Joel 3 - Bible in Tzeltal de Oxchuc y Tenejapa

Xchajbanel yu'un Cajwaltic ta stojol nacionetic

¹ Jich ya yal te Cajwaltic: —C'alal ya xc'ot yorail ya me cac' te ya staic yutsilal te Judá soc te Jerusalén.

² Ya jtsob spisil te nacionetic, ya me quic' bael ta stenlej xatal q'uinal yu'un Josafat. Tey me ya xc'o cac'bey stojic a te bila la spasbeyic te lum Israel cu'une. Melel la spucbonic bael ta swolol balumilal te israeletic, soc la spucbey sbaic te jlum-jq'uinale.

³ La spucbey sbaic te lum cu'une, la spasbeyic snumeroil ta na'el mach'a ya xc'ot ta swenta. La xchonic te alalqueremetic soc te alal ach'ixetique. Te stojole la slajinic ta vino, la slajinic ta swenta jmulawil antsetic.

⁴ “¿Bi ya ac'anic ta jtojol, Tiro, Sidón, soc Filistea? ¿Ya bal asujt'esbonic spacol? ¿Ay bal bila ya ac'anbonic stojol? Nopol ya cac'beyex te bila ja'ex nix lebil awu'unique.

⁵ Ja'ex la awelc'anbonic te plata soc te oro cu'un, la awich'bonic bael te c'ulejalil cu'une, c'o awaq'uic ta temploetic yu'un awajcananic.

⁶ La awiq'uic bael ta c'ubul te yajwal Judá, soc la awiq'uic bael te mach'atic nainemic ta Jerusalén, la achonic ta mosoinel yu'un griegoetic.

⁷ Pero jo'on me ya quic' loq'uel tel te banti la achonic baele. Te ja'exe ya me cac'beyex awocolic uuc, jich nix me te bit'il c'ax yu'unic te mach'atic la awac'beyic swocolique.

⁸ Ya me jchonbey judioetic te aquerem-nich'nabic soc te awantsil-nich'nabic, swenta yu'un ya xchonbeyic bael sabeo-winiquetic te c'ubul slumalique. Jo'on Ajwalilon, yacon ta yalel —xi' te Cajwaltique.

⁹ Albeyaic te nacionetic, albeyaic ta jamal te ya xjajch'ix te ch'ul guerra. Ic'aic tel te mach'atic ma xiwique; ac'a taluc, ac'a ju'uc yu'unic te guerrae.

¹⁰ Ac'a spasic ta puñal te yasadonic; te hoz, ac'a spasic ta lanza. “Jo'on mero bayal quip”, xiuc me te mach'a ma'yuc yipe.

¹¹ Ta apisilic ja'ex nacionetic te patxujc' ayexe, suja abaic ta ora, la'ic, la' tsoba abaic. Manchuc me ja'uc te mach'a lamal yo'tane, ya xc'atp'uj ta jguerra-winic.

¹² Ac'a me stij sbaic te nacionetic, ac'a ochuc bael ta stenlej xatal q'uinal yu'un Josafat. Tey me ya yaiy chajbanwanej a te Cajwaltique, ya xchajban ta spisil te nacionetic te patxujc' ayique.

¹³ Melel mero jc'axel amen yo'tanic. Set'aic jichuc yijuben trigo, la staix yorail te c'ajoje. Tenaic jichuc ts'usubetic, melel chapalix yu'un ya yich' pasel te vino c'oeme.

¹⁴ Mero bayalix mach'atic ayic ta stenlej xatal q'uinal yu'un Chajbanel, melel nopolix yorail te sc'aalelal te Cajwaltique.

¹⁵ Ya me x'ijc'ub c'aal, ya me x'ijc'ub u, ya me xtup' xojobil te eq'uetique.

¹⁶ Te Cajwaltic ya yac' ta aiyel sc'op, jich me sc'op te bit'il ya xt'om chawuc. Ya me xc'opoj tel c'alal ta wits Sión, ta Jerusalén; ya me stij sba te ch'ulchan soc ya me stij sba te lumq'uinale. Pero te Cajwaltic ja' me anjibal jcoltaywanej yu'un israeletic, melel ja'ic te lum yu'un stuquele.

Ya me xtal yutsilal Judá

¹⁷ Jich ya yal te Cajwaltic: —Te ja'ex ya me ana'ic te Ajwalilon te Dioson awu'unique, nainemon ta Sión, ja' te ch'ul wits cu'une. Te Jerusalén ch'ul lum ya xc'ot; ma me ayuquix bi ora ya x'u'uninotix yu'un jyanlumetic.

¹⁸ Te c'alal ya xc'ot sc'aalelal, te vino soc te leche ya me x'oquin c'oem ta tseletic soc ta witstiquil. Te beja'etic yu'un Judá ya me yich'ic bael bayal ja'. Ta templo cu'un ya xchicnaj sloq'uibja' te ya yajts'es te stenlej xatal q'uinal yu'un Sitim.

¹⁹ Te Egipto jc'axel me jinem ya xjil; te Edom ya me yich' c'atp'unel ta jochol taquin q'uinal. Melel la yac'beyic guerra te yajwal Judá, ta slum-sq'uinal la smalbeyic xch'ich'el te mach'atic ma'yuc bila amen snopoj ta yo'tanique.

^20-21 Jo'on me ya jsujt'esbey spacol te bit'il la yich'ic milele, ma ba ya jpasbey perdón te mach'a la yaiy milawe. Pero te Judá soc Jerusalén, spisil me ora ay yajwal stuquelic. Te jo'on Ajwalilon ya me xnainon ta wits Sión —xi' te Cajwaltique.