Jeremías 9 - Bible in Tzeltal de Oxchuc y Tenejapa

¹ Te ja'uc sloq'uibja' te jsite, te jichuque, tulan ya x'oquin te ya'lel jsit, ta swenta yoc'tayel c'aal ajc'ubal te animaetic yu'un te jlumale.

² Tey ayucon laj ta jochol taquin q'uinal, te nainemucon tey a, c'ubul ayon yu'un a te jlumal te jichuque. Melel spisilic ma junuc yo'tanic; jchajp yac'oj sbaic ta spasel ixtajel.

³ Ja' mero chapalic yu'un yalel te lotetique, jich c'oem te bit'il ya st'imuyiquix bael t'im. Ta bay lum tey yac ta at'el a te lote, ma ja'uc te smelelile; yan yan ta bats'ejel bael te bila amene. Ja' nix tulan la yalix stuquel te Cajwaltique: —Ma ba ya ac'anic te ya ana'bonic jbae —xi'.

⁴ Asta jo'tac ma spas te ya quich'beytic ta muc' te sc'opique; manchuc teme quermano jbatic soc, ma xju' ya quich'tiquix ta muc'. Melel te mach'atic quermano jbatic soque, ja' nax ya xlo'laywanic; te mach'a jo'tac jbatic soque, ja' nax ya jle jbatic ta c'op juju-jtul.

⁵ Juju-jtul ya jlaban jbatic soc yan, soc ma'yuc mach'a ya yal te bila smelelile. C'aemotiquix ta yalel lot; c'ax amenotic, ma xju' cu'untic sjelel co'tantic, xoon yu'un.

⁶ Te Cajwaltic jich ya yal: —Yantic nax te uts'inele, yantic nax te lote. Te lum cu'un ma sc'an sna'bonic jba.

⁷ Ja' yu'un te jo'on Ajwalilon te Spisil ya xju' cu'une, ya cal: ¿Bi yan ya xju' ya jpas yu'un te lum cu'une? Ja' nax ya cac' ta c'ajc' swenta slecubtesel.

⁸ Te yeique, jich bit'il yat'ejibal t'im c'oem yu'un lajel; yacalic ta yalel lo'laywanej ta c'op. Lec nax ya spatbey sbaic yo'tanic yilel soc sjo'tac, pero ta smelelil ja' nax yac xchajbanbel spejts'ul c'oem.

⁹ ¿Me yacuc cac'bey castigo yu'un? ¿Me jichuc ya sc'an cac'bey stoj te lum te bila ya spase? Jo'on Ajwalilon te jich ya cal.

¹⁰ “Oc'anic soc ajc'anajanic ta witstiquil, c'ajintayaic mel-o'tan c'ayoj ta aquiltic, melel chic'biliquix, soc ma'yuc mach'a ya xc'axix tey a; ma'yuc bay ya xchicnajix sc'op te wacaxe, asta te mutetic soc te chambalametic te ya xti'awanique, bajt'iquix ta anel.

¹¹ “Te Jerusalén, ya jc'atp'un ta jbus nax tontiquil; xch'en ja'mal ts'i'etic ya xc'ot. Ya jc'atp'un ta jochol taquin q'uinal te lumetic ta sq'uinal Judá; soc ma me ayuc yajwal ya xjil ta jyalel —xi' te Cajwaltique.

¹² ¿Mach'a a te bayal sp'ijil ta swenta sna'beyel swentail in to? ¿Mach'a ac'bot sna' stojol yu'un Cajwaltic swenta ya xju' yu'un xcholbel yaiy te yantique? ¿Bi yu'un te lum te jineme, te taquinix jichuc jochol taquin q'uinal ta bay ma'yuc mach'a ya xc'axix tey a?

¹³ Te Cajwaltic la sjac': —Spisil jich a c'ot ta pasel, melel te israeletic la yijq'uitayic te p'ijubtesel la cac'beye, ma la yich'bonic ta muc' soc ma la sc'otesic ta pasel.

