mandal te ya scom swe'elic soc te ya slapic ch'ixal pac'.

⁶ Te c'alal la yaiy stojol te muc' ajwalil yu'un Nínive, co ta smuc'ul nactijib. La sloq'ues te sc'u' nixe, la slap uuc te ch'ixal paq'ue, la snajc'an sba ta stanul c'ajc'.

⁷ Te muc' ajwalil soc te sjo'tac ta ajwalil ay bila la xchapic ta stojol te slumalique, jich la yalic: —Ma me ayuc mach'a ay bila ya swe', soc ma me xyac'beyic swe'el soc ma me xyac'beyic yuch' ja' te swacaxic soc te chijetic yu'unique.

⁸ Ja' lec ac'a me slapic te ch'ixal paq'ue, soc ac'a me sc'oponic Dios ta mero spisil yo'tanic. Ac'a me yijq'uitayic ta juju-jtul te sbolilic soc yeleq'uic, spisil soc bitic amen yacalic ta spasel.

⁹ Repente jich ya xlecub yo'tan cu'untic a te Diose, jich ma ba ya yac'otic ta lajel —xi' te ajwalile.

¹⁰ La yil Dios te bila yacalic ta spasel te níniveetique. Te bit'il yacalic ta sujt'esel yo'tanic yu'un te bila ma lecuc yacalic ta spasele, jich ma ba la yac' c'otuc ta pasel ta stojolic te lajel la sticun ta alele.