Jonás 2 - Bible in Tzeltal de Oxchuc y Tenejapa

La sc'opon Dios Jonás

¹ Te c'alal ay ta xch'ujt' chay a te Jonás, la sc'opon te Cajwaltic, ja' te Dios yu'une.

² Jich la yal: —Cajwal, te c'alal ayon ta wocol ae, la jc'oponat, la ajac'bon te jc'ope. Te c'alal ayonix ta swenta la caiy te lajele, la jc'oponat, la awaiybon te jc'ope.

³ La ach'ojon coel ta mero sc'ubulil mar, te banti la spotson te yip sbeel te ja'e, soc te banti c'ax ta jba awu'un te stulanil yip te ja'e.

⁴ Jich c'oemon la caiy te bit'il jc'axel loq'uesbilon ta atojole; soc jich la jcuy te ma'yuc bi ora ya quilix te ch'ul templo awu'une.

⁵ Melel jc'axel mulon ta yolil mar, jc'axel mululon ta sc'ubulil mar, soc la sjal sba ta jol te wamal ta yutil mar.

⁶ C'axon xan coel a te banti yich'oj jajch'el tel yip te witstiquile, jich la caiy te bit'il jc'axel macalon jilel tey ae. Pero ja'at, Cajwal, Dios cu'un, ya acoltayon loq'uel, ma ba ya awac'on bael ta muquenal.

⁷ Te c'alal la caiy jba te nopol ya xlajonixe, la jna'at, Cajwal; c'ot ta atojol c'alal ta ch'ul templo awu'un te jc'ope.

⁸ Te mach'atic ya xch'uunic te loc'ombaetic, jich ya xchebaj yo'tanic ta atojol;

⁹ yan te jo'one bin nax co'tan ya calbat yutsil ac'oplal soc ya cac'bat milbil amajt'an. Jich me ya xc'ot ta pasel a te bila caloj ta atojole. Ja'at nax atuquel Cajwal, te ya xju' ya xcoltaywanate —xi' te Jonase.

¹⁰ Jich yu'un te Cajwaltic la spas ta mandal te muc'ul chaye, tey ba xejtay loq'uel a te Jonás ta ti'mar.