¹⁴ Tulan la yac' sbaic bael tey a te bay la sc'an yo'tanic, la xch'uunic te lotil diosetic, jich bit'il p'ijubtesotic jilel yu'un te sme'-statique.

¹⁵ Te jo'on Ajwalilon te Spisil ya xju' cu'une, te Dioson yu'un Israel, ja' swentail te ya cal: Ya cac'bey swe'ic te bila bayal xch'aale, ya cac'bey yuch'ic ja' te capal soc veneno.

¹⁶ Ya jpuc bael ta nacionetic te ma yilojuque, soc te ma yilojuc te sme'-statique; ya me cac' te ya yich'ic nutsel ta puñal, asta ma'yuc ya xjil jtuluc —xi' te Cajwaltique.

Oq'uel yu'un swocol Jerusalén

¹⁷ Te Cajwaltic te Spisil ya xju' yu'une ya yal: —Aiya awaiyic, ticunaic ta iq'uel te antsetic te yat'elinej oq'uel ta yorail woclajel —xi'.

¹⁸ La sjac' te lume: —Jichuc, ac'a taluquic ta ora ac'a tal yoq'uetayotic te jo'otique; ac'a tal snojesbotic ya'lel te jsitique, ac'a maluc loq'uel bayal te ya'lel jsitique —xiic.

¹⁹ C'alal ta Sión ya xc'ot te yajc'anic yu'un te xc'uxule: —¡Ay, bit'il la jtatic a te jinele! Q'uexlaltic sba te woclajele. Ya nix quijq'uitaytic jilel a te jlumaltique, te naetic cu'untic jiniquix —xiic me.

²⁰ Antsetic, aiya awaiyic stojol sc'op te Cajwaltique, aiya awaiyic te bila ya yalbate. P'ijubtesaic ta oq'uel te awantsil-alic soc te ajo'taque, te yacuc yalic ta oq'uel:

²¹ “Te lajele och tel ta yutil jnatic, jul ta palacioetic cu'untic; ya smil alaletic ta calleetic soc te queremetic ach'ixetic ta parqueetic.

²² Te sbaq'uetalic te ants-winiquetique limilic jilel ta lum, jich bit'il stsa' chambalam ta sba lumq'uinal, jich bit'il tomoltom ya xjil ta spat te jset'-trigoe. Ma'yuc mach'a ya xtal stsobey te sbaq'uetalique”, xiic me ta yalel ta oq'uel. Jich ya yal te Cajwaltique.

²³ Te Cajwaltic ya yal: —Ma me toyemuc q'uinal ya yaiy te mach'a p'ije, ta scaj nax te sp'ijile; ma me jichuc ya spas te mach'a ay yipe, ta scaj nax te yipe; ma me jichuc ya spas te jc'uleje, ta scaj nax te sc'ulejale.

²⁴ Teme ay mach'a toyol nax q'uinal ya yaiye, ja'uc me toyemuc nax q'uinal ya yaiy yu'un te ya sna'bon jbae, te ya sna' te jo'on Ajwalilon, te ya x'at'ejon ta balumilal soc xc'uxul co'tan, te toj ya caiy chajbanwaneje. Ja' me ya smulan co'tan. Jo'on Ajwalilon jich ya cal —xi'.

²⁵ Te Cajwaltic jich ya yal: —Ya me xc'ot sc'aalelal te ya cac'bey castigo spisil te lumetic te ja' nax yich'ojic circuncisión ta swenta sbaq'uetalic:

²⁶ Jich bit'il te Egipto, te Judá, Edom, Amón soc Moab, soc spisil te mach'atic ayic ta jochol taquin q'uinal te ya sjoxic te stsotsil sjolic ta xujc' xchiquinique. Melel spisil te lumetic to, soc nix te lum Israel, ta smelelil ma ba yich'oj circuncisión ta yo'tanique —xi'